30 މާޗް 2024 - 06:30
އަންނަ މަހު ރާއްޖޭގައި ބާއްވާ، އޭޝިއާގެ ކެރަމް މުބާރާތަށް 1.1 މިލިއަން ރުފިޔާ ހަރަދުވާނެ ކަމަށް ކެރަމް އެސޯސިއޭޝަނުން ބުނެފި އެވެ.
އެ އެސޯސިއޭޝަންގެ ޖެނަރަލް ސެކްރެޓަރީ ހުސައިން ރައުޝާން ވިދާޅުވީ މުބާރަތަށް ރާއްޖެ އަންނަ ގައުމުތަކުގެ ޑެލިގޭޓުން ރާއްޖެ އަންނަ ހިސާބުން، އެ ޑެލިގޭޓުންގެ އެކޮމެޑޭޝަނާއި ކޭޓްރިންގެ ކަންކަން ބަލަހައްޓާނީ ވެސް ލަފާ ކުރެވޭ އެ ބަޖެޓުން ކަމަށެވެ. އޭޝިއާގެ 12 ގައުމަކުން 100 އަށް ވުރެ ގިނަ ޑެލިގޭޓުން ރާއްޖެ އަންނާނެ އެވެ.
ރާއްޖޭގެ ކުޅުންތެރިންގެ ޓްރޭނިން ކޭމްޕްގެ ހަރަދުތައް ވެސް އެ ބަޖެޓުން ބަލަހައްޓާނެ އެވެ. ދުނިޔޭގެ ޗެމްޕިއަންކަން ހޯދި ކުރީގެ ކުޅުންތެރިޔަކު، ރާއްޖޭގެ ޓީމުގެ ކޯޗު ކަމަށް ވަނީ ހަމަޖައްސައިފަ އެވެ. މުބާރާތް ނިމެންދެން ދިވެހި ޓީމުގައި އޭނާ މަސައްކަތް ކުރާނެ އެވެ.
އޭނާ ވިދާޅުވީ މުބާރާތަށް އެހެން ފަރާތްތަކުގެ ސްޕޮންސާ ހޯދުމުގެ މަސައްކަތް ކުރަމުން އަންނަ ކަމަށެވެ. އެކަމަކު ބޮޑު ސްޕޮންސަރަކީ ސްޕޯޓްސް މިނިސްޓްރީ އެވެ.
މުބާރާތަށް އަންނާނެ ގައުމުތައް: އިންޑިއާ، ސްރީ ލަންކާ، ނޭޕާލް، ބަންގްލަދޭޝް، ޕާކިސްތާން، ގަތަރު، ޔުނައިޓެޑް އެރަބް އެމިރޭޓްސް އޮމާން، ޖަޕާން، ދެކުނު ކޮރެއާ، މެލޭޝިއާ އަދި ސިންގަޕޫރެ އެވެ.
އޭޝިއާގެ ކެރަމް މުބާރާތް ހުއްޓިފައި އޮންނަތާ 10 އަހަރަށް ވުރެ ގިނަ ދުވަސް ވެއްޖެ އެވެ. އެ މުބާރާތް އަލުން ފަށައިގަންނަން އިސްނެގީ ކެރަމް އެސޯސިއޭޝަނުންނެވެ. އެންމެ ފަހުން އެ މުބާރާތް ބޭއްވީ 2013 ގައި އިންޑިއާގެ ކަލްކަތާގަ އެވެ.
މި އަހަރުން ފެށިގެން މުބާރާތް މެދުނުކެނޑި ކުރިއަށް ދާނެ ގޮތުގެ ޕްލޭނަކަށް، އޭޝިއާގެ ކެރަމް ފެޑެރޭޝަނާ އެކު ކެރަމް އެސޯސިއޭޝަނުން ވަނީ މަސައްކަތް ކޮށްފަ އެވެ.
"މުބާރާތުގެ ތެރޭގައި އެއް ދުވަސް އިންނާނެ އޭޝިއަން ފެޑެރޭޝަންގެ މީޓިން [ކޮންގްރެސް އަށް] ކޮންމެ ގައުމަކުން ދެ މަންދޫބުން ބައިވެރި ވާނެ. މި ކޮންގްރެސްގައި އަޅުގަނޑުމެން މިހާރު ވެސް ރިކުއެސްޓްކޮށްފަ އިންނާނެ ފަސް އަހަރުގެ ޕްލޭނަކަށް. އެ ފަސް އަހަރުތެރޭ ބާއްވާނެ ގައުމުތަކުގެ ހޯސްޓިން ލިސްޓް އެކުލަވާލަން އިންޓަނޭޝަނަލް ފެޑެރޭޝަނުން މިހާރު ވެސް ވަނީ އަންގާފަ،" ރައުޝާން ވިދާޅުވި އެވެ.
"(މުބާރަތަށް ރާއްޖެ އަށް) މި އަންނަ 12 ގައުމުގެ ތެރެއިން 9 ގައުމެއް އެ ލިސްޓަގައި މިހާރު ވާނީ ހިމަނާފަ. އެހެންވީމަ މި ކޮންގްރެސްއިން އެނގިގެންދާނެ ކުރިއަށް ފަސް އަހަރަށް މުބާރާތް އޮންނާނީ ކޮން ގައުމުތަކެއްގައިކަން."
މުބާރާތް ފަށާނީ އޭޕްރީލް 27 ގަ އެވެ. ފަސް ދުވަހަށް ކުރިއަށްގެންދާ މުބާރާތުގެ މެޗުތައް ކުޅޭނީ ސޯޝަލް ސެންޓަރުގެ އިންޑޯ ހޯލްގަ އެވެ.