28 މާޗް 2024 - 23:55
ޗައިނާ ސަރުކާރުން ރާއްޖެއަށް 10 ޕިކަޕު މިއަދު ހަދިޔާކޮށްފި އެވެ.
ޗައިނާގެ ޝަންޑަންގް ޕްރޮވިންސް އިން ހަދިޔާކުރި މި ޕިކަޕްތައް ދިވެހި ސަރުކާރާ ހަވާލުކުރުމަށް މިއަދު ހަވީރު މާލޭގެ ކުރީގެ ކުނިކޮށީގައި ހާއްސަ ރަސްމިއްޔާތު ޝަރަފުވެރިކޮށްދެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވެންގް ލީޒިންގެވެ.
ދިވެހި ސަރުކާރުގެ ފަރާތުން މި ޕިކަޕްތަކާ ހަވާލުވެވަޑައިގަތީ ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފެވެ.
ޗައިނާއިން ހަދިޔާކުރި މި ޕިކަޕްތަކަކީ ކުނި އުފުލުމަށާއި މުނިސިޕަލް ބޭނުންތަކަށް ބޭނުންކުރެވޭނެ ގޮތަށް ފަރުމާކޮށްފައިވާ ޕިކަކުތަކެކެވެ.
ސަފީރު ވެންގް ލީޒިން އެކްސްގައި ކުރެއްވި ޕޯސްޓެއްގައި ވިދާޅުވީ މި ވެހިކަލްތަކަކީ މާލެ އާއި ރާއްޖޭގެ އެހެން ސިޓީތަކުގައި ކުނި އުފުލުމަށާއި އާންމު މަސައްކަތްތަކަށް ވަރަށް ބޮޑު އެހީއަކަށްވެ، ރާއްޖެއަކީ ރީތި ތަނެއްގެ ގޮތުގައި ބޭއްވުމަށް މުހިންމު ދައުރެއް އަދާކުރާނެ އުޅަނދުތަކެއް ކަމަށް އޭނާ ގަބޫލުކުރައްވާ ކަމަށެވެ.
ޗައިނާ ސަރުކާރުގެ އެހީގައި ރާއްޖޭގެ 17 ރަށަކަށް ލެބޯޓްރީ ސާމާނު ހޯދަން ވެސް ހެލްތު މިނިސްޓްރީން މިއަދު ވަނީ ސޮއިކޮށްފަ އެވެ. އަދި ޗައިނާއިން ރާއްޖެއަށް ހަދިޔާކުރި 1،500 ޓަނުގެ ބޯފެން ވެސް އިއްޔެ ވަނީ ރާއްޖެ ގެނެސްފަ އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެޑައިގަތުމަށް ފަހު ރަސްމީ ދަތުރުފުޅެއްގައި އެންމެ ފުރަތަމަ ވަޑައިގަތީ ޗައިނާ އަށެވެ. އެ ދަތުރުފުޅުގައި ދެ ގައުމުގެ ދެމެދުގައި ވަނީ ވަރަށް މުހިންމު ގިނަ އެއްބަސްވުންތަކެއްގައި ސޮއިކޮށްފަ އެވެ.