24 މާޗް 2024 - 08:13
އިހު ޒަމާނު ގޮތަށް ހުރި ގޭގެ ބޭރު އައްޓެއްގައި އައިމިނަތު އިބްރާހީމް، 90، އިނީ ފުން ހިޔާލެއްގަ އެވެ. ށ. ގޮއިދޫން ފުރަން ދިޔަ މަގުމަތީގައި ކެމެރާގެ ލެންސަށް އެރި މި އަންހެން މީހާގެ ފޮޓޯއެއް ނެގުމުގެ ހުއްދައަށް އެދުމުން ހިނިތުންވެލި އެވެ. އެކަމަކު އެ ހިނިތުންވުމުގެ ފަހަތުގައި އޮތީ އެކަނިވެރި ހަޔާތެކެވެ. ފިރިމީހާ ނިޔާވެ ދިރިއުޅެމުން އަންނަނީ އެކަންޏެވެ. އެ ދެމަފިރިންނަށް ދުވަހަކު ވެސް ދަރިއަކު ނުލިބޭއިރު އެއީ އެތައް ޒަހަމަކާ ގުޅިފައިވާ ހިތްދަތި ވާހަކައެކެވެ.
