23 މާޗް 2024 - 23:37
ބިންވެރިޔާ ސްކީމްގެ ދަށުން ހުޅުމާލެ 2 އިން ދޫކޮށްފައިވާ ގޯތިތަކުގެ އިންފާރު ވަކިކޮށްދޭން އެޗްޑީސީން މިއަދު ފަށައިފި އެވެ.
ގޯތިތައް ސާވޭ ކުރުމަށްފަހު، އިން ވަކިކުރުމުގެ މަސައްކަތް ފެށުމަށް މިއަދު ބޭއްވި ހަރަކާތަށް ފަހު ނޫސްވެރިންނާ ވާހަކަ ދައްކަވަމުން އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވީ، މިއީ އަބަދުވެސް ކުރަމުން އަންނަ މަސައްކަތެއް ކަމަށާއި އެ ކުންފުނިން މި ފަހަރު ބިންވެރިންނަށް ފަސޭހަ ކޮށްދިނީ ކަމަށެވެ.
މީގެ ކުރިން އަމަލު ކުރަމުން އަންނަ ގޮތުން ނަމަ ގޯތީގައި އިމާރާތް ކުރަން ފެށުމުގެ ކުރިން ތިން މަރުހަލާއެއް ފުރިހަމަ ކުރަން ޖެހޭ ކަމަށާއި ނަމަވެސް މިހާރު އިންފާރު ވަކިކޮށްފައި ދިނުމުން ޕޯޓަލް މެދުވެރިކޮށް ހުއްދަ ހޯދައިގެން ރާނަން ފެށޭ ވަރު ވާނެ ކަމަށް އޭނާ ވިދާޅުވި އެވެ.
"މިއަދު އައިސް މި ގާތައް އިންފާރުގައި އަތުރައި ދީފައި މި ދެނީ މިހާރު. އޭގެ މާނައަކީ އެ ބޭފުޅުންނަށް ހުއްދަ ހަމަ ދޫކޮށްލާއިރަށް މި އިންފާރުގައި މާކް ކޮށްފައި ހުރި އޭރިއާގައި އިންފާރު ވަކިކުރުމުގެ ދަތިކަމެއް ނާންނާނެ،" ފަޒުލް ވިދާޅުވި އެވެ.
އޭނާ ވިދާޅުވީ އެޗްޑީސީން މަސައްކަތް ކުރަމުން އަންނަނީ ހުޅުމާލޭގެ ތިން ވަނަ ފިޔަވަހި ހިއްކުމުގެ މަސައްކަތް ނިމެންވާއިރަށް، މިހާރު ދޫކޮށްފައި ހުރި ގޯތިތަކަށް ދިމާވެފައިވާ މައްސަލަތައް ވީ އެންމެ އަވަހަކަށް ހައްލުކޮށް، ގޯތިތަކުގައި އިމާރާތް ކުރުމުގެ ހުއްދަ ދިނުމަށް ކަމަށެވެ.
ކަރަންޓާއި ފެނުގެ ނެޓްވޯކަށް އަރާ ގޮތަށް ދޫކޮށްފައިވާ ގޯތިތަކާއި ވެއްޔާއި ހިލަފުނިތައް މަތިން ދޫކޮށްފައިވާ ގޯތިތައް ވެސް ބިންވެރިޔާ އަށް ބޭނުން ކުރެވޭނެ ގޮތަށް، އެ މަސައްކަތްތައް ކަމާ ގުޅޭ އިދާރާތަކާ ގުޅިގެން ފަށާފައިވާ ކަމަށް ފަޒުލް ވިދާޅުވި އެވެ.
"ނިސްބަތުން ބަލާއިރު މާ ގިނަ ދުވަހެއް ނުވާނެ ބިން ދޭކަށް. ނުދެވިގެން އުޅެނީ 150 ވަރަކަށް ޕްލޮޓު،" އޭނާ ވިދާޅުވި އެވެ.
އިންފާރު ވަކިކުރުމުގެ މަސައްކަތް މިއަދު ފަށާފައިވާއިރު، ގޯތިތައް ލިބުނު މީހުންނަށް އެ ބިންތައް ހަވާލުކުރުމަށް އެތަން ސާފުކޮށް ބިންގަނޑު އެއްވަރުކުރުމުގެ މަސައްކަތް ވެސް އެޗްޑީސީން އަންނަނީ ކުރަމުންނެވެ.