22 މާޗް 2024 - 08:39
އަރާމު ނިދީގައި އޮއްވާ، ސިހިފައި ދެ ލޯ ހުޅުވުނީ މޫނު މައްޗަށް ފެން ތިކިތަކެއް ޖެހެން ފެށުމުންނެވެ. ފުންމައިގެން ތެދުވެ ދާދި ގާތުގައި އިން އަހަރެންގެ ލޯބިވާ އަނބިމީހާ، ރިޔާގެ ގައިގައި ހިފައި ގަތީމެވެ. އެ ވަގުތު އޭނާ ބާރަށް ހޭން ފެށިއެވެ.
އިސްތަށިގަނޑުގެ ހިމަކޮޅުން ފައިބަމުން ދާ ފެން ތިކިތައް އަހަރެންގެ މޫނަށް ބުރުވައިލަމުން އަހަރެން ހޭލައްވައިލީ ރިޔާއެވެ. ހެމުންހެމުން ދޫކުރާށޭ ގޮވި ނަމަވެސް އަހަރެން އޮތީ އޭނާގެ ހިމަ އުނަގަނޑުގައި ދެ އަތުން ތަގުޅި ބައްދައިގެންނެވެ. އެންމެ ފަހުން އޭނާ ވެސް އަހަރެންގެ ގައިގައި ބައްދާލިއެވެ.
"ޝާމް،" ރިޔާ ގޮވާލިއެވެ.
އަހަރެންގެ ކަންފަތުގައި އޭނާ ދެ ތުންފަތް ޖައްސާލިއެވެ. އެ ވަގުތު ކަންފަތުގެ ލޯލިތައް ކޮޅަށް ޖެހިގެން ދިޔައީ އެހާމެ އަވަހަށެވެ. ގުޑި ވެސް ނުލައި އަހަރެން އޮތީމެވެ. ރިޔާ އަހަންނާ ގާތްވެލާ ކޮންމެ ފަހަރަކު އަހަރެންގެ ހުރިހާ ހިއްސެއް އޭނާއަށް އަމާން ދޭ ކަހަލައެވެ. އޭނާގެ ކޮންމެ ހަރަކާތަކަށް އަހަރެންގެ ހިތް މަސްތުވެއެވެ. އަދި ކޮންމެ އެދުމަކަށް އިޖާބަ ދެވެއެވެ.
ނުހަނު ލޯބިން ރިޔާ އަހަރެންގެ ބޮލުގެ އިސްތަށިގަނޑާ ކުޅެމުން ދިޔައެވެ. އޭނާގެ މަޑު އަތްތިލައިން އަހަންނަށް ލިބިދޭ އަރާމެއް ބުނެދޭން ވެސް ނޭނގެއެވެ. އެހެންވެ، ދެ ލޯ ހުޅުވައިލަން ވެސް ނޭނގިފައި އަހަންނަށް އޮވެވުނީއެވެ. އެ ވަގުތު ލޮލުގެ އެންމެ އެތެރެއިން އަހަންނަށް ސިފަވަމުން ދިޔައީ މީގެ އަހަރެއްހާ ދުވަހުގެ ދުރު ހަނދާންތަކެވެ. ރިޔާ ހޯދަން އަހަރެން ކުރި މަސައްކަތެވެ. އުފުލަން ޖެހުނު ވޭނެވެ. އަދި ކެތްތެރިކަމެއް ނެތި ކުރި އިންތިޒާރެވެ.
ށ. ކޮމަންޑޫއަށް އަހަރެން ދިޔައީ ބެރު ގުރޫޕަކާ އެކުއެވެ. އަހަންނަށް ރިޔާ ފެނުނީ ޝޯ ދިން އެންމެ ފަހު ރެއެވެ. އޭނާ ހުރީ ތަންކޮޅެއް ދުރުގައެވެ. އެކަނިމާ އެކަންޏެވެ. އެ ވަގުތުން ފެށިގެން އަހަރެންގެ ނަޒަރު އެހެން ދިމާލަކަށް ނުދިޔައެވެ. އޭރު އަހަރެން ހުރީ ލަވަ، ނަގާ ކިޔާށެވެ. އެހެންވެ، މައިކް ދޫކޮށްފައި ދެވޭކަށް ނެތެވެ. އެގޮތަށް އޭނާއަށް ބަލަހައްޓައިގެން ހުއްޓާ، ލޯ މަތިން ރިޔާ ގެއްލިއްޖެއެވެ. އެ ހިސާބުން އަހަރެންގެ ހިތުގައި އާ ވިންދެއް ޖަހަން ފެށިކަން އަހަންނަށް އިހުސާސް ވިއެވެ. އޭނާ ހޯދަން ހިތުގައި އަޒުމް ކަނޑައެޅުނީ ވެސް ހަމަ އެ ރެޔެވެ.
ޖެހިގެން އައި ދުވަހަކީ އަހަރެމެން މާލެއަށް އަންނަން ފުރަން އޮތް ދުވަހެވެ. އަހަރެން ހުރީ އަންނަ ހިތަކުން ނޫނެވެ. އެ ދުވަހު ހިތް، ތެޅުނީ އާދައިގެ ގޮތަކަށް ވެސް ނޫނެވެ. ހިތުގައި ވަނީ ވޭނީ ރިހުމެއް އުފެދިފައެވެ. އަހަރެމެން ބަނދަރަށް ދިޔައިރު، އަހަރެމެންނަށް އަލްވަދާއު ކިޔަން ރަށުގެ ގިނަ އަދަދެއްގެ ބަޔަކު ތިއްބެވެ. ވަރުބަލި ކަމެއް ނެތި ތެޅެމުންދާ އަހަރެންގެ ހިތް އެދުނީ، ރިޔާ ހޯދުމަށެވެ. މޫނު އުފުލައިގެން ހުރެ އަހަރެން މަސައްކަތް ކުރީ އޭނާ ފެނޭތޯއެވެ. އެކި ދިމަ ދިމާލަށް އަހަރެން ބެލީމެވެ.
ތަންކޮޅެއް ދުރުގައި، ރުކެއް ދޮށުގައި ހުއްޓި ހުރި ރިޔާ ފެނި އަހަންނަށް އުފާވެރިކަން ލިބުނެވެ. ވަގުތުގެ ބޭނުން ހިފައި އަހަރެން އެ ދިމާލަށް ދުއްވައިގަތީ ހިތްހަމަޖެހުމާ އެކުއެވެ. އަހަރެން ގޮސް ރިޔާގެ ކުރިމަތީގައި ހުއްޓުމާ އެކު އޭނާގެ ތުންފަތް މައްޗަށް ވެސް ވެރި ކުރުވީ ލަދުރަކި ހިނިތުން ވުމެކެވެ. ކީއްވެކަން އަހަންނަށް އެނގުނެވެ.
ޖެހިޖެހިގެން ތިން ރޭ ޝޯ ދިން އިރު އަހަރެން އޮތީ އެ ރަށަށް މަޝްހޫރު ވެފައެވެ. ގިނަ އަންހެން ކުދިންގެ ހިތް ކަތިލައިފައެވެ. އެހެންވެ ރިޔާއަށް ވެސް އަހަރެން އެނގޭނެޔޭ ހިތަށް އެރިއެވެ.
އިރުގެ ރަން އަލިން އަހަންނަށް އެ ތުނިތުނި މޫނު ފެނުމުން އެހެން ދިމާލަކަށް ބަލައިލާ ހިތެއް ނުވިއެވެ. އިތުރަށް އޭނާ ބޭނުން ވިއެވެ.
އަހަރެން އެދުނީ ރިޔާގެ ނަންބަރު ދިނުމަށެވެ. ޖެހިލުމެއް ނެތި ރިޔާ ނަންބަރު ކިޔައިދިނެވެ. އަދި ރިޔާ ޖަހާފައި ސޭވް ކޮށްލުމަށް ވެސް އޭނާ އެދުނެވެ. ވަގުތުކޮޅު ކުޑަކަމުން އަހަންނަށް ވެސް ބުނެވުނީ ހަމަ އެކަނި އަހަރެންގެ ނަމެވެ. އެއް ލޯ މަރައިލަމުން އަހަރެން ދުރަށް ދުއްވައިގަތީ ގުޅާލާނެ ކަމަށް ބުނެއެވެ.
މާލެ އައީ އުފަލުން ފޮޅެމުންނެވެ. ގެއަށް އައިސް ވެސް އަހަރެން ބެލީ އަވަހަށް ކޮޓަރިއަށް ވަދެވޭތޯއެވެ. ކޮނޑުން ދަބަސް ނައްޓައި ނުލައި ފުރަތަމަ ވެސް ހޯދުނީ ފޯނުގައި ޖެހި ރިޔާގެ ނަންބަރެވެ. ހެވިފައި އިނދެ އެ ނަންބަރަށް ގުޅައިލީމެވެ. އެންމެ ރިންގަކުން ފޯނު ނަގައިފިއެވެ. އިވުނު އަޑުން އަހަންނަށް ފޯނު ކަނޑައިލެވުނެވެ. އިރުކޮޅަކު ވިސްނާލަން އިނުމަށްފަހު އަނެއްކާވެސް ގުޅީމެވެ. މި ފަހަރު ވެސް ފޯނު ނެގީ ހަމަ އެ ފިރިހެން މީހާއެވެ. ހަރު އަޑުން ކާކު ހޭ އެހިއެވެ. ބިރުން ހުރެ ރިޔާ އުޅޭތޯ ސުވާލު ކުރީމެވެ.
"ރިޔާ އޭ؟ ކަލޭ ތިއީ ކާކު؟" އެ މީހާގެ އަޑުން އަހަންނަށް ކަންފަތުން ފޯނު ދުރުކޮށްލެވުނެވެ.
ރިޔާގެ ރައްޓެއްސެކޭ ބުނީ އެއީ ރިޔާގެ ބައްޕައޭ ހިތައެވެ. ނަމަވެސް އަހަރެން އެހެން ބުނުމުން އޭނާގެ ރުޅިގަނޑު ފަޅައިގެން ދިޔަ ކަހަލައެވެ.
"ރައްޓެއްސެކޭ؟ ރިޔާ ހުރޭތަ ފިރިހެން ރައްޓެހިން ވެސް؟ ރިޔާ! ކަލޭ އާދެބަލަ،" އެ މީހާ ބާރަށް ގޮވިއެވެ.
ބިރުން އަހަރެން ކޮޅަށް ތެދުވީމެވެ. ހިތުގައި ސުވާލަކަށް ފަހު ސުވާލެއް އުފެދި، ހިތް ނުތަނަވަސް ވިއެވެ.
"ފިރިމީހާއަށް ނޭނގި ހިލޭ ފިރިހެނުންނަށް ނަންބަރު ދެނީ ކީއްވެ؟" އޭނާ ބުންޏެވެ.
އޭރު ވެސް އަހަރެން ފޯނު ކަނޑައެއް ނުލަމެވެ. ލިބުނު ކުއްލި ސިހުމައިގެން ހުރީއެވެ. ކުއްލިއަކަށް އިވުނީ ރިޔާގެ ގިސްލުމުގެ އަޑެވެ.
"އަހަރެން ރަށުން ބޭރުގައި އުޅޭ ވަގުތު ބަލާފައި ފިރިހެނުން ގެންގުޅެނީތަ؟ ހުރެބަލަ ނިކަން، ކުޅި ދައްކައިލާނަން،" އަނެއްކާވެސް އިވުނީ އޭނާގެ އަޑެވެ.
"ނޫން، ފައުޒީ ނޫން، އަހަންނަށް ތިހެން ނަހަދާ،" ރިޔާ ބާރަށް ރޯން ފެށި އަޑު އިވުނީ ދުރުންނެވެ.
ހަދާނެ ގޮތް ހުސްވެ، އަހަރެން ހުރީ އަޑު އަހާށެވެ. އިރުކޮޅަކުން ފޯނު ކެނޑުނީ އަހަރެންގެ ފޯނުން ކްރެޑިޓް ހަމަ ވެގެންނެވެ. ބޭއިހްތިޔާރުގައި އަހަންނަށް ފޯނު އެނދުމަށްޗަށް ހޫރައިލެވުނެވެ. ރިޔާ އަހަންނަށް އެ ދިނީ ކޮންކަހަލަ ސިގްނަލެއް ބާވައެވެ؟ އެއީ މީހެއްގެ އަނތްބެކެވެ. އެކަމަކު އެ ދުވަހު އޭނާގެ ހިނިތުންވުމުން އަހަންނަށް ސިފަވީ މުޅިން އެހެން ވާހަކަ އެކެވެ. ރިޔާ އަކަށް އަނިޔާވެރިޔަކު ހައްގެއް ނޫނެވެ. އަހަރެން އޭނާ ބޭނުން ވެއްޖެއެވެ. އިންތިހާއަށެވެ. ބުނެދޭން ނޭނގޭހާ ބޮޑަށެވެ.
ދެ ތިން ދުވަސް ތެރޭގައި އަހަރެން އެނބުރި އެ ރަށަށް ދިޔައީ ރިޔާ ހޯދުމުގެ މަގުސަދުގައެވެ. އަހަރެން ހުރީ ކުލީ ކޮޓަރި އެއްގައެވެ. ރިޔާގެ ނަންބަރަށް ގުޅުމުން، ރިޔާއަށް ލިބިދާނެ އަނިޔާތަކަށް ވެސް އަހަރެން ވިސްނީމެވެ. އެހެންވެ އޭނާ އުޅޭ ތަނެއް ހޯދުމަށް މުޅި ރަށް އަތް ފުނާ އެޅީމެވެ.
އަހަންނަށް އޭނާ ފެނުނީ ކެފޭ އެއްގެ ތެރެއިންނެވެ. އެއީ އެރަށުގައި ހޭދަ ކުރި ދެވަނަ ދުވަހެވެ. އޭނާގެ ކުރިމަތީގައި އިނީ ކަޅު، ބިޔަ ބޮޑު ފިރެހެނެކެވެ. ބަލާބެލުމަށް އެއީ އޭނާގެ ބައްޕަގެ އުމުރުގެ މީހެކެވެ. ލޮލުގެ ހިމަ ކޮޅުން ރިޔާ އަހަންނަށް ބަލަމުން ދިޔައެވެ. އަހަރެން ވެސް އޭނާއަށް ބެލީ އެހާމެ ވަގަށެވެ.
"އެތިބީ ހާދަ ނުގުޅޭ ޖޯޑެއް؟" އަހަންނާއެކު ކޮފީ ބޯން އިން އަމްޖޭ ގާތު އަހަރެން ސުވާލު ކުރީމެވެ. އަމްޖޭގެ ފަރާތުން މައުލޫމާތެއް ލިބޭނެ ކަމުގައި އުއްމީދުގައި އަހަރެން އިނީމެވެ.
އެއާއެކު އަމްޖޭ ފަހަތް ބަލައިލިއެވެ. އަދި ހިނިގަނޑެއް ޖަހާލަމުން ވާހަކަ ދައްކަން ފެށިއެވެ. އޭނާގެ ވާހަކައިން ރިޔާއަކީ އެ ރަށު ކުއްޖެއް ނޫންކަން އަހަންނަށް އެނގުނެވެ.
"ކިޔާ އަޑު އިވޭ ލާރިގަނޑެއް ދީގެން ގަނެލައިގެން ގެނައި މަންޖެއެކޯ އެއީ، އަބަދު ތަޅައިގަނެގެން އުޅޭނީ، ވަރެއްގެ ފިރިހެނެއް، ރިސޯޓެއްގައި އުޅޭނީ، ޗުއްޓީއަށް އަންނަ ކޮންމެ ފަހަރަކު އެ މަންޖެ މަރުކަޒުގައި އެޑްމިޓް ކުރަން ޖެހޭނެ،" ފޫހި ރާގަކަށް އަމްޖޭ ބުންޏެވެ.
އެ ދުވަހުން ފެށިގެން އަހަރެންގެ ހިތް އިތުރަށް ރިޔާ ބޭނުންވިއެވެ. އޭނާ ހާސިލް ކޮށްފައި ނޫނީ އެ ރަށުން ނުފައިބަން ހިތު ލީމެވެ. އެ ދުވަހު އަހަރެން ކޮޓަރިއަށް އައީ ރިޔާމެންގެ ފަހަތުން ސިއްރުން މުގޯލި އެޅުމަށް ފަހުއެވެ. އެ ގެ ހުންނަ ސަރަހައްދު ހޯދީ، ފަސޭހައިން ރިޔާއާ ބައްދަލް ވާނެ މަގެއް ކޮށުމަށެވެ. އިރުއިރުކޮޅުން އަހަރެން ރިޔާގެ ގޭގެ މަގުން ހިނގީމެވެ. އެ ފަދައިން އެއް ދުވަސް އެއްކޮށް ހޭދަ ކުރެވިއްޖެއެވެ. ރިޔާގެ ހަބަރެއް ނުވިއެވެ. މާޔޫސް ވާ ގޮތް ވި ނަމަވެސް އަހަރެން ހިތްވަރު އެލުވައެއް ނުލަމެވެ.
އިރާކޮޅުގެ ވަގުތެކެވެ. އާދައިގެ މަތިން އެރޭ ވެސް އަހަރެން މަސައްކަތް ކުރީ ރިޔާއާ ބައްދަލް ކުރެވޭތޯއެވެ. މަގު ކޮޅުގައި ހުއްޓައި ރިޔާގެ ފިރިމީހާ ނިކުތް ތަން ފެނުނެވެ. އޭނާ ގޮސް އޮބައިލައިފިއެވެ.
ޖެހިލުންވި ނަމަވެސް އަހަރެން ގޮސް ރިޔާގެ ގެއަށް ވަނީމެވެ. އެއާއެކު ސިޓިންރޫމުގައި އިން ރިޔާ ފުންމައިގެން ތެދުވެއްޖެއެވެ. އޭނާގެ މޫނުމަތީގައި ވަނީ ހާސްކަމެވެ. ނުތަނަވަސްކަމެވެ. ދެ ލޯ ބޮޑުކޮށްފައި ހުރެ އޭނާ އަވަސް އަވަހަށް އަތުގެ އިޝާރާތުން ދާށޭ ބުނެލިއެވެ. ނަމަވެސް އަހަރެން ހުރީ ހުރި ފިޔަވަޅު މަތީގައެވެ. އަހަންނާ ދިމާލަށް އައީ އޭނާއެވެ. ބޭއިހްތިޔާރުގައި އޭނާއަށް އަހަރެންގެ މޭގައި އަތް ޖައްސައިލެވުނީ ދުރަށް ކޮށްޕާލުމަށެވެ. އެއީ އަހަރެން އަވަހަށް އެ ގެއިން ނެރެވޭތޯއެވެ. ނަމަވެސް ހުޝިޔާރުވެ ހުރެ އަހަރެން އޭނާގެ މަޑު އަތްތިލައިގައި ހިފައި ފިތާލީމެވެ. އެވަގުތު ރިޔާ ހުއްޓުން އަރައިފިއެވެ. ފެންކަޅި ވެފައިވާ ލޮލަކުން އަހަންނަށް އޭނާ ބަލަމުން ދިޔައެވެ. އޭނާގެ ކަޅި ހުރީ ސީދާ އަހަރެންގެ ދެ ލޮލަށް އަމާޒު ވެފައެވެ.
"މިހިތުގައި ޖަހާ ވިންދު އިހްސާސް ކުރެވޭތަ؟" އަހަރެން އެހީމެވެ.
އެ ވަގުތު ރިޔާއަށް ބަލައިލެވުނީ އަހަރެންގެ މޭމަތީގައި އަތްކޮށްލެވިފައިވާ ރިޔާގެ އަތަށެވެ.
"ހިނގާ އަހަންނާއެކު ދާން،" އަހަރެން އެދުނީމެވެ.
ތެޅިގަނެފައި ރިޔާ އޭނާގެ އަތް އަހަރެންގެ އަތުގެ ތެރެއިން ދަމައިގަތެވެ. އަދި ދުރަށް ޖެހިލުމަށްފަހު ފުން ނޭވާތަކެއް ދޫކުރަން ފެށިއެވެ.
"އަހަންނަކީ މީހެއްގެ އަނތްބެކޭ، އެކަމަކު އަނިޔާވެރި ފިރިއެއްގެ ނިކަމެތި އަނތްބެއް، އަހަރެން މި ތަނުން ސަލާމަތްކޮށްދީ، އަހަރެން ގެންދޭ ޝާމް،" އޭރު އޭނާއަށް ރޮވިއްޖެއެވެ.
ރިޔާ ރޯ މަންޒަރު ބަލަން އަހަރެންގެ ހިތަކަށް ކުޅަދާނައެއް ނުވިއެވެ. ވަގުތު ބޭކާރު ނުކޮށް، އޭނާގެ އަތުގައި ހިފީމެވެ. ވަގުތަކީ ފައުޒީ އައިސް އެ ގެއަށް ވަތް ވަގުތެވެ. އަހަރެން ދިޔައީ ސިހިގެންނެވެ. އަހަންނަށް ވުރެ ބޮޑަށް ރިޔާ ހުރީ ބިރުންކަން އަހަންނަށް އެނގުނެވެ. އޭނާ މަޑުމަޑުން އަހަރެންގެ ފުރަގަހަށް ވަނެވެ. އަހަރެންގެ ހިމާޔަތް ލިބޭނެކަން އޭނާއަށް ޔަގީން ކުރެވުނީ ކަންނޭނގެއެވެ.
"އަހަންނަށް ހީވިޔޭ މި ސޮރު މިތާ މުގޯލި އަޅާ ވަރު ގިނަކަމުން ކޮންމެ ވެސް ކަންތައްގަނޑެއް އުޅެނީއޭ،" ފައުޒީ ބުނެލީ ހަމަޖެހިލަމުންނެވެ.
"އަހަރެން މި ދިޔައީ އެއްޗެއް ނޭނގިއެއް ނޫނޭ، އަހަންނަށް އެނގޭ ކަލޭ އަންނާނެކަން، ދެ ލޯ ބޮޑުކޮށްގެން މި ގެއާ ދިމާލަށް ބަލަމުން މިހެން ހިނގާ ތަން މަށަށް މި ފެންނަނީ އެންމެ ރެޔެއް ދެ ރެޔަކު ނޫނޭ،" ފައުޒީ ބުންޏެވެ. މަލާމާތުގެ ރާގަކަށެވެ.
އަހަރެންގެ ފުރަގަހުގައި ހުރި ރިޔާ، ބާރުބާރަށް އަހަރެންގެ ޓީޝާޓުގައި ހިފިއެވެ. އޭނާގެ އަވަސް ނޭވާގެ އަޑު އޭރު ވެސް އަހަންނަށް އިވެއެވެ. ފައުޒީ ހިނިގަނޑެއް ޖަހައިލަމުން ސަރަންފީގައި އިށީނެވެ. އޭނާ އަހަރެމެންނަކަށް ނުބަލައެވެ. ދުފާދަޅު ނަގައިގެން ދެފައި ތަޅުވަމުން ދުފަން ފެށީއެވެ. ބުނާނެ އެއްޗެއް ނޭނގޭ ހާލު އަހަރެން ހުރީއެވެ. ހަދާނެ ގޮތެއް ވެސް އަހަންނަކަށް ނުވިސްނުނެވެ. އެ ވަގުތު ފައުޒީގެ ފަރާތުން އަތުވެދާނެ ނުރައްކަލަކާމެދު ވިސްނަން ފެށުނެވެ.
އަހަންނަށް ސިހުން ލިބުނީ ކުއްލިއަކަށް އެ ގެއަށް އައިސް ވަތް ދެ ފުލުހުން ފެނުމުންނެވެ. ފައުޒީ އެ އައީ އަހަރެންގެ ވާހަކަ ފުލުހުންނަށް ރިޕޯޓު ކޮށްފައިކަން އެ ވަގުތު އަހަންނަށް އެނގުނެވެ. ނުތަނަވަސް ކަމާއެކު އަހަންނަށް ބަލައިލެވުނީ ރިޔާގެ މޫނަށެވެ.
"ޝާމް ދިޔައީމަ، ދެން މިގެއިން ނެރެން ޖެހޭނީ އަހަރެންގެ ފުރާނަ ނެތް މަސްގަނޑު ކަންނޭނގެ، އޭނަ މިރޭ އަހަރެން މަރައިލާނެ،" ރޮއިގަންނަމުން ރިޔާ ބުންޏެވެ.
ފުލުހެއްގެ ފައި ބުޑަށް ތިރިވެ، ރިޔާ ބާރަށް ރޮއިގަތެވެ. އަދި ފައުޒީގެ އަނިޔާވެރިކަމުގެ ވާހަކަ ތަކުރާރުކޮށް ކިޔައިދެމުން ދިޔައެވެ. އޭނާ އެ ގޭގައި ހުރެއްޖެ ނަމަ މިރޭ ކަންތައް ވާނެ ގޮތް ލަފާ ކޮށްފައި ކިޔަމުން ދިޔައެވެ. ނަމަވެސް ފުލުހުން ރިޔާ އަކަށް އެއްވެސް ސަމާލު ކަމެއް ނުދިނެވެ. އަހަރެން ގޮވައިގެން ދާން ހިނގައިގަތީއެވެ.
ކުއްލިއަކަށް ކަންފަތުގައި ޖެހުނު އަޑުން އަހަރެމެންނަށް ފަހަތް ބަލައިލެވުނީ އެއްފަހަރާއެވެ. އެ ވަގުތު އަހަންނަށް ވެސް ލިބުނީ ކުއްލި ސިހުމެކެވެ. އަހަރެން ދުއްވައިގަތީ ރިޔާގެ ހަށިގަނޑު ނިވާ ކޮށްދޭށެވެ. ލައިގެން ހުރި ޓީޝާޓް ބޭލުމަށްފަހު އޭނާގެ ގައިގައި އޮޅައިލީމެވެ. ރިޔާ އިރާލީ، އޭނާ ލައިގެން ހުރި ހެދުމެވެ. ގައިގައި ހުރި ލަކުނުތަކާއި ފިއްސާފައި ހުރި، ތަންތަން ދެއްކީއެވެ. އޭރު އޭނާ ހުރީ ހުއްޓުން އަރައިފައެވެ. ލަދަށް ވުރެ ބޮޑަށް އޭނާ ހުރީ ފައުޒީ ދެކެ ބިރުގެންފައެވެ.
"ކުށް ކުރާ މީހާ ކުށްވެރި ވެގެން ގެންދާއިރު، އަނިޔާ ލިބޭ މީހާ ސަލާމަތް ކުރުމެއް ނޯވޭތަ؟" ފުލުހުން ގާތު އަހަރެން އެހީމެވެ.
ފުލުހުންގެ ތެރެއިން އެކަކު އަހަރެމެން ގާތު މަޑު ކުރުމަށްފަހު، އަނެކަކު ނިކުތީ ބޭރަށެވެ. އޭރު ފައުޒީ ތެދުވެއްޖެއެވެ. އެ ވަގުތު ކޮންމެވެސް ވަރަކަށް އޭނާގެ މޫނު މަތިން ނުތަނަވަސްކަން ފެންނަން ފެށިއެވެ.
އެރޭ އަހަރެމެން ތިން މީހުން ވެސް ފުލުސް އިދާރާއަށް ގެންދިޔައެވެ. އެ މީހުން އަހަންނާ ރިޔާ ދޫކޮށްލި ކަމީ އަހަރެމެންނަށް ލިބުނު ވަރަށް ބޮޑު އުފަލެކެވެ. އަހަރެން ސަލާމަތް ވީ ރިޔާގެ ސަބަބުންނެވެ. ރިޔާ ދިން ހެކި ބަހަށް ބަލައިފައެވެ.
ހަމަ އެރޭ އަހަރެން ރިޔާ ގޮވައިގެން މާލެ އައީމެވެ. އަހަންނަކީ ވަކިން އެޕާޓްމަންޓެއްގައި އުޅޭ މީހެއް ކަމުން އެއްވެސް ކަމެއް މަނާ ކުރާނެ މީހަކު އެތަނަކު ނޫޅެއެވެ. ބަންދުކޮށްފައި އިން ދޫންޏެއް ކޮށިން މިނިވަން ކުރެވުނު ކަމުގެ އުފާވެރިކަން އަހަންނަށް އޭރު ލިބިއްޖެއެވެ.
"މިނިވަން ކުރީމަ ދޫނި އުދުހިގެން އެ ސޮރު ބޭނުންވާ ދިމާލަކަށް ދާނެ، އަހަރެން ވެސް މި އޮތީ އަހަރެންގެ މަންޒިލްގައި،" އަހަރެންގެ ގައިގައި ބައްދާލައިގެން އޮވެ، ރިޔާ ބުންޏެވެ.
"ތި ދޫނި ފުރަތަމަ ފެނުނު ރޭ ވެސް އޮޅު ކުރަން އަޒުމް ކަނޑަ އެޅީމޭ،" އަހަރެން ބުނީމެވެ.
ކޯޓު މެދުވެރިކޮށް ރިޔާގެ ވަރީގެ ކަންކަން ހަމަޖެހި، އިއްދައިގެ ދުވަސްތައް ހަމަވުމުން އަހަރެން އޭނާއާ ކައިވެނި ކުރީމެވެ. އަހަރެމެންގެ އުފާވެރި ދިރިއުޅުން ފެށުނީ އެހިސާބުންނެވެ.
"އަހަރެންގެ މޫނުމަތި މިހާ ރީތިކޮށް ހުއްޓަސް، މުޅި ގައިގައި މި ހުރި ލަކުނުތަކުން އަހަރެން ދެކެ ފޫއްސެއް ނުވޭތަ؟" ރިޔާ އެހެން އެހި ދުވަހަކީ އަހަރެން އެންމެ ދެރަވި ދުވަހެވެ. އެ އަޑުގައިވާ މޮޅިވެރި ކަމަށް ވުރެ އަހަރެންގެ ހިތް މާ ބޮޑަށް މިލައިފިއެވެ.
"އަހަރެން ލޯބި ވީ ރިޔާދެކެ. ތިއީ ކާކުކަން ވެސް ނޭނގި. ލޯތްބަކީ ނޭނގި ވެވޭ އެއްޗެއް، ލޯބި ވުމަށްފަހު. އެއީ ފަސޭހައިން ހަނދާން ނައްތާލެވޭނެ އެއްޗެއް ނޫން. ތި ހަށިގަނޑުގައި ހުރި ލަކުނުތަކުން އިތުރަށް އަހަރެންގެ ލޯބި ވަރުގަދަ ވޭ. އެނގޭތަ އެއީ ކީއްވެކަން؟" ރިޔާގެ ނިތްކުރިއަށް ބޮސްދެމުން އަހަރެން އެހީ، ރިޔާއަށް އަހަރެން އޭނާ ދެކެ ވާ ލޯބި އިތުރަށް ހާމަ ކޮށްދޭށެވެ.
"އެއީ، އަނިޔާ ލިބިލިބި ކޮއްޓެއްގައި އިން ދޫންޏަކަށް ހިމާޔަތް ދެވުނުކަން އެނގުނީމަ. ތި ދޫންޏަށް ލޯތްބާއި އަޅައިލުން ބޭނުން ވާކަން އެނގޭތީ. އަދި އެކަމުން އަހަންނަށް އިތުރަށް ވެސް ހަމްދަރުދީ ވެވޭ. ރިޔާ، އަހަރެން ރިޔާ ދެކެ ވާ ލޯތްބަށް އިންސާފު ކުރަން ނޫޅެއްޗޭ. ދުވަހަކު ވެސް އެކަމެއް ނުވާނެ،" ރިޔާގެ ކަނދުރާގައި އަހަރެން މޫނު ޖައްސާލީމެވެ. އެވަގުތު އޭނާގެ ދެ އަތުން އަހަރެން ވަށާލިއެވެ.
"ނިދުނީތަ؟" ވަރުބަލިކަމާއެކު ލޯ ހުޅުވާލެވުނީ އަހަރެންގެ ބަނޑުގައި ރިޔާ ބޯ އަޅައިލުމުންނެވެ. ފެންވަރައިގެން ނިކުތް ގޮތަށް އޭރު ވެސް އޭނާ އޮތީ ގައިގައި ތުވާލި އޮޅައިގެންނެވެ.
"ނޫން... ތިހެން އޮންނަންޏާ އަހަރެން ކިހިނެއް ނިދި އަންނާނީ؟ ނިދި ފިލައިފި،" އަލިފާން ޖައްސައި، ފިއްސާފައިވާ ރިޔާގެ ކޮނޑުގައި ހުރި ލަކުނެއްގައި އަހަރެން މަޑުމަޑުން އިނގިލި ޖައްސައިލީމެވެ.
"އެހެންތަ؟ އަދިވެސް ނިންދަވައި ދީފާނަމޭ،" ރިޔާ ބުންޏެވެ.
އޭނާގެ މަސްތީ އަޑުން ވެސް އަހަރެންގެ ލޮލަށް ނިދި ސަވާރު ވާ ވަރުވެއެވެ. އޭނާގެ ހިމަ،ދިގު އިނގިލިތަކުން އަހަރެންގެ ކަނދުރާގައި ކުޅެމުން ދިޔައެވެ.
"ހިތަށް އަރާ ފުށްގަނޑެއް ކަހަލަ ލޯބި ދޫންޏެއް ލިބުނީމަ ވެސް ފައުޒީއަށް ނޭނގުނޭ ލޯބިން ގެންގުޅެން،" އަހަރެން ބުނީމެވެ.
އެވަގުތު ރިޔާ އަހަރެންގެ މޭގައި ވިކައިލިއެވެ. އަދި ބާރު ބާރަށް ހޭން ފެށިއެވެ. އަހަންނަށްވެސް ހެވިއްޖެއެވެ. އަދި ރިޔާގެ އުނަގަނޑުގައި ހިފައި ދަމާފައި ގެނެސް އަހަންނާ ގާތް ކޮށްލީމެވެ.
"ވަރަށް ލޯބިވޭ،" އަހަރެންގެ ކަންފަތުގައި ދަތް އަޅަމުން ރިޔާ ބުންޏެވެ. އަހަންނަށް ތެޅި ގަނެވުނެވެ. އަދި ފަހަތަށް އަތް ގެންގޮސް ދިއްލައިފައި ހުރި ބޮކި ނިއްވާލީމެވެ. އެވަގުތު ރިޔާގެ ހުނުމުގެ އަޑުން މުޅި ކޮޓަރި އެއް އަޑު ކުރުވައިފިއެވެ. އެއީ މި ދުނިޔެ އިން އަހަރެން އެންމެ އަހާ ހިތްވާ އަޑެވެ.
ނިމުނީ