03 މާޗް 2024 - 23:51
ރާއްޖޭގެ ކަނޑުގެ ހައިޑްރޮގްރަފީ ސާވޭ އަމިއްލަ އަށް ހެދުމަށް އެކަމަށް ބޭނުންވާ ވަސީލަތްތަކާއި މެޝިންތައް ހޯދުމުގެ މަސައްކަތް ސަރުކާރުން ކުރަމުންދާ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
އޭދަފުށީގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ ރާއްޖެ އިން އަމިއްލަ އަށް ހައިޑްރޮގްރަފީ ސާވޭ ހެދުމަށް ވަސީލަތްތައް ހޯދުމުގެ މަސައްކަތް ޑިފެންސް މިނިސްޓްރީން ކުރަމުންދާ ކަމަށާއި އޭރަށް ރާއްޖޭގެ ކަނޑުގެ ސާވޭ ކުރާނީ ދިވެހިން އަމިއްލައަށް ކަމަށެވެ.
"އަޅުގަނޑުމެން ދެން އަމިއްލައަށް ކަނޑު އަޑީގެ ހުރިހާ ތަފްސީލެއް ހޯދާނީ. ހޯދައިގެން އަޅުގަނޑުމެން އަމިއްލައަށް ޗާޓްތައް ހާދާނީ. އެއީ އަޅުގަނޑުމެން މި ކުރާ މަސައްކަތަކީ،" ރައީސް ވިދާޅުވި އެވެ.
ރާއްޖޭގެ ކަނޑުގެ ސާވޭތައް ކުރުމަށް އިންޑިއާއާ ދެމެދު ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި އެއްބަސްވުމެއް ހެދި އެވެ. އެ އެއްބަސްވުން އާ ނުކުރަން މި ސަރުކާރުން ވަނީ ވެރިކަމުގެ ވަރަށް ކުރީކޮޅު ނިންމައިފަ އެވެ.
"އަޅުގަނޑުމެންގެ ކަނޑު އަޑި ސްކޭންކޮށްގެން ހުރިހާ މަންޒަރުތަކާއި ތަފްސީލްތަކެއް އިންޑިއާ ސަރުކާރާ އެކު ހަދާފައި އޮތް އެއްބަސްވުން އާ ނުކުރަން އަޅުގަނޑުމެން ނިންމީ. އެއީ އަޅުގަނޑުމެންގެ ތަރިކަ މުދާ ކަނޑު އަޑީގެ ހުރިހާ ތަފްސީލަކީ. އެ ހުރިހާ ތަފްސީލެއް އެ ބޭފުޅުންނަށް ލިބޭ ގޮތަށް ސްކޭން ހަދައިގެން މެޕް ހަދައިގެން ގެންގޮސް އަދި އަޅުގަނޑުމެން ގަންނަން ވެސް ޖެހެނީ އެ ބޭފުޅުންގެ އަތުން،" ރައީސް ވިދާޅުވި އެވެ.
މި އެއްބަސްވުމަކީ ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރަށް ފާޑުކިޔުން ވަރަށް ބޮޑަށް އަމާޒުވި އެއްބަސްވުމެއް ކަމަށް ވިޔަސް، އޭރުގެ ސަރުކާރުން ބުނަމުން ދިޔައީ މިއީ ކުރީގެ ސަރުކާރުތަކުން ވެފައިވާ އެއްބަސްވުންތަކެއްގެ ދަށުން ކުރާ މަސައްކަތެއް ކަމަށެވެ.
އިންޑިއާގެ ހައިޑްރޮގްރަފިކް އޮފީހާ ގުޅިގެން ރާއްޖޭގައި ހައިޑްރޮގްރަފީ ސާވޭއެއް ހެދުމުގެ މަސައްކަތް ފަހުން ފެށީ ޖެނުއަރީ 2021 ގަ އެވެ. އަދި މިހާރުވެސް އެކި ބައިތަކަށް ބަހާލައިގެން އަންނަނީ މި މަސައްކަތް ކުރަމުންނެވެ. ސާވޭ ފެށުމާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމުގައި ފޮރިން މިނިސްޓްރީގެ ޖޮއިންޓް ސެކްރެޓަރީ މިދްފާ ނައީމް ވިދާޅުވީ އިންޑިއާގެ ބޮޑުވަޒީރު ނަރެންދުރާ މޯދީ 2019 ވަނަ އަހަރު ރާއްޖެއަށް ވަޑައިގެން ސޮއިކުރެއްވި އެއްބަސްވުންތަކުގެ ތެރޭގައި މި މަސައްކަތް ހިމެނޭ ކަމަށެވެ.
މި މަސައްކަތުން ގައުމީ ސަލާމަތަށް ނުރައްކާވެދާނެތޯ ކުރި ސުވާލުތަކަށް އެމްއެންޑީއެފުން އޭރު ބުނީ ގައުމީ ސަލާމަތަށް އެއްވެސް ނުރައްކަލެއް ކުރިމަތި ނުވާނެ ކަމަށާއި މިއީ އަތޮޅުތެރޭގެ ފަރުތައް ހުރިގޮތް ދެނެގަންނަން ކުރާ މަސައްކަތެއް ކަމަށެވެ. އަދި މިކަމުގެ ސަބަބުން ފައިދާ ވާނީ ދިވެހި ދަތުރުވެރިންނަށް ކަމަށް ވެސް ބުންޏެވެ.
މިދިޔަ ސަރުކާރުން ރައީސް ވަނީ ހައިޑްރޮގްރަފިކް ސާވިސް އުފައްދައި އެ އިދާރާ ޑިފެންސް މިނިސްޓްރީގެ ދަށަށް ގެންދަން ރައްޔިތުންގެ މަޖިލީހުގެ ރުހުން ހޯއްދަވައިފަ އެވެ. މިގޮތަށް މަޖިލީހުން ފާސްކުރި އިރު އެކަމާ ގުޅޭ ގޮތުން ސަރުކާރުން އިންޑިއާއާ އެކު ހަދާފައިވާ އެއްބަސްވުމުގައި ގައުމީ ސަލާމަތަށް ނުރައްކާވާ ފަދަ ކަންކަން ހުރި ކަމަށް އިދިކޮޅު ފަރާތްތަކުން ތުހުމަތުކޮށް މަޖިލީހުން ވަނީ އެ އެއްބަސްވުން މަޖިލީހުގެ 241 ކޮމިޓީ އަށް ގެނެސް ދިރާސާ ވެސް ކޮށްފަ އެވެ.
ޑިފެންސް މިނިސްޓްރީން އޭރު ބުނީ އެ ސާވޭގެ ސަބަބުން ތިމާވެށި ރައްކާތެރި ކުރުމުގެ މަސައްކަތްތަކަށް އެހީއަކަށް ވާނެ ކަމަށާއި ދޯނި ފަރަށް އެރުން ފަދަ ކަންކަން މަދުކުރުމާއި އެންމެ ރަނގަޅު ރޫޓް ކަނޑައެޅުން ފަދަ ކަންކަން ކުރެވޭނެ ކަމަށެވެ.