15 ފެބުރުއަރީ 2024 - 17:01
ދުނިޔޭގެ އެންމެ ބޮޑު އިގްތިސާދުތަކުގެ ގޮތުގައި އޮތް ޖަޕާނާއި އިނގިރޭސިވިލާތުގެ އިގްތިސާދު ރިސެޝަނަށް ހިނގައްޖެ އެވެ.
ބޭރުގެ މީޑިއާތަކުގައި ރިޕޯޓުކޮށްފައިވާ ގޮތުން އިނގިރޭސިވިލާތުގެ އިގްތިސާދު މިދިޔަ އަހަރުގެ ފަހު ކުއާޓާގައި އެ ގައުމުގެ އުފެއްދުންތެރިކަން 0.3 ޕަސެންޓަށް ދަށަށް ގޮސްފައިވެ އެވެ. މިދިޔަ އަހަރުގެ ފަހު ތިން މަހުގެ ތެރެއިން ކޮންމެ މަހަކު އިގްތިސާދު ވަނީ 0.1 ޕަސެންޓަށް ދަށަށް ގޮސްފަ އެވެ.
އިގްތިސާދެއް ރިސެޝަނަށް ދިޔަކަމަށް ބަލަނީ ޖެހިގެން ދެ ކުއާޓާގައި ގައުމެއްގެ އުފެއްދުންތެރިކަން ދަށަށް ދިއުމުންނެވެ.
އިނގިރޭސިވިލާތުގެ އިގްތިސާދުގެ އިތުރުން ޖަޕާނުގެ އިގްތިސާދު ވެސް މިދިޔަ އަހަރުގެ ފަހު ދެ ކުއާޓާގައި ވަނީ ދަށަށް ގޮސްފަ އެވެ. މިދިޔަ އަހަރުގެ ސެޕްޓެމްބަރު މަހު އެ ގައުމުގެ އިގްތިސާދު 2.9 ޕަސެންޓަށް ވެއްޓުނު އިރު ޑިސެމްބަރު މަހު ވަނީ އިގްތިސާދު ކުރިއަރާ މިންވަރު 0.4 ޕަސެންޓަށް ދަށަށް ގޮސްފަ އެވެ.
ޖަޕާނުގެ އިގްތިސާދު 4.2 ޓްރިލިއަން ޑޮލަރުގައި ހުރި އިރު އެ ގައުމު ވަނީ ދުނިޔޭގެ އެންމެ ބޮޑު އިގްތިސާދުގެ ލިސްޓުގެ ފަހަތަށް ވެއްޓިފަ އެވެ. ކުރިން އެ ގައުމު އޮތީ ތިން ވަނަ އަށް ބޮޑު އިގްތިސާދުގެ ގޮތުގަ އެވެ. އެހެން ނަމަވެސް އެ ލިސްޓުގެ ހަތަރު ވަނައަށް މިހާރު ވަނީ ވެއްޓިފަ އެވެ.
ދުނިޔޭގެ އެންމެ ބޮޑު އިގްތިސާދުގެ ގޮތުގައި މިވަގުތު އޮތީ އެމެރިކާ އެވެ. އެ ގައުމުގެ އުފެއްދުންތެރިކަން 27 ޓްރިލިއަން ޑޮލަރަށް އަރަ އެވެ. އަދި ދެވަނައިގައި އޮތް ޗައިނާގެ އުފެއްދުންތެރިކަން ހުރީ 17.5 ޓްރިލިއަން ޑޮލަރުގަ އެވެ. ޖަރުމަނުވިލާތުގެ އުފެއްދުންތެރިކަން ހުރީ 4.5 ޓްރިލިއަން ޑޮލަރުގަ އެވެ.