12 ފެބުރުއަރީ 2024 - 15:41
ރައްޔިތުންގެ މަޖިލީހުގެ ހަތަރު ދާއިރާއަކަށް ވާދަނުކުރަން އިދިކޮޅު ޕާޓީ، އެމްޑީޕީން ނިންމައިފި އެވެ.
އެ ޕާޓީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބްރޭ) މިއަދު ވިދާޅުވީ މަޖިލީހުގެ 93 ދާއިރާގެ ތެރެއިން އެމްޑީޕީން ވާދަކުރާނީ 89 ދާއިރާއަކަށް ކަމަށެވެ. އެމްޑީޕީން ވާދަނުކުރަން ނިންމީ؛
- ވ. ފުލިދޫ ދާއިރާ
- ތ. ގުރައިދޫ ދާއިރާ
- ފ. ނިލަންދޫ ދާއިރާ
- ފުވައްމުލަކު އުތުރު ދާއިރާ
އިބްރޭ ވިދާޅުވީ ވާދަނުކުރަން ނިންމި ދާއިރާތަކުގައި ވެސް، އަމިއްލަ ގޮތުން ވާދަކުރާ ކެންޑިޑޭޓުންނަށް އެމްޑީޕީން ތާއިދުކުރުމުގެ ވިސްނުން އެބަހުރި ކަމަށެވެ. ނަމަވެސް، އެކަމާ މެދު ޕާޓީން ރަސްމީކޮށް ގޮތެއް އަދި ގޮތެއް ނުނިންމަ އެވެ.
އެ ޕާޓީން ކުރިން ބުނީ، ޕްރައިމަރީއަށް ހުޅުވާލިއިރު ވެސް އެއްވެސް ކެންޑިޑޭޓަކު ކުރިމަތިނުލަނީ ނިލަންދު އާއި އޭދަފުށީ ދާއިރާއަށް ކަމަށެވެ. ޕްރައިމަރީއަކާ ނުލައި 51 ކެންޑިޑޭޓަކަށް ޓިކެޓު ދީފައިވާއިރު، މި މަހުގެ ތިން ވަނަ ދުވަހު ވެސް ބޭއްވީ 40 ދާއިރާއެއްގެ ޕްރައިމަރީ އެވެ.
އެކަމަކު، އޭދަފުށީ ދާއިރާއަށް އަމިއްލަ ގޮތުން ވާދަކުރާ ކެންޑިޑޭޓަކު މި ފަހުން އެމްޑީޕީއަށް ސޮއިކުރުމުން އޭނާއަށް ޕާޓީގެ ޓިކެޓު ދީފައިވެ އެވެ.
ފުވައްމުލަކު އުތުރު ދާއިރާއަށް ވެސް އެމްޑީޕީގެ ޓިކެޓު އެހެން ބޭފުޅަކަށް ދޭން ނިންމި އެވެ. އިންތިހާބަށް ކަނޑައެޅި ވިލަރެސް ކޮމިޓީން ވަނީ، އެ ޕާޓީގެ ކެންޑިޑޭޓަށް ވުރެ އަމިއްލަ ގޮތުން ވާދަކުރާ ކެންޑިޑޭޓަށް ތާއިދުކުރާނަމަ މޮޅުވުމުގެ ފުރުސަތު އޮތް ކަމަށް ލަފާ ދީފަ އެވެ. އެހެންވެ، ފަހުން ނިންމީ، އެ ދާއިރާއަށް އަމިއްލަ ގޮތުން ވާދަކުރާ ކެންޑިޑޭޓަށް ތާއިދުކުރާށެވެ.