06 ފެބުރުއަރީ 2024 - 05:53
ރައްޔިތުންގެ މަޖިލިހަށް ރައީސް ޑރ. މުހައްމަދު މުއިއްޒު އިއްޔެ އިއްވެވި ރިޔާސީ ބަޔާނަކީ މިހާތަނަށް ރާއްޖޭގެ ރައީސަކު އިއްވެވި އެފަދަ އެންމެ ފުރިހަމަ ބަޔާން ކަމަށާއި އެހެން ކަމަށް ވާއިރު މަޖިލީހުގެ މެންބަރުންތަކެއް އެ ޖަލްސާ ބޮއިކޮޓް ކުރެއްވުމަކީ ރައްޔިތުންނަށް ކުރި ފުރައްސާރައަކަށް ނުވޭތޯ ވިދާޅުވެ، މާމިގިލީ ދާއިރާގެ މެމްބަރު ގާސިމް އިބްރާހިމް ރޭ ސުވާލު އުފައްދަވައިފި އެވެ.
ޖުމްހޫރީ ޕާޓީގެ ލީޑަރުކަން ވެސް ކުރައްވާ ގާސިމް އެކްސްގައި ކުރެއްވި ޕޯސްޓެއްގައި ވިދާޅުވީ ޝައްކެތް ނެތް ގޮތުގައި މިހާތަނަށް ރާއްޖޭގެ ރައީސަކު، ރައްޔިތުންގެ މަޖިލީހުގެ ޖަލްސާއެއްގައި ރައްޔިތުންނަށް އިއްވެވި އެންމެ ތަފުސީލީ، އެންމެ ފުރިހަމަ ރިޔާސީ ބަޔާނަކީ ރައީސް ޑރ. މުއިއްޒު އިއްޔެ ރައްޔިތުންގެ މަޖިލިހަށް އިއްވެވި އެ މަނިކުފާނުގެ ފުރަތަމަ ރިޔާސީ ބަޔާން ކަމަށެވެ.
އެހެންވެ، ރައީސް ޑރ. މުއިއްޒަށް ތަހުނިޔާ އާއި މުބާރިކްބާދީ އަރިސްކޮށް، މާމިގިލި ދާއިރާގެ މެންބަރުގެ ހައިސިއްޔަތުން ނުހަނު ޝުކުރު އަދާކުރައްވާ ކަމަށް ވެސް ގާސިމް ވިދާޅުވި އެވެ.
ގާސިމް ވިދާޅުވީ ގައުމުގެ އިއްޔެ އާއި މިއަދުގެ ހާލަތާ އެކު، މާދަމާ އަށް ކުރާ އުންމީދުތަކާއި ހޯއްދަވާނޭ ހައްލުތައް ރައީސް ޑރ. މުއިއްޒު ވިދާޅުވެ ދެއްވީ ނުހަނު އުއްމީދުން ފުރިގެންވާ ގޮތުގައި ކަމަށެވެ.
"ދިވެހި ގައުމު ހިންގުމުގެ އެންމެހާ ކަންކަން ޝާމިލްވާނޭހެން ތަފާސްހިސާބާއި ދިރާސާއާ އެކު ގާނޫނުއަސާސީގެ 84 ވަނަ މާއްދާގައި ބަޔާންކުރާ ރިޔާސީ ބަޔާން ރާއްޖޭގެ އިއްޒަތްތެރި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއްވަވައި ދެއްވި، މަޖިލީހުގެ ޖަލްސާ ރައްޔިތުންގެ މަންދޫބުންގެ ގޮތުގައި 19 ވަނަ މަޖިލީހުގައި ހިމެނިވަޑައިގަންނަވާ މެންބަރުންތަކެއް ބޮއިކެޓް ކުރެއްވުމަކީ ރައްޔިތުންނަށް ކުރި ފުރައްސާރަ އަކަށް ނުވޭތޯ އެވެ؟،" ގާސިމް ވިދާޅުވި އެވެ.
އިއްޔެގެ ރިޔާސީ ބަޔާން އިއްވުމުގެ ކުރިން، އިދިކޮޅު އެމްޑީޕީ އާއި ޑިމޮކްރެޓްސް އިން ވަނީ އެ ޖަލްސާ ބޮއިކޮޓްކުރަން ނިންމައި އެކަން އިއުލާންކޮށްފަ އެވެ.
ރައްޔިތުންގެ މަޖިލިހުގެ ބޮޑު ކޮންޓްރޯލެއް އޮންނަނީ އިދިކޮޅު ދެ ޕާޓީގެ އަތުގަ އެވެ. އެހެންވެ، މި އަހަރުގެ ރިޔާސީ ބަޔާން އިއްވެވި ޖަލްސާ އަށް ވަޑައިގަތީ ސަރުކާރަށް ތާއީދުކުރައްވާ މެމްބަރުން އެކަންޏެވެ. ޖަލްސާ ފައްޓަވަމުން ރިޔާސަތުން މަޖިލިހުގެ ރައީސް މުހައްމަދު އަސްލަމް އިއްޔެ ވިދާޅުވީ އޭރު ޖަލްސާގައި ތިއްބެވީ 24 މެމްބަރުން ކަމަށެވެ.