14 ފެބުރުއަރީ 2017 - 06:17
ފިލްމީ ދާއިރާގައި މިހާރު ތިބި ޒުވާން ބަތަލާއިންނަށް ބަލާ އިރު، އެންމެ އުންމީދީ އެއް ބަތަލާއަކީ ފާތުމަތު އާޒިފާ (އަޒޫ) އެވެ. މިހާތަނަށް ކުޅުނު ވީޑިއޯ ލަވަތަކުންނާއި ފިލްމުތަކުން ބެލުންތެރިންގެ ތަރުހީބު ވަރަށް ބޮޑަށް ހޯދާފައިވެ އެވެ.
ފިލްީ ދާއިރާގައި މިހާރު ތިބި އެންމެ ރީތި ބަތަލާއިންގެ ތެރެއިން ވެސް އަޒޫއަކީ ގިނަ ބަޔަކު ވަރަށް ފާހަގަކުރާ ބަތަލާއެކެވެ.
އަހަރުގެ ފުރަތަމަ ފިލްމް މިހާރު މިއޮތީ ސްކްރީނަށް އައުމުގެ މަގުމަތީގަ އެވެ. އެއީ މާޗް 2 ގައި ރިލީޒްކުރާ "މަލިކާ" އެވެ. މި ފިލްމުގެ އެންމެ މުހިއްމު އެއް ބަތަލާއަކީ ވެސް އަޒޫ އެވެ. މި ފިލްމުން އޭނާ ފެނިގެން ދާނީ މީގެ ކުރިން ނުފެންނަ ކަހަލަ ރޯލަކުންނެވެ.
އެކަމަކު އަޒޫ ދޭ ޔަގީން ކަމަކީ "މަލިކާ" ބެލުންތެރިންނަށް ވަރަށް ކަމުދާނެ ކަމެވެ. މިއީ އާއިލީ ކަންތައްގަނޑެއް ދައްކުވައިދޭ ވަރަށް އަސަރު ގަދަ ފިލްމެކެވެ.
އަޒޫ ބުނަނީ "މަލިކާ" އަކީ ތަފާތު ރަހަތަކުގެ ފިލްމްތައް މިހާރު އަންނަ ދިވެހި ސިނަމާގައި އަނެއްކާ ވެސް ބެލުންތެރިން ރޮއްވައިލާ ކަހަލަ ފިލްމަކަށް ވާނެ ކަމަށެވެ. މި ފިލްމް އޭނާއަށް ވެސް ވަރަށް ހާއްސަ އެވެ.
"ފުރަތަމަ ފަހަރަށް ނެގަޓިވް ރޯލެއް މަލިކާގައި ކުޅެފައި އިންނާނީ. މީގެ ކުރިން އަޒޫ ފެނިފައި ހުންނާނީ ތަންކޮޅެއް މަޑުމައިތިރި، ސާދާ އަންހެން ކުއްޖެއްގެ ރޯލްތަކުން،" މިދިޔަ އަހަރު ބޭއްވި ހަތް ވަނަ ގައުމީ ފިލްމް ފެސްޓިވަލްގައި "ލޫދިފާ" އިން އެންމެ މޮޅު ސަޕޯޓިން އެކްޓްރެސްގެ އެވޯޑް ހޯދި ބަތަލާ ބުންޏެވެ. "ވަރަށް ހިތްހަމަޖެހޭ ކުޅެފައި އިން ރޯލާ ދޭތެރޭ. ގައިމު ވެސް އަޒޫގެ މެކްސިމަމް ދީފައި ހުންނާނެ."
"އާދޭސް" އާއި "24 ގަޑި އިރު" އަދި "ރާނީ" ފަދަ ފިލްމްތައް ކުޅެފައިވާ އަޒޫ ބުނީ "މަލިކާ" ގައި އޭނާ ފެންނަލެއް ވެސް ވަރަށް ތަފާތު ވާނެ ކަމަށެވެ.
"މީގެ އެއް ތަފާތަކަށް ވާނެ އަޒޫ ފިލްމުން ފެނިގެންދާ ލުކްސް ވެސް. އެހެންވީމަ އަޒޫގެ ފޭނުންނަށް އެއީ ތަފާތަކަށް ވާނެ ޔަގީނުން ވެސް،" މިދިޔަ އަހަރު ރިލީޒް ކުރި "ބައިވެރިޔާ" ގެ ހާއްސަ ފެނިލުމަކުން ފެނުނު ބަތަލާ ބުންޏެވެ. "ވަރަށް ވަރުގަދަ ޓީމަކާ އެކު ކުރެވުނު މަސައްކަތެއް މިއީ. ވަރަށް ހިތްހަމަޖެހޭ ފިލްމެއް މަލިކާއަކީ."
"މަލިކާ" ގެ އިތުރުން، މި އަހަރަކީ އަޒޫގެ ފެނިލުންތައް ގިނަ އަހަރަކަށް ވާނެ އެވެ. އަމްޖަދު އިބްރާހީމްގެ 50 ވަނަ ފިލްމް "ގިލަން" އަކީ އޭގެ ތެރެއިން އެންމެ އުުންމީދީ އެއް ފިލްމެވެ.
"އެ ފިލްމް މި އަހަރު ބެލުންތެރިންނާ ހަމައަށް އަންނާނެ ކަމުގެ އުންމީދު ވަރަށް ބޮޑު،" މުހައްމަދު އަބޫބަކުރު (މާއެނބޫ) ޑައިރެކްޓް ކުރާ "ނޭދެން ވަކިވާކަށް" ގެ ވެސް ބަތަލާ ބުންޏެވެ.
"ނޭދެން ވަކިވާކަށްގެ ޝޫޓިން މިހާރު އެއޮތީ ގާތްގަނޑަކަށް ނިމިފައި،" ޔޫސުފް ޝަފީއު (ޔޫއްޕެ) އާއި ޖާދުﷲ އިސްމާއީލް (ޖާދު) އާ އެކު ސްކްރީން ހިއްސާ ކުރާ ފިލްމާ ބެހޭ ގޮތުން އަޒޫ ބުންޏެވެ. "ލަވަތަކުގެ ބައެއް މަންޒަރުތައް މިހާރު ކުރިއަށް ދަނީ."
މި އަހަރު އަދިވެސް އަޒޫ ފެންނާނެ އިތުރު ފިލްމުތަކެއް އެބަ ހުއްޓެވެ. އޭގެ ތެރެއިން އެއް ފިލްމަކީ ދާދި ފަހުން ލޯންޗް ކުރި ފިލްމް "ނޯޓީ 40" އެވެ. މިއީ ބޮޑު ކާސްޓެއް ހިމެނޭ އަހަރުގެ އެންމެ ބޮޑު ފިލްމްގެ ތެރެއިން އެއް ފިލްމެވެ.
"މިއީ އަނެއްކާ ވެސް އަޒޫގެ ތަފާތު ރޯލެއް ފެންނާނެ ފިލްމަކަށް ވެގެން ދާނެ. ބައިވެރިޔާގެ ޓީމާ އެއްކޮށް އަނެއްކާ ވެސް ބޮޑު މަސައްކަތެއްކޮށްލަން ލިބުނީމަ އަސްލު ވަރަށް އުފަލުން މިހިރީ،" ފިރިމީހާ އަދި އެކްޓަރު އަހުމަދު ސައީދު ޑައިރެކްޓް ކުރާ ޑްރާމާ ސިލްސިލާއެއްގައި މި ވަގުތު މަސައްކަތް ކުރަމުން އަންނަ އަޒޫ ބުންޏެވެ. "އަޒޫ އަބަދު ވެސް ބަލަނީ އަބަދު އެއް ކަހަލަ ރޯލްތައް ނުކުޅެ، ކޮންމެ ފިލްމަކުން ވެސް ތަފާތެއް ދައްކުވައިދޭ ކަހަލަ ކެރެކްޓާއެއް ކުޅެން ލިބޭ ފިލްމްތަކަށް. ފިލްމުގައި ކުޅެން ލިބޭ ރޯލްގެ ލެންތަކަށް ނޫން އިސްކަން ދެނީ. ކިތަންމެ ކުޑަ ރޯލެއް ވިޔަސް ހިތްހަމަޖެހޭ ކަހަލަ ކެރެކްޓާއެއް ވެއްޖިއްޔާ ހަމަ އޯކޭ ދޭނަން."
ފާތުމަތު ނަހުލާގެ "ބޮސް" އަކީ ވެސް އަޒޫގެ ވަރަށް މުހިއްމު ރޯލެއް ފެންނާނެ ފިލްމެކެވެ. އެ ފުރުސަތަކީ ނަހުލާއާ އެކު އަޒޫ ކުރާ ފުރަތަމަ ތަޖުރިބާ އަށް ވާނެ އެވެ.
"މި އަހަރަކީ ފުދޭ ވަރަކަށް ގިނަ ޕްރޮޖެކްޓްތަކެއް ހުރި، އަޒޫ އަށް ވަރަށް ބިޒީ އަހަރަކަށް ވާނެ. ގައިމު ވެސް ދެން ކުރިއަށް ވުރެ ގިނައިން އަޒޫ ފެންނާނެ،" ފިލްމީ ދާއިރާ ނުގެއްލޭނެކަން ފާހަގަކޮށް އޭނާ ބުންޏެވެ.
އަޒޫ މިހާރު ހުރީ އެއްގޮތަކަށް ވެސް ފިލްމީ ދާއިރާއާ ފެއަށް ޖެހިލުމުގެ ވިސްނުމުގައެއް ނޫނެވެ. ޓީޗީން ކޯސް ހެދި އިރު، ފިލްމީ ދާއިރާއާ ދުރަށް ދިއުމުގެ ހިޔާލެއް ވެސް އޭނާ ގެންގުޅުނެވެ.
އެކަމަކު އޭނާ މިހާރު ހުރީ އެންމެ މޮޅު ބަތަލާގެ ގައުމީ އެވޯޑް ވެސް ކޮންމެވެސް ދުވަހަކުން ހާސިލު ވާނެ ކަމަށް އުންމީދުކޮށްގެން ކުރިއަށް ދާން ނިންމައިގެންނެވެ.
"ކެރިއަރުގެ ކޮންމެވެސް ހިސާބަކުން ވަރަށް ބޮޑަށް ބޭނުން ޓެޑްރީއާ އެކު މަސައްކަތްކޮށްލަން ވެސް. ވަރަށް އުންމީދު ކުރަން އެކަހަލަ ފުރުސަތެއް ލިބޭނެ ކަމަށް،" ވަރަށް ރުޅިގަދަ ނުފޫޒު ގަދަ މީހެއްގެ ރޯލް ކުޅެލަން ވަރަށް ބޭނުންވާކަން ފާހަގަކޮށް އަޒޫ ބުންޏެވެ. "އަދި އުންމީދު ކުރަން ބެސްޓް އެކްޓްރެސްގެ އެވޯޑް ލިބޭނެ ދުވަހަކަށް ވެސް."
އެކްޓަރު ސައިދުއާ ކައިވެނިކޮށްގެން އުޅޭތީ، އޭނާއާ އެކުގައި އަޒޫ ސްކްރީނުން ފެންނަން ވެސް ފޭނުން މިހާރު ބޭނުން ވާނެ އެވެ. ހާއްސަކޮށް ޖޯޑެއްގެ ގޮތުގަ އެވެ.
"މީގެ ކުރިން ވެސް ހުންނާނެ އެކުގައި މަސައްކަތްކޮށްފައި. ކުރިއަށް އޮތް ތަނުގައި ވެސް އެކުގައި ފެންނާނެއޭ ބުނާ ހިތް ވަނީ." އަޒޫ ބުންޏެވެ.