15 ޖެނުއަރީ 2024 - 05:59
ޚިޔާނާތުގެ ކުށުގައި ޖަލަށް ލާފައިވާ، ޕާކިސްތާނުގެ ކުރީގެ ބޮޑުވަޒީރު އިމްރާން ޚާންގެ ސިޔާސީ ޕާޓީން ކުރިއަށް އޮތް އިންތިހާބުގައި ބޭނުންކުރަން ކަނޑައަޅާފައިވާ ކްރިކެޓް ބެޓްގެ ނިޝާން ބޭނުން ނުކުރެވޭނެ ކަމަށް އެ ގައުމުގެ ސުޕްރީމް ކޯޓުން ނިންމައިފި އެވެ.
އާބާދީ 240 މިލިއަނަށް ވުރެ ބޮޑު ޕާކިސްތާނުގައި އަންނަ މަހުގެ އަށް ވަނަ ދުވަހު އާންމު އިންތިހާބު ބާއްވަން ހަމަޖައްސާފައި ވާއިރު އިމްރާންގެ ޕާކިސްތާން ތަހްރީކީ އިންސާފް (ޕީޓީއައި) އަށް ވަނީ ގާނޫނީ ގޮތުން ބޮޑެތި ގޮންޖެހުންތައް ކުރިމަތިކޮށްފަ އެވެ.
ކުރީގެ ކްރިކެޓް ތަރި އިމްރާންގެ ޕާޓީން ނިޝާނެއްގެ ގޮތުގައި ކްރިކެޓް ބެޓެއް ބޭނުންކުރާތާ އެތައް އަހަރެއް ވެއްޖެ އެވެ. ލިޔަންކިޔަން ދަންނަ މީހުންގެ ނިސްބަތް އެންމެ 58 ޕަސެންޓްގައި ހުރި ޕާކިސްތާނުގައި، ވޯޓު ކަރުދާހުގައި ބޭނުންކުރާ ނިޝާން ވެފައި ވަނީ ވޯޓު ލާ މީހުންނަށް މުހިންމު އެއްޗަކަށެވެ.
"މިއީ ޕާކިސްތާނުގެ އެންމެ މަގުބޫލު ސިޔާސީ ޕާޓީއަށް މިހާތަނަށް އިންތިހާބާ ގުޅޭ ގޮތުން ކުރިމަތިވި އެންމެ ބޮޑު ގެއްލުން،" ވޮޝިންޓަންގެ ވިލްސަން ސެންޓަރުގެ ސައުތު އޭޝިއާ ސަރަހައްދުގެ ޑިރެކްޓަރު މައިކަލް ކުގެލްމަން އޭއެފްޕީ އަށް ވިދާޅުވި އެވެ.
އޭނާ ވިދާޅުވީ ލިޔަންކިޔަން ނުދަންނަ މީހުން މިހާ ގިނަ ގައުމެއްގައި ކްރިކެޓް ބެޓްގެ ނިޝާނާ ނުލައި، މި އިންތިހާބުގައި ބޮޑެތި އޮޅުންތަކެއް އަރާނެ ކަމަށެވެ.
ކްރިކެޓް ބެޓްގެ ނިޝާން ބޭނުންކުރުން އިލެކްޝަން ކޮމިޝަނުން ޑިސެމްބަރު އެންމެ ފުރަތަމަ މަނާކުރީ ޕީޓީއައި އިން އެ ޕާޓީގެ އެތެރޭގެ އިންތިހާބު ބާއްވާފައި ނުވާތީ އެވެ. ޕާކިސްތާނުގެ ގާނޫނުތައް ބުނާ ގޮތުން ކޮންމެ ޕާޓީއަކުން ވެސް އެތެރޭގެ އިންތިހާބުތައް ބާއްވައި ފުރިހަމަކުރަންޖެހޭ ކަންކަން ފުރިހަމަކުރުމުން ނޫނީ ގައުމީ އިންތިހާބެއްގައި ޕާޓީއެއްގެ ގޮތުގައި ވާދައެއް ނުކުރެވޭނެ އެވެ. އެހެންވެ ޕާޓީގެ ނިޝާނުގެ ބަދަލުގައި އެ ޕާޓީގެ ކޮންމެ ކެންޑިޑޭޓަކު ބޭނުންކުރަން ޖެހޭނީ ވަކި ނިޝާނެކެވެ. މިއީ ސަޕޯޓަރުންނަށް ވަރަށް ބޮޑަށް އޮޅުން އަރާނެ ކަމަކަށް ވާނެ އެވެ.
އިލެކްޝަންސް ކޮމިޝަންގެ ނިންމުމާ ދެކޮޅަށް ކޯޓަށް އެތައް މައްސަލައެއް ހުށަހަޅައިގެން ވެސް ކާމިޔާބު ނުވެ އެންމެ ފަހުން ސުޕްރީމް ކޯޓުން ވެސް އެ ނިންމުމަށް ތާއީދުކުރީ އެވެ.
ޕާކިސްތާނުގެ އިންތިހާބާ މެދު މިހާރު ވެސް ބޮޑެތި ސުވާލުތައް އުފެދިފައި ވާއިރު އެ ގައުމުގެ އިންސާނީ ހައްގުތަކާ ބެހޭ ކޮމިޝަނުން ވެސް ވަނީ، އިންތިހާބުގެ މާ ކުރިން ވޯޓު އޮޅުވާލުމުގެ މަސައްކަތް ކުރިއަށްދާ ކަމަށް ބުނެ ކަންބޮޑުވުން ފާޅުކޮށްފަ އެވެ. -- އޭއެފްޕީ