14 ފެބުރުއަރީ 2017 - 06:16
އަލަށް ދަރިއަކު ލިބިގެން އުޅޭއިރު އެ ކުއްޖާގެ ނެޕީ ޖެއްސުމަކީ ދަސްކުރަންޖެހޭ، އުނދަގޫ ކަމަކަށް އޮންނަނީ ވެފަ އެވެ. ޑައެޕާގެ އެންމެ ކުދިކޮށް ހުންނަ އާންމު ސައިޒަކީ "ނިއުބޯން" ކަމަށް ވިޔަސް ބައެއް ކުދިން އުފަންވާއިރު މާ ކުޑަ ކަމުން ނުވަތަ ދުވަސް ނުފުރާ އުފަންވުމުން މިއީ މާ ބޮޑު ސައިޒަކަށް ވެސް ވެދާނެ އެވެ.
ޑައެޕާ އުފެއްދުމަށް މަޝްހޫރު ހަގީސް އިން މި ހަފުތާގައި ވަނީ، ދުވަސް ނުފުރާ އުފަންވާ ކުދިންނަށް ހާއްސަ ޑައެޕާއެއް އުފައްދައިފިކަން އިއުލާނުކޮށްފަ އެވެ. އެ ކުންފުނިން ބުނީ "ނެނޯ ޕްރީމީސް" ގެ ނަމުގައި އުފެއްދި މި ޑައެޕާ އަކީ ބަރުދަނުގައި ކިލޯއެއް ހަމަނުވާ ވަރުގެ ކުދިންނަށް ހާއްސަ، ވަރަށް ކުޑަކުޑަ އަދި ތުނި ޑައެޕާއެއް ކަމަށެވެ. ޕެމްޕާސް ކުންފުނިން ވެސް މިދިޔަ އަހަރު ވަނީ އެ ކުންފުނީގެ "ނިއުބޯން" ސައިޒުގެ ޑައެޕާއަށް ވުރެ ތިން ސައިޒު ކުޑަ ޑައެޕާއެއް އުފައްދައިފަ އެވެ. މިއީ 400 ގްރާމް ހަމަނުވާ ކުދިންނަށް ހެޔޮވަރު ޑައެޕާއެއް ކަމަށް އެ ކުންފުނިން ބުންޏެވެ.
ހަގީސް އާއި ޕެމްޕާސް އިން މީގެ ކުރިން ވެސް، ދުވަސް ނުފުރާ އުފަންވާ ކުދިންނަށް ނެޕީ އުފައްދާފައިވެ އެވެ. އެކަމަކު މިއީ އެންމެ ކަމުދާ ސައިޒުގައި އަދި އެންމެ އެކަށީގެންވާ ގޮތުގައި ތައްޔާރުކޮށްފައިވާ އެއްޗެހި ނޫން ކަމަށް އެ ކުންފުނިތަކުން ވެސް ގަބޫލުކުރެ އެވެ.
އުފަންވާއިރު ހުންނަންޖެހޭ އެވްރެޖް ސައިޒަށް ވުރެ ކުއްޖާ ކުޑަ ނަމަ މިހާރު ހުންނަ "ނިއުބޯން" ސައިޒަކީ އެވަރުގެ ކުދިންނަށް މާބޮޑު ސައިޒަކަށްވެ އެވެ. އަދި އެ ޑައެޕާއިން ލީކުވެ އެވެ.
"އެންމެ ބޮޑު މައްސަލައަކީ ސައިޒު އަދި ކުއްޖާގެ ހަންގަނޑު ސަލާމަތްކުރުން،" ޔޫސީއެލްއޭ މެޑިކަލް ސެންޓަރުގެ މެޑިކަލް ޑިރެކްޓަރު ޑރ. ވެލެންސިއާ ވޯކާ ވިދާޅުވި އެވެ.
އޭނާ ވިދާޅުވީ އާދައިގެ ބަރުދަނުގައި އުފަންވާ ކުދިންނަށް ވުރެ ދުވަސް ނުފުރާ އުފަންވާ ކުދިންގެ ހަންގަނޑު ނާޒުކު ކަމަށާއި އެހެންވެ އެ ކުދިންނަށް ހާއްސަ ޑައެޕާއެއް ހެދުމަކީ ފަސޭހަ ކަމެއް ނޫން ކަމަށެވެ.
އަލަށް ހެދި ޑައެޕާ އުފައްދާފައި ވަނީ ދުވަސް ނުފުރާ އުފަންވާ ކުދިންނަށް ފަސޭހަކަމާ އެކު ހަރަކާތްތެރިވެވޭ ފަދަ މާއްދާތައް ބޭނުންކޮށްގެން ހާއްސަ ޑިޒައިނަކަށެވެ.