13 ފެބުރުއަރީ 2017 - 11:53
މެކްސިކޯ ސިޓީ (ފެބްރުއަރީ 13) - އެމެރިކާގެ ރައީސް ޑޮނަލްޑް ޓްރަމްޕުގެ އިމިގްރޭޝަން ސިޔާސަތާއި މެކްސިކޯ ބޯޑަރުގައި ފާރެއް ރާނަން އުޅުމާ ދެކޮޅަށް އެ ގައުމުގެ އެތައް ހާސް ބަޔަކު ޓްރަމްޕާ ދެކޮޅަށް މުޒާހަރާ ފަށައިފި އެވެ.
މެކްސިކޯގެ ވަރަށް ގިނަ ސިޓީތަކުގެ މަގުތަކަށް ހުދު ހެދުމުގައި އެ ގައުމުގެ ދިދަތައް ހިފައިގެން ނުކުތް މީހުން ވަނީ ޓްރަމްޕާ ދެކޮޅު ލިޔުންތައް ބޭނުންކޮށްފަ އެވެ. މި މުޒާހަރާ އިންތިޒާމް ކުރި މީހުން ބުނީ އެ މީހުން ބޭނުން ވަނީ ޓްރަމްޕާ ދެކޮޅަށް މުޅި މެކްސިކޯ އެކަތިގަނޑަކަށްވެފައިވާކަން ދެއްކުމަށް ކަމަށެވެ.
މުޒާހަރާގައި ބައިވެރިވި މީހެއް ކަމަށްވާ މާރިއާ އެމްޕަރޯ ކައްސާ ބުނީ ޓްރަމްޕުގެ އިމިގްރޭޝަން ސިޔާސަތަކީ މުޅި ދުނިޔެ އަށް ހުރި ބިރެއް ކަމަށެވެ.
މެކްސިކޯ ބޯޑަރުގައި ފާރެއް ރޭނުމަށް ޓްރަމްޕް ނިންމެވުމާ ގުޅިގެން މެކްސިކޯގެ ވަރަށް ގިނަ ބަޔަކު ދަނީ ނުރުހުން ފާޅުކުރަމުންނެވެ. މި މައްސަލާގައި ހިތްހަމަނުޖެހިގެން މެކްސިކޯގެ ރައީސް ޕީނާ ނިއެޓޯ ވަނީ ޓްރަމްޕާ ބައްދަލު ކުރެއްވުމަށް ދެކޮޅު ހައްދަވައިފަ އެވެ.
ޓްރަމްޕް ވިދާޅުވެފައި ވަނީ ބޯޑަރުގައި ރާނާ ފާރުގެ އަގު ހޯދާނީ މެކްސިކޯ މީހުންގެ އަތުން ކަމަށެވެ. ޓްރަމްޕް ވިދާޅުވެފައި ވަނީ ސެންޓްރަލް އެމެރިކާ އިން ވަގަށް އެތެރެވާ މީހުން ހުއްޓުވުމަށް މި ފާރަކީ ކޮންމެހެން ބޭނުންވާ ފާރެއް ކަމަށެވެ. އަދި މެކްސިކޯގެ ބޯޑަރުގައި 2،000 މޭލުގެ ދިގު ފާރެއް ރޭނުމަކީ ޓްރަމްޕުގެ ކެމްޕޭނުގެ އެއް ވައުދެވެ.
ޓްރަމްޕުގެ އިމިގްރޭޝަން ސިޔާސަތުގެ ދަށުން އެމެރިކާގައި ދިރިއުޅޭ މެކްސިކޯގެ ގިނަ ބަޔަކު ޑިޕޯޓްކޮށްލަފާނެކަމުގެ ބިރު ބޮޑެވެ.