07 ޖެނުއަރީ 2024 - 09:00
އަމީނީ މަގުގައި ތާރު އެޅުމުގެ މަސައްކަތް ރޭ ފަތިހު ނިންމާލައިފި އެވެ.
މި ސަރުކާރު ހަވާލުވުމަށް ފަހު އަމީނީ މަގުގައި ތާރު އެޅުމުގެ މަސައްކަތް ފެށީ މިދިޔަ މަހު 9 ގަ އެވެ. އޭގެ ފަހުުން ވިއްސާރަ އާ ގުޅިގެން ދުވަސްތަކެއް ވަންދެން މަސައްކަތް މެދުކެނޑިފައި އޮތެވެ.
ނަމަވެސް މިއީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ހަދަން ފެށި އަމީނީ މަގުގެ ސެގްމަންޓެއް މިހާ ބާރު ސްޕީޑުގައި ނިންމައިލި ފުރަތަމަ ފަހަރެވެ.
މޯލްޑިވްސް ރޯޑް ޑިވަލޮޕްމަންޓް ކޯޕަރޭޝަން (އެމްއާރްޑީސީ) ގެ އޮފިޝަލަކު "މިހާރު" އަށް ވިދާޅުވީ އަމީނީ މަގުގެ ނުނިމި އޮތް ބައިގައި ތާރު އެޅުމުގެ މަސައްކަތް ރޭ އެކީ ނިންމާލާފައިވާ ކަމަށެވެ. އެ މަސައްކަތް ނިންމައިލީ އޭނާ ވިދާޅުވި ގޮތުގައި 28 ދުވަހުގެ ތެރޭގަ އެވެ.
ތާރު ހިކެން އަދި 4-3 ދުވަސް ނަގާނެ ކަމަށާއި އެ އަށް ފަހު މަގު ހުޅުވައި ރޯޑް ސައިންތައް ކުރެހުމުގެ މަސައްކަތް ވެސް ނިންމާލާނެ ކަމަށް އޭނާ ވިދާޅުވި އެވެ.
"އެ ސަރަހައްދު ޓްރެފިކަށް ހުޅުވައިލެވޭނީ ފަސް ދުވަސް ފަހުން،" އޮފިޝަލް ވިދާޅުވި އެވެ.
އަމީނީ މަގުގެ ފަހު ސެގްމަންޓްގައި ތާރު އެޅުމުގެ މަސައްކަތް ކުރިއަށް ގެންދާ ތަން ބައްލަވައިލެއްވުމަށް އިއްޔެ މެންދުރާއި ރޭގެ ފަތިސް ނަމާދަށް ފަހު ރައީސް ޑރ. މުހައްމަދު މުއިއްޒު ވަޑައިގަތެވެ.
ދައުލަތުގެ ބަޖެޓުން 84 މިލިއަން ރުފިޔާ ހަރަދުކޮށްގެން އަމީނީ މަގު ހެދުމުގެ މަސައްކަތް އެމްއާރްޑީސީއާ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ހަވާލު ކުރީ ޖުލައި 3، 2022 ގަ އެވެ. އެ މަސައްކަތް ނިންމާލަން އޭރުގެ ސަރުކާރުން ރޭވީ މިދިޔަ އަހަރުގެ ސެޕްޓެމްބަރު މަހަށެވެ.
ނަމަވެސް އެ މަޝްރޫއުގެ އަމަލީ މަސައްކަތް ފެށުނީ އޮކްޓޫބަރު 2022 ގަ އެވެ. މަގު ހެދުމުގެ މަސައްކަތް އާރްޑީސީން ކުރުމަށް ފަހު ތާރު އަޅަން ވަކިން އެމްޓީސީސީއާ ހަވާލު ކޮށްގެން އަމީނީ މަގުގެ ފުރަތަމަ ބައި ހުޅުވީ މިދިޔަ އަހަރުގެ މާޗު މަހު އެވެ.
އޭގެ ފަހުން ދެން ހުރި ބައިތަކުގައި ތާރު އެޅުމުގެ މަސައްކަތް ވެސް ކުރީ އެމްއާރްޑީސީންނެވެ. އަދި ކުރީ ސަރުކާރު ނިމުނު އިރު ތާރު އަޅާފައި ވަނީ އަމީނީ މަގާއި އިއްޒުންދީން މަގާ ގުޅޭ ހިސާބަށެވެ.
އަމީނީ މަގު ތާރު އެޅުމުގެ މަސައްކަތް އެއްކޮށް ނިންމާލާފައިވާ އިރު މި ސަރުކާރުން ވަނީ ކަނބައައިސަރަނި ހިނގުމާއި މާލޭގެ ބޮޑެތި އެހެން މަގުތަކުގައި ވެސް ތާރު އެޅުމުގެ މަސައްކަތް ކުރަން ނިންމައިފަ އެވެ.
އަމީނީ މަގުގައި ތާރު އެޅުމުގެ މަސައްކަތުގެ ލަސް ސްޕީޑެއްގައި ކުރީގެ ސަރުކާރުން ގެންދިއުމުން އެ ދުވަސްވަރު ބޮޑެތި ފާޑުކިޔުންތަކެއް އެ ސަރުކާރަށް އަމާޒުވި އެވެ.