29 ޑިސެމްބަރ 2023 - 06:19
ސްރީ ލަންކާގެ ބައެއް ހިސާބުތަކުގައި މީސްލްސް (ހިމަބިހި) ގެ ކޭސްތައް އިތުރުވަމުން ދާތީ އުމުރުން 6-8 މަހުގެ ކުދިންނަށް އެމްއެމްއާރް ވެކްސިންގެ އިތުރު ޑޯޒެއް ދޭން ނިންމައިފި އެވެ.
ނޫސްވެރިންގެ ބައްދަލުވުމެއްގައި ލަންކާގެ ހެލްތު މިނިސްޓްރީގެ ސެކްރެޓަރީ ޕަލިތާ މަހިޕަލާ އިއްޔެ ވިދާޅުވީ ހިމަބިހި އަލުން ފެތުރޭތީ 25 ޑިސްޓްރިކްޓެއްގައި ވެކްސިން ދޭން ނިންމާފައިވާ ކަމަށެވެ. އޭނާ ވިދާޅުވީ މި ޕްރޮގްރާމްގައި އުމުރުން ނުވަ މަހާއި 15 އަހަރާ ދެމެދުގެ ކުދިންގެ ތެރެއިން އެމްއެމްއާރް ވެކްސިން ނުދީ ތިބި ކުދިންނަށް އަންނަ މަހުގެ ހަ ވަނަ ދުވަހުން ފެށިގެން ވެކްސިން ދެވޭނެ ކަމަށެވެ.
އޭނާ ވިދާޅުވީ މި އަހަރުގެ މެއި މަހުން ފެށިގެން މިހާތަނަށް ލަންކާއިން ހިމަބިހީގެ 700 އަށް ވުރެ ގިނަ ކޭސް ފެނިފައިވާ ކަމަށެވެ. މީގެ ތެރެއިން ގިނަ ކޭސްތައް ފެނިފައިވަނީ ވެރިރަށް ކޮލަމްބޯ އިން ކަމަށް ވެސް އޮފިޝަލް ވިދާޅުވި އެވެ. ކޮލަމްބޯގެ އިތުރުން ގަމްޕަހާ، ކަލުޓަރާ، ގޯލް، މަޓާރާ، ކެންޑީ، ޖަފްނާ، ކުރުނެގަލާ އަދި އަމްޕާރާ ޑިސްޓްރިކްޓުން ވެސް ކޭސްތައް ފެނިފައިވާ ކަމަށް ވިދާޅުވި އެވެ.
މަހިޕަލާ ވިދާޅުވީ ވެކްސިން ޖަހަން ބޭނުންވާ މީހުންނަށް އެކަން ފަސޭހައިން ކުރެވޭނެ ގޮތް ހެދުމަށް ގައުމުގެ އެކި ހިސާބުތަކުގައި 1،600 ކްލިނިކް ހަދާނެ ކަމަށެވެ.
ސްރީ ލަންކާއިން ހިމަބިހި ނައްތާލާފައިވާ ކަމަށް ދުނިޔޭގެ ސިއްހަތު ޖަމިއްޔާއިން 2019 ވަނަ އަހަރު ވަނީ ކަނޑައަޅައިފަ އެވެ. އެކަމަކު މަހިޕަލާ ވިދާޅުވީ ކޮވިޑްގެ ބަލިމަޑުކަމުގެ ތެރޭގައި ވެކްސިން ނުދެވުމުގެ ސަބަބުން ހިމަބިހީގެ ކޭސްތައް އަލުން އަނެއްކާވެސް އިތުރުވެ ފެންނަން ފެށީ ކަމަށެވެ.