10 ޑިސެމްބަރ 2023 - 23:16
އައްޑޫ ފިހާރައަކުން ވައްކަންކުރަން އުޅުނު މީހަކު ގިނަ އަދަދެއްގެ ޑްރަގާ އެކު މިއަދު ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލަކު ވިދާޅުވީ ހިތަދޫގެ ފިހާރައަކަށް ވައްކަން ކުރަން ވަތް މައްސަލައެއް މެންދުރު ފަހު 3:10 ހާއިރު ރިޕޯޓުުކޮށްފައިވާ ކަމަށެވެ.
އެ ވަގު ހިފަހައްޓަން އުޅުނު ފިހާރައިގެ ސޭޓަށް އަނިޔާވެ އައްޑޫ އިކުއިޓޯރިއަލް ހޮސްޕިޓަލުގައި ފަރުވާ ދިނުމަށްފަހު ދޫކޮށްލާފައިވާ ކަމަށް ފުލުހުން ބުންޏެވެ.
އޮފިޝަލް ވިދާޅުވީ ވައްކަން ކުރަން އުޅުނު މައްސަލައިގައި 37 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ. އަދި އޭނާ ބަލައިފާސްކުރިއިރު، މަސްތުވާތަކެތި ކަމަށް ބެލެވޭ އެއްޗެހި ހުރި 18 ރަބަރު ޕެކެޓު ފެނިފައިވާ ކަމަށް ފުލުހުން ބުންޏެވެ.
"މި މައްސަލަ ފުލުހުން ދަނީ ތަހުގީގުކުރަމުން." އޮފިޝަލް ވިދާޅުވި އެވެ.
އައްޑޫގެ ފިހާރައަކުން ވައްކަން ކުރަން އުޅުނު މައްސަލައެއްގައި މީހަކު ހައްޔަރުކުރިއިރު، އެ ތަނުގައި މި ފަހުން ވަނީ ގްރޫޕު މާރާމާރީތައް އިތުރުވެފަ އެވެ. އެހެންވެ، އެކަން ކޮންޓްރޯލް ކުރަން މާލެއިން އިތުރު ފުލުހުން ވެސް ވަނީ ފޮނުވައިފަ އެވެ.