10 ޑިސެމްބަރ 2023 - 22:50
ފަލަސްތީނުގެ ރައްޔިތުންނަށް އިންސާފު ހޯދައިދީ، އިޒްރޭލުން ދެމުންދާ ލާއިންސާނީ އުދުވާނުތައް ވަގުތުން ހުއްޓާލުމަށް ފޮރިން މިނިސްޓަރު މޫސާ ޒަމީރު މިއަދު ގޮވާލައްވައިފި އެވެ.
ބައިނަލްއަގުވާމީ ގޮތުން މިއަދު ފާހަގަކުރާ އިންސާނީ ހައްގުތަކުގެ ދުވަހު މިނިސްޓަރު ދެއްވި މެސެޖުގައި އެންމެ ފުރަތަމަ ވެސް ފާހަގަކުރެއްވީ ފަލަސްތީނުގެ ރައްޔިތުންގެ ހައްގުތަކާއި އިންސާފު ހޯދުމަށް ކުރާ މަސައްކަތުގައި ދެގޮތެއް ނުވެ ރާއްޖެ ބައިވެރިވާ ކަމަށެވެ.
ޒަމީރުގެ މެސެޖުގައި ވަނީ ފަލަސްތީނުގެ ބިންތަކަށް އިޒްރޭލުން ގަދަބާރުން ވެރިވެގެން އުޅޭ އުޅުން ވަގުތުން ނިމުމަކަށް ގެނެސް، މިދިޔަ އޮކްޓޯބަރު މަހުން ފެށިގެން އިޒްރޭލުން ފަލަސްތީނަށް ދެމުންދާ ލާއިންސާނީ ހަމަލާތައް ވަގުތުން ހުއްޓައިލުމަށް ގޮވާލައްވައިފަ އެވެ.
އަދި ބައިނަލްއަގުވާމީ މުޖުތަމައު އިން ވެސް، ބައިނަލްއަގުވާމީ އިންސާނީ ހައްގުތައް ރައްކާތެރިކުރުމުގެ ގާނޫނުތަކާ އެއް ގޮތަށް ފަލަސްތީނުގެ ރައްޔިތުންގެ ހައްގުތައް ހޯދައި ދިނުމަށް ތެދުވުމަށް ވެސް މިނިސްޓަރު ގޮވައިލެއްވި އެވެ.
"އިންސާނީ ހައްގުތައް ރައްކާތެރި ކުރުމަށް މުޅި ދުނިޔެ އެކަތިގަނޑެއްގެ ގޮތުގައި އެއް އަމާޒަކަށް މަސައްކަތް ކުރަންޖެހޭ،" އޭނާ ވިދާޅުވި އެވެ.
މީގެ އިތުރުން، އެ މެސެޖުގައި ޒަމީރު ވަނީ ރައީސް ޑރ. މުހައްމަދު މުއިއްޒުގެ ސަރުކާރުން ޒުވާނުންނާއި އަންހެނުންނާއި އުމުރުން ދުވަސްވީ މީހުންގެ ހައްގުތައް ކަށަވަރުކޮށް، ސުލްހަވެރި އަދި ފާގަތި މުޖުތަމައެއް ބިނާކުރުމަށް ހާއްސަ އިސްކަމެއް ދޭނެ ކަމުގެ ޔަގީންކަން ވެސް ދެއްވައިފަ އެވެ.