10 ޑިސެމްބަރ 2023 - 09:54
އުތުރުން ޖެހިލި އަކުރިސްގެ އަމުރަށް ތަބާވުމުގެ ގޮތުން، ފަތްކެޔޮ ގަހުގެ އެންމެ ބޮޑު ފަތް ހަނާއަޅައިލިއެވެ. އަރާމުކޮށްލުމަށް ޓަކައި ފަތުގައި އިން ދޮންދޫނި އުދުއްސައިގަތެވެ. ތޫބާ އޮތީ ދޮންދޫންޏަށް ބަލަހައްޓައިގެންނެވެ. ހާމަފެންޑާގެ ޖޯލީގައެވެ. ހަވީރު ފެންވަރައިގެން ހާމަފެންޑާއަށް އަރައި، ޖޯލީގައި އޮށޯވެލައިގެން އޮތުމަކީ، ބައްތިރީސް އަހަރުގެ ތޫބާގެ ޒަމާންވީ އާދައެކެވެ. ތޮއްޖެހިފައިވާ މާލޭގެ ހަލަބޮލިކަމުން ސަލާމަތްވާން ތޫބާއަށް ފެނުނު އެންމެ މޮޅު ގޮތަކީ އެއީއެވެ. އިސްކޮޅުން ދިގު، ކުލަފަތި، ކުލަ އޮޅަލި ތޫބާގެ ފުރިހަމަ ނަމަކީ ތޫބާ މޫސައެވެ. މޫސައަކީ، ބައްޕަގެ ނަމުގެ ފުރަތަމަ ބައެވެ. ބައްޕަގެ ފަރާތުން ތޫބާއަށް ލިބުނު ހަމަ އެކަނި އެއްޗަކީ އެއީއެވެ. ތޫބާއަށް މައްސަލައަކީ ބައްޕަގެ ތަނަވަސްކަމުން މަންފާއެއް ނުކުރީމައެއް ނޫނެވެ. ލޯބިން ވެސް ތޫބާ މަހުރޫމުވީމައެވެ. ކޮއްކޮއާއި މަންމަ ވެސް އެ ލޯބިން މަހުރޫމުކޮށްލީމައެވެ. ލޯބި ބެހުމުގައި ބައްޕަ އިންސާފުން އެއްކިބާވިކަން ތޫބާއަށް ޔަގީނެވެ. ހިޔާލުގެ ބައްތެލި އެ ހިސާބަށް ދުއްވުނު ތަނާ، ކޮކާލެއް ތިރިކޮށްލި ތަން ފެނުނެވެ. ވަށައިގެން ހެދިފައިވާ ގަސްތަކުގައި، ކުލަ ހުސްކޮށް މާ ފޮޅިފައިހުއްޓެވެ. ކޮކާލުގެ މަސައްކަތަކަށްވީ މާތަކުގެ މަތިން އުދުހުމެވެ. ފިނިފެންމާ ހުރި އިރު ވެސް، އެއްވެސް މަލެއްގައި ކޮކާލެއް ނުޖެއްސިއެވެ. ތޫބާ ހިތަށްއެރިއެވެ. އެއީ ކޮކާލުގެ އެކަނި އާދައެއް ނޫނެވެ. އިންސާނުންނަށް ވެސް އެހެން ދިމާވެއެވެ. ބައެއް މާ ކަމުނުދަނީއެވެ. އަނެއްބައި މަލުގެ މިލްކުވެރިކަން އެހެން ކޮކާލަކަށް ސާބިތުވެފައި އޮތީއެވެ.
"އަހަންނަށް އޭރު ވެސް ހީވިޔޭ ދޮންތަ އޮންނާނީ މިތާއޭ!" ދުވަމުން ސިޑިން އެރި ފަރްހާ ބުންޏެވެ. "ހިނގާބަލަ ދަމާ!"
ތޫބާ ހިތަށްއެރިއެވެ. މީ އަނެއްކާ އަނެކަކެވެ. އުމުރުން ބާވީސް އަހަރުވީ އިރު ވެސް ލޯބިވާން ޝަރުތުހަމަވާ މީހަކު ފެނުނުކަމަކަށް ނުވިއެވެ. އަބަދު ވެސް އުޅޭނީ ހުވަފެނީ ދުނިޔެއެއްގައެވެ. ޖާދޫގެ އަވަށެއްގައެވެ. ފަރްހާގެ އަސްލު ދުނިޔެއަކީ ބިއުޓީ އެންޑަ ދަ ބީސްޓާއި، ސިންޑްރެއްލާއާއި ލޯބީގެ ނާވިލުތަކެވެ. އިނގެރޭސިއާއި ކޮރެޔާ ސީރީޒްތަކެވެ. އިންތިޒާރުކުރަނީ ހަނގުރާމައިގެ ހެދުންއަޅައިގެން، ކަނޑިއެއް ހިފައިގެން، ހުދުކުލައިގެ އަހެއްގައި އަންނާނެ މީހަކަށެވެ.
"ހެލޯ ސްލީޕިން ބިއުޓީ!" ފަރްހާ ގޮވައިލިއެވެ.
"އަހަންނެއް ނުނިދަމޭ!" ތެދުވަމުން ތޫބާ ބުންޏެވެ. "ހިނގާހިނގާ! ދޮންމަންމަ ހުންނާނެ ފަރޫއަށް އެޕަލްޕައި ހަދައިގެން. ތިރިޔަށް ފައިބާ. ބުރުގާއަޅައިގެން މި ފައިބަނީ."
ދެބެން ސައިކަލުގައި ދަތުރަށް ފެށިއެވެ. އެ ފަހަރު ދުއްވަންއިނީ ތޫބާއެވެ. ފަރްހާ އިރުއިރުކޮޅާ ފަރްހާގެ ފަން އިސްތަށިގަނޑު ރީތިކޮށްލައެވެ. ތުންފަތުގެ ކުލަ ހުރީ ރަނގަޅަށްތޯ ފޯނުން ބަލައެވެ.
"މީހަކު ނޫޅޭ ތި ތުންފަތް ބަލާކަށް،" ސަމާސާ ރާގެއްގައި ތޫބާ ބުންޏެވެ. "ހެޔޮނުވާނެ އިންސްޓާއަށް ތި ލާ ފޮޓޯތައް އެ ވަރަށް ޓަޗްނުކޮށްބަލަ! މިއަދު ވެސް ލާފަހުރި ފޮޓޯ ހީވަނީ ވެންޕަޔައެއްހެން. އޮމާންކޮށްލިކޮށްލީނުން.."
"ދޮންތާ! އެޔޭ މިހާރުގެ ސްޓައިލްއަކީ،" ފަރްހާ ބުންޏެވެ. "ބޯއީޒް ބުނާނެ ނެޗްރަލްކޮށް ހުރީމައޭ ރީތީ އެކަމަކު ކޮންތާކު؟ ލުބާގެ ލިޕްސް ވެސް ހަދާފަ މިހާރު ހުންނަނީ ދޯ؟ އަހަރެން ވެސް ބޭނުން ހަދަން. އޭނަގެ ކޮންމެ އިނގިއްޔެއްގަ އޮންނާނެ ގޯލްޑް ރިންގެއް. އަދި އިރުއިރުކޮޅާ އަޅާފަ ބާލާނެ. ހީވާނީ ދެއްކެން އުޅޭހެން. ވަރަށް ފޫހިވޭ!"
ރީތިވާން ތޫބާ ވެސް ބޭނުމެވެ. އެކަމަކު ތިމާގެ ފެންވަރެއް ތޫބާއަކަށް ނޯޅެއެވެ. ދެބެންގެ ތަފާތަކީ އެއީއެވެ. ފަރްހާ ކަމެއް ކުރަންވީމައި ކޮށްލާނެއެވެ. ނަތީޖާއަށް ވިސްނާނީ ފަހުންނެވެ. ތޫބާގެ ގޮތަކީ، ފަހަށް ވިސްނާފައި ބޭނުންތައް ލަސްކޮށްލުމެވެ. ނުވަތަ ވިސްނުން ބަދަލުކުރުމެވެ. ތޫބާއަށް ފަހު ސަފިއްޔާއަކަށް އިތުރު ކުއްޖެއް ނުލިބުނެވެ. ފަރްހާއަކީ ތޫބާގެ ބައްޕަ އެތައް ނަދުރެއް ބުނެގެން ލިބުނު ކުއްޖެކެވެ. އެހެނެއްކަމަކު ފަރްހާއަށް ލިބުނު އިތުރު އިނާޔަތެއް ވެސް ނެތެވެ. ފަރްހާގެ ޝަކުވާތައް ޖާއިޒެވެ. އެ ހުރިހާ އެއްޗެއް ތޫބާއަށް ވިސްނެއެވެ. އެހެނަސް، އެ ވާހަކަތައް ހަނދާންކޮށްދީގެން ދެބެއިންގެ މެދުގައި ފިތުނަ އުފައްދާކަށް ތޫބާ ބޭނުމެއް ނޫނެވެ.
"ދޮންތަ ބުނަން ވާހަކައެއް ފަރޫ!" ތޫބާ ވަރަށް ލޯބިން ކޮއްކޮއަށް ވިސްނައިދިނެވެ. "ލުބާމެން އަތުގަ ލާރި ހުންނާނެ. ބޭނުން ކޮންމެ ކަމެއް ކޮށްލެވޭނެ."
"އެއީ ކީއްވެތަ ދޮންތާ؟" ޝަކުވާގެ ރާގަކަށް ފަރްހާ ބުންޏެވެ. "އޭނަގެ ބައްޕައަކީ އަހަރުންގެ ވެސް ބައްޕަ. އެކަމަކު މާދަންކަން ނޭނގެ އަހަރުމެންގެ ގެ ބޮލަށް ވެއްޓޭނީ. އަހަރުމެން ރޫމް ވެސް ޝެއަރކޮށްގެން މި އުޅެނީ. އެކަމަކު ލުބާގެ ރޫމް ވެސް ހީވަނީ ބޮޑު ޕެލެސްއެއްހެން. ނޮޓް ފެއަރ."
"ތިހެން ބުނާ އިރު ވެސް ފަރޫއަށް އެނގޭނެ ރީޒަން." ތޫބާ ޖަވާބު ކުރުކޮށްލިއެވެ.
ތޫބާއާއި، ފަރްހާއާއި، ލުބާނާގެ ވެސް ބައްޕައަކީ އެކަކެވެ. އުމުރުން ވިހި އަހަރުގެ ލުބާނާއަކީ މޫސަ ފަހުން އިން ހަފީޒާގެ ދަރިފުޅެވެ. މޫސަ ހިންގާ ބޮޑު ފިހާރައަކީ ވެސް ހަފީޒާގެ އަމިއްލަ ވިޔަފާރިއެކެވެ. މުދާ ގަންނަން ހޭދަކުރާ ފައިސާއިން ފެށިގެން، ފިހާރައިގެ އިމާރާތު ކުއްޔާއި، މުވައްޒަފުންގެ މުސާރައަކީ ވެސް ހަފީޒާގެ ލާރިއެވެ. އެއިން ދޮށީބަނޑުގެ ކުދިންނަށް އެއްޗެއް ދިއްކޮށްލުމަކީ މޫސައަށް ނުކުރެވޭނެ ވަރުގެ ކަމެއް ނޫނެވެ. ވިޔަފާރި ހިންގައިދޭތީ، ބޮޑު މުސާރައެއް މޫސައަށް ކަނޑައެޅިފައި އޮވެއެވެ. އެކަމަކު އެއިން، މަހަކު ވަކި ވަރެއް ދޭ ކަހަލަ އުސޫލެއް މޫސަ ނުގެންގުޅެއެވެ. ބޮޑު ކަމެއް ޖެހުމުން ކޮށްލަދެއެވެ. ދޭތެރެއަކުން ހަދިޔާއެއް ގަނެދެއެވެ. ތޫބާއާއި ފަރްހާގެ ހަރަދުބަރަދު ބަލަހައްޓަނީ އެ ދެބެއިން ވަޒީފާއަދާކޮށްގެންނެވެ. ތޫބާމެންގެ މަންމަ ސަފިއްޔާއަކީ ހީވާގި މަސައްކަތްތެރިއެކެވެ. ހެދިކާ ހަދައިގެން ތަންތަނަށް ގެންދެއެވެ. ތެއްލި ފަތުގެ ވައްތަރުތައް ހަދައެވެ. ތިން ބުރިއަށް ގެ ހެދުމާއި، ތޫބާއަށް ސައިކަލެއް ގަތުމުގައި ސަފިއްޔާއަށް މޫސަ އެހީތެރިވިއެވެ. ބިންމަތީ ބައިގައި ހުންނަ ފިހާރައިގެ ކުއްޔަކީ ވެސް ސަފިއްޔާއަށް އޮންނަ އެއްޗެކެވެ. މޫސަގެ ނަޒަރުގައި އެ ވަރުން ފުދެންވާނެއެވެ. އެކަމަކު ފަރްހާއަށް އަޅައިކިޔެނީ ލުބާނާގެ ދިރިއުޅުމާއެވެ. ތިންބެއިން އެކުގައި ހީސަމާސާކޮށް އުޅުނެއްކަމަކު، ދޮށީ ދެބެންގެ ހިތުގައި ނުފިލާ ކަޅު ތިއްކެއް ހުރެއެވެ. ބޭރަށް ނުފެންނަނީއެވެ.ތޫބާ ސައިކަލު މަޑުކޮށްލި ތަން ލުބާނާގެ މަންމަ ހަފީޒާއަށް ފެނުނެވެ. އޭނަ ހުރީ މަތީބުރީގެ ކުޑަދޮރުން ބަލާށެވެ.
"ކަންތަކާޖެހުނީ!" ހަފީޒާ މަޑުމަޑުން ބުނެލިއެވެ. "މި އޮތީވާ ކަމެއް."
ހަފީޒާ ގޮސް ރަނގަބީލުގެ ސުވިޗު ނިއްވައިލިއެވެ. ނުވެސް ދެނަހުރިކަމަށް ހެދިފައި ކޮޓަރިއަށް ވަދެ ތަންޑުއެޅިއެވެ. އެއީ ހައްލެއް ނޫނެވެ. ލުބާނާއަށް ފޯނުކޮށްގެން ވެސް އެ ކުދިން ވަންނާނެއެވެ. ހަފީޒާ ބޭނުންވަނީ ރާއްޖެއިން ބޭރަށް ދިރިއުޅުން ބަދަލުކުރާށެވެ. ދޮންދަރީންގެ ކިބައިން ސަލާމަތްވުމަށް ޓަކައެވެ. އެކަމަކު ހަމަ އުޅެއުޅެ ލުބާނާއާއި މޫސަ އެއްބަހެއްނުވިއެވެ. ދެން އިވުނީ ލުބާނާގެ ކޮޓަރި ހުޅުވައިލި އަޑެވެ. އެޕާޓުމަންޓުގެ ދޮރު ހުޅުވި އަޑެވެ. ފުން ނޭވައެއް ބޭރުކޮށްލައިފައި ހަފީޒާ ކޮޓަރީގެ ދޮރު ހުޅުވައިލިއެވެ.
"އަހަނ! ކޮން ކުދިންނެއް މި އައީ؟" ވަރަށް ލޯބިވާކަމަށް ހެދިފައި ހަފީޒާ ބުންޏެވެ.
"އަހަރުމެން މިއުޅެނީ ފިލްމެއް ބަލަން،" ލުބާނާ ބުންޏެވެ. "މަންމަ ހެދި ޗޮކްލެޓް ކޭކު އެބަ ހުރިތަ؟"
"އެ ދެން ކޯޗެއް ކާން؟" ހަފީޒާ އެހިއެވެ. "ޕިއްޒާއަށް އޯޑަރުކުރޭ! މަންމަ ހަދާނަން ވެނީލާ މިލްކްޝޭކް."
އިތުރު މަސައްކަތެއްކުރަން ޖެހުނީތީ، ހިތާހިތުން ކުދިކިޔަމުން ހަފީޒާ ގޮސް އައިސްއަލަމާރި ހުޅުވައިލިއެވެ. ޗޮކުލެޓުކޭކުގެ އެއް ފަޅި އަލަމާރީގައި ހުއްޓެވެ. އެއީ ލުބާނާއަށް މާ މީރު އެއްޗެކެވެ. އެހެންވެ އެއިން އެންމެ ފޮއްޗެއް ވިޔަސް ދޮންދަރިންނަށް ދޭން ހަފީޒާ ބޭނުންނުވީއެވެ. އެ ކަން ތޫބާއާއި ފަރްހާއަށް ވެސް އެނގެއެވެ. އެންމެ ހެއްވާކަމަކީ އެއީއެވެ. ހަފީޒާ ހިތުން ހަފީޒާގެ ނިޔަތް އެކަކަށް ވެސް ނޭނގޭނެއެވެ. އެހެނަސް، ހަފީޒާ ހަގީގަތް ހާމަނުކުރާ ފަދައިން، ތޫބާއާއި ފަރްހާ ވެސް ހަގީގަތް ހާމަނުކުރަނީއެވެ.
ލުބާނާމެން ބެލި ފިލްމު ފެށުނީއްސުރެ ނިމެންދެން ހަފީޒާ ވެސް ކަންފަތުން އެ ފިލްމު ބެލިއެވެ. އެކަމަކު ފިލްމުބެލުމުގެ މަގުސަދަކު ނޫނެވެ. ދޮންދަރީން ދައްކާ ވާހަކައަށް ފާރަލުމުގެ ބޭނުމުގައެވެ. އޭގެ ފަހަތުގައި އެހެން ބޭނުމެއް ވެސް އޮވެއެވެ. ހަފީޒާއަކީ، ދީނީ ގޮތުން، އަމިއްލަ މިންގަނޑެއްގައި ހިފާއްޓާ މީހެކެވެ. ނަމާދުކުރަނީ ހިތަށްއެރި ފަހަރަކުއެވެ. ބުރުގާއެއް ނާޅައެވެ. ލުބާނާ ބުރުގާއަޅުވާކަށް ވެސް ހަފީޒާ ބޭނުމެއް ނޫނެވެ. ނަމާދަށް އަރުވާކަށް ވެސް ބާރެއްނާޅައެވެ. ކުރިއްޔާ ކުރީއެވެ. ނުކުރިއްޔާ ނުކުރީއެވެ. ތޫބާއާއި ތޫބާގެ މަންމަ ސަފިއްޔާ ބުރުގާއަޅައެވެ. ނަމާދު ވަގުތުޖެހުމުން އެ ދެބެއިން ގޭގައި ނަމާދުކުރެއެވެ. ލުބާނާގެ ކިބައިގައި އެ އާދަ ހަރުލާކަށް ހަފީޒާ ބޭނުމެއް ނޫނެވެ. އަނެއް މައްސަލައަކީ، ދޮންދަރީންގެ ކިބައިގައި ހުންނަކަމަށް ހަފީޒާއަށް ޝައްކުކުރެވޭ، ދަހިވެތިކަމުގެ ސިފައެވެ. ގެއަށް އައިސްފައި ދާ ކޮންމެ ފަހަރަކު، ލުބާނާ އަތުން ކޮންމެވެސް އެއްޗެއް "އަތުލާހެން" ހަފީޒާއަށް ހީވުމެވެ. އެންމެ ބޮޑު މައްސަލައަކީ ތިންވަނަ މައްސަލައެވެ. ހަފީޒާއަށް ހީވަނީ ލުބާނާގެ ތަނަވަސްކަމަށް ދޮންދަރިން ހަސަދަލާހެންނެވެ. ތިންބެއިން ފިލްމުބަލަން ތިބެގެން ސަމާސައަށް ބުނެލާ އެއްޗެހި ވެސް ހަފީޒާ ހިތުގައި ކަނޑައިނަގައެވެ. ފިރިމީހާއަށް ހަފީޒާ ދައްކަނީ އެހެން ކުލައެކެވެ. މޫސަގެ ނަޒަރުގައި ހަފީޒާއަކީ، އަމިއްލަ ދަރިފުޅު ފަދައިން ދޮންދަރިން ދެކެ ލޯބިވާ މަންމައެކެވެ. އެ ސިފަޔަށް މޫސަ ކެނޑިނޭޅި ތައުރީފުކުރެއެވެ. އެ ތައުރީފުކޮޅަށް ހަފީޒާ ހުންނަނީ ދަހިވެތިވެފައެވެ. ހަފީޒާގެ ހިތުގައި އޮންނަ ގޮތާ ދިމާ އިދިކޮޅަށް ކަންތައްކުރަން މަޖުބޫރުވަނީ އެހެންވެއެވެ.
އިޝާނަމާދު ވަގުތު ޖެހުނު އިރު، ފިލްމު ނިންމައިފައި ތޫބާއާއި ފަރްހާ ހިނގައްޖެއެވެ. ހަފީޒާ ގޮސް ލުބާނާގެ ކޮޓަރިއަށް ވަން އިރު ލުބާނާ ހުރީ ނަމާދަށްއަރައެވެ. އެއީ، ލުބާނާ އިޝާނަމާދުކުރާ ތަން ހަފީޒާއަށް ފެނުނު ފުރަތަމަ ފަހަރެވެ. ނަމާދު ނުކުރަން ބުނާނެ ހިތްވަރެއް ހަފީޒާއަކަށް ނުލިބުނެވެ. ސޯފާގައި އިށީނދެ ހަފީޒާ ވިސްނަން ފެށިއެވެ. ކައިރީގައި ހުރި މޭޒުމަތީގައި ލުބާނާ އަޅާ ރަން ފަސް އަނގޮޓި އޮތެވެ. އިރުކޮޅަކުން ލުބާނާ ކޮޓަރީގެ ދޮރު ހުޅުވައިފައި ބޯދިއްކޮށްލިއެވެ.
"ތި ތާ އަހަރެންގެ ރިންގްތައް އެބަ ހުރިތަ މަންމާ؟" ލުބާނާ އެހިއެވެ.
"މި ތާކު ނެތް!" ހަފީޒާ ވަގުތުން ބުންޏެވެ.
ނުނިމޭ