23 ނޮވެމްބަރ 2023 - 13:44
މާލެ އާއި ރަށްރަށުގައި މިސްކިތް އިމާރާތްކޮށް، އެ ތަންތަން މަރާމާތުކުރުމަށް ފައިސާ ހޯދަން އިސްލާމިކް މިނިސްޓްރީން ހިންގާ "ވަގުފު ފަންޑު" އިތުރަށް ފުޅާކުރުމަށް އާ ވަގުފު އިމާރާތެއް ހަދަން މި ސަރުކާރުން ނިންމައިފި އެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު "އެކްސް" ގައި ކުރެއްވި ޕޯސްޓެއްގައި ވިދާޅުވީ، ހުޅުމާލޭގައި އިމާރާތްކުރާ ދެ ވަނަ އިމާރާތުގެ ބިންގާ އަންނަ އަހަރުގެ ޖެނުއަރީ މަހު އަޅާނެ ކަމަށެވެ.
ދާރުލްއީމާނުގެ ނަމުން ނަން ދީގެން މާފަންނުގައި ހެދި ވަގުފު އިމާރާތް ހުޅުވީ މީގެ ހަ އަހަރު ކުރިންނެވެ. ނުވަ ބުރީގެ އެ އިމާރާތުގައި އެކި ފްލޯތައް ވަނީ ސަރުކާރުގެ އެކި އޮފީސްތަކަށް ކުއްޔަށް ދީފަ އެވެ.
ކުރީގެ ރައީސް އަބްދުﷲ ޔާމީން ވެރިކަމުގެ ކުރީކޮޅު، އޭރު އިސްލާމިކް މިނިސްޓަރަކަށް ހުންނަވައިގެން ޝަހީމްގެ ލަފާގެ މަތިން އެޅި އެ އިމާރާތުން، ވަގުފު ފަންޑަށް އަހަރަކު ހަ މިލިއަން ރުފިޔާ ވަންނަ ކަމަށް އޭނާ ވިދާޅުވި އެވެ.
މި ފަހަރުގެ ރިޔާސީ އިންތިހާބުގެ ކެމްޕެއިނު ދުވަސްވަރު ރައީސް ޑރ. މުހައްމަދު މުއިއްޒު ވަނީ އެކި ރަށްރަށުގައި ވަގުފު އިމާރާތުގެ ގޮތުގައި އޮފީސް އިމާރާތްތައް ހަދާނެ ކަމަށް ވިދާޅުވެފަ އެވެ.