23 ނޮވެމްބަރ 2023 - 11:21
ބާސެލޯނާ (ނޮވެމްބަރު 23) - ބާސެލޯނާގެ ސްޕޮޓިފައި ކޭމްނޯ ސްޓޭޑިއަމް ހަދާ ލޭބަރުން ލައްވައި ގަވާއިދާ ހިލާފަށް މަސައްކަތް ކޮށްފައި ނުވާނެ ކަމަށް އެ ކްލަބުން ބުންޏެވެ.
ސްޕެއިންގެ ނޫހެއް ކަމަށްވާ އެލް ޕެރިއޮޑިކޯ އިން މި ހަފުތާގައި ބުނީ ކުޑަ އުޖުރައެއް ދީގެން ނުކަތާ ވަރަށް ލޭބަރުން ލައްވައި މަޖުބޫރުން މަސައްކަތް ކުރުވާ ކަމަށެވެ. އަދި މަސައްކަތްތެރިންގެ މެދުގައި ހިތާމަވެރި ހާލަތެއް މެދުވެރިވެފައިވާ ކަމަށް ވެސް އެ ނޫހުން ބުންޏެވެ.
ސްޓޭޑިއަމްގެ މަރާމަތު ކުރުމުގެ މަސައްކަތް ކުރަމުން އަންނަނީ ތުރުކިޔޭގެ ކުންފުންޏެއް ކަމަށްވާ ލިމާކް އެވެ. ބާސާގެ ނައިބު ރައީސް އެލީނާ ފޯޓް ވިދާޅުވީ ތުރުކީގެ ކުންފުނިން އެއްވެސް މީހެއްގެ ހައްގުތަކަށް އަރައިގަންނަމުން ނުދާ ކަމަށެވެ.
"ނޫން، ލޭބާ އެބިއުސްތަކުގެ ޝިކާރައަކަށް ވެފައިވާ އެއްވެސް މަސައްކަތްތެރިއަކު ކަނޑައެޅިގެން ނެތް،" އެ ތުހުމަތުތަކަށް ރައްދު ދެއްވަމުން ފޯޓް ވިދާޅުވި އެވެ.
"އަހަރެމެންނަށް އެއްވެސް ޝަކުވާއެއް ލިބުނު ނަމަ އަހަރެމެން އެކަމާ ފިޔަވަޅު އަޅާނަން. އެއްވެސް ޝަކުވާއެއް ކްލަބަށް ކޮށްފައެއް ނުވޭ. އަދި އަހަރެމެން ވެސް ބަލަން އެތެރެއިން. އެއްވެސް ކަހަލަ ގަވާއިދާ ހިލާފު ކަމެއް ހުރި ކަމަށް ބުނާ އެއްވެސް ކަމެއް ފާހަގަކުރެވިފައެއް ނުވޭ."
ކުޑަ އުޖޫރައެއް ދީގެން މަސައްކަތްތެރިން ލައްވައި މަސައްކަތް ކުރުވަމުންދާކަމަށް ބުނާ ވާހަކަ އަށް ފޯޓް ބުނީ މަސައްކަތްތެރިންނާ އެކު އެއްބަސްވުން ހަދާފައި ވަނީ ސޯޝަލް ސެކިއުރިޓީ އިދާރާތަކުގެ އުސޫލުތަކާ އެއްގޮތަށް ކަމަށެވެ.
އްބަސްވުމެއްގެ ދަށުން ހަފްތާއަކު ހަ ދުވަހު، ގިނަވެގެން 12 ގަޑިއިރު [ދުވާލަކު] މަސައްކަތް ކުރޭ،" އޭނާ ވިދާޅުވި އެވެ.
ގަޑި ޖެހިދާނެތީ ސްޓޭޑިއަމް ބޭރުގައި މަސައްކަތްތެރިޔަކު ނިދާ ކަމަށް އެ ނޫހުގައި ރިޕޯޓްކޮށްފައި ވެއެވެ. ސަބަބަކީ މަސައްކަތަށް ގަޑި ޖެހިއްޖެނަމަ ވަޒީފާ ގެއްލިދާނެ ކަމުގެ ބިރު އޮތުމުން ކަމަށް އެ ނޫހުގައި ވެއެވެ.
އެކަމަކު ފޯޓް ވިދާޅުވީ 2،000 މަސައްކަތެތެރިން ސްޓޭޑިއަމް ބޭރުގައި ނުނިދާ ކަމަށާއި އެހެންވެ މުވައްޒަފުންގެ ކަންކަން ދަނީ ރަނގަޅަށްކަން ހާމަވާ ކަމަށެވެ.
ކޭމްޕް ނޯ މަރާމާތު ކުރުމުގެ މަސައްކަތް ފެށީ މިދިޔަ އަހަރު ޑިސެމްބަރު މަހު އެވެ. މިހާރު މަރާމަތު ކުރުމުގެ ބޮޑެތި މަސައްކަތް ކުރިއަށްދާތީ ބާސާގެ ހޯމް މެޗުތައް މި ސީޒަންގައި ކުޅެނީ އެ ސީޓީގައި ހުންނަ އޮލިމްޕިކް ސްޓޭޑިއަމްގަ އެވެ.