10 ފެބުރުއަރީ 2017 - 06:28
ގިނައިން ޕާސްތާ ކައި މީހުން، ސިއްހަތަށް ފައިދާހުރި ކާނާ ކެއުން، ޕާސްތާ ނުކައި މީހުންނާ އަޅާބަލާއިރު އިތުރުކަން ފާހަގަވެފައިވާ ކަމަށް އާ ދިރާސާއެއްގައި ބުނެފި އެވެ.
އެމެރިކާގައި 2001 އިން 2012 އަށް އެއްކުރި މައުލޫމާތަށް ފަހު ނިއުޓްރިޝަނަލް ސްޓްރެޓެޖީސް އިން ބުނީ އާންމުކޮށް ޕާސްތާ ކައި އުޅޭ މީހުން ސެޗުރޭޓެޑް ފެޓް އަދި ހަކުރު ހުންނަ ކާނާ ބޭނުންކުރާ މިންވަރު މަދު ކަމަށެވެ.
މީގެ އިތުރުން، ހަށިގަނޑަށް މުހިންމު ވިޓަމިނާއި މިނެރަލްސް ފަދަ ތަކެތި ވެސް ޕާސްތާ އަށް ލޯބިކުރާ މީހުން ގިނައިން ކައި އުޅޭކަން ވަނީ ދިރާސާއިން ފާހަގަވެފަ އެވެ.
"ޕާސްތާ އަކީ މޭވާ އާއި ތަރުކާރީ އަދި މަސް ފަދަ ތަކެތިން ހަށިގަނޑަށް ބޭނުންވާ ބައިތައް ލިއްބައިދިނުމުގެ ރަނގަޅު މެދުވެރިއެއްގެ ގޮތުގައި ވަނީ ބެލެވިފައި،" ނެޝަނަލް ޕާސްތާ އެސޯސިއޭޝަންގެ ކޮމިއުނިކޭޝަން މެނޭޖަރުގެ މަގާމުގައި ހުންނެވި ޑައެޓީޝަނެއް ކަމަށްވާ ޑަޔާން ވެލްލޭންޑް ވިދާޅުވި އެވެ.
މިއީ ޕާސްތާ އަށް ލޯބިކުރާ މީހުންނަށް އުފާވެރި ޚަބަރަކަށް ވިޔަސް މިއީ އެމެރިކާގެ ނެޝަނަލް ޕާސްތާ އެސޯސިއޭޝަންގެ އިސްނެގުމާއި ބައިވެރިވުމާ އެކު ކޮށްފައިވާ ދިރާސާއެއްކަން ފާހަގަކޮށްލަން ޖެހެ އެވެ. ޕާސްތާ އަށް ތާއީދުލިބޭ ގޮތަކަށް ނޫނީ ނަތީޖާ ނިކުތުމަކީ ވާނެ ކަމެއް ކަމަކަށް ނުބެލެވެ އެވެ.
ނަމަވެސް މިދިޔަ އަހަރު އާންމުކުރި ދިރާސާއަކުން ވެސް، އާ ދިރާސާއަށް ބާރު ލިބެ އެވެ. އެ ދިރާސާގައި ބުނެފައި ވަނީ އާންމުކޮށް ޕާސްތާ ކައި އުޅޭ މީހުންގެ ބޮޑީ މާސް އިންޑެކްސް، ޕާސްތާ ނުކައި މީހުންނާ އަޅާބަލާއިރު ދަށް ކަމަށެވެ.