01 ނޮވެމްބަރ 2023 - 12:42
ވަގަށް ނަގައިގެން ވިއްކަން އުޅުނު ބައިސްކަލެއް ނުގަތުމުން ފިހާރައަކަށް ގެއްލުންދީ އެ ތަނުގައި ތިބި މީހުންނާ މާރާމާރީ ހިންގި ކަމަށް ތުހުމަތު ކުރެވޭ މީހަކު ހައްޔަރުކޮށް ބަންދަށް ކްރިމިނަލް ކޯޓުން 30 ދުވަސް ޖަހައިފި އެވެ.
މި މައްސަލައިގައި ހައްޔަރުކުރީ އުމުރުން 34 އަހަރުގެ ދިވެހި ފިރިހެނެކެވެ.
ބަންދުގެ މުއްދަތު އިތުރުކުރި މަޖިލީހުގައި ފުލުހުން ބުނެފައިވާ ގޮތުގައި އޭނާ އެ ފިހާރައަށް ދިޔައީ އެ ބައިސްކަލު ވިއްކުމުގެ ބޭނުމުގަ އެވެ. އެ ބައިސްކަލު ގަންނަން ދެކޮޅު ހެދުމުން ފިހާރައިގައި ހުރި މުދަލަށް ގެއްލުންދީ، މާރާމާރީ ހިންގާފައިވާ ކަމަށެވެ.
ކޯޓުގައި އޭނާ ބުނި ގޮތުގައި ފިހާރައިގައި ތިބި މީހުން ވަނީ އޭނާއަށް އަނިޔާކޮށް އެކިވަރުގެ އަނިޔާ ދީފަ އެވެ. ނަމަވެސް ސީނަށް އެޓެންޑު ފުލުހުން ބުނި ގޮތުގައި އެ ވަގުތު އޭނާ އެފަދަ ވާހަކައެއް ނުދައްކަ އެވެ.
އޭނާއަކީ މީގެ ކުރިން ވެސް ބައިސްކަލު ވަގަށް ނެގުމުގެ ރެކޯޑު އޮންނަ މީހެކެވެ.