31 އޮކްޓޯބަރ 2023 - 14:42
ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލް އެ މަގާމުން ވަކިކުރައްވަން ކުރީގެ ރައީސް އަބްދުﷲ ޔާމީން ބޭނުންފުޅުވާކަން "މިހާރު" އަށް އެނގިއްޖެ އެވެ.
އެ މުއާމަލާތްތައް އެނގޭ ޕީޕީއެމްގެ އިސްބޭފުޅަކު މިއަދު ވިދާޅުވީ، އެ ޕާޓީ އަށް އާ ސެކްރެޓަރީ ޖެނެރަލަކު އައްޔަން ކުރުމުގެ މަޝްވަރާތަކެއް ޔާމީން ވަނީ ތޮލާލާ ކުރައްވައިފަ އެވެ.
"ޔާމީން، ޕާޓީ ހިންގަން ބޭނުންފުޅުވާތީ އާ ސެކްރެޓަރީ ޖެނެރަލަކު ހަމަޖައްސަވަން ބޭނުންފުޅުވާ ވާހަކަ ވިދާޅުވީ،" ޕީޕީއެމުން ވާހަކަ ދެއްކެވި މެމްބަރު ވިދާޅުވި އެވެ.
ނަމަވެސް ޕީޕީއެމްގެ އަސާސީ ގަވާއިދު ބުނާ ގޮތުން، އެ ޕާޓީގެ ސެކްރެޓަރީ ޖެނެރަލް މަގާމުން ވަކިކުރެވޭނީ ސެނެޓުން ފާސްކޮށްގެންނެވެ. ރިޝްވަތު ހިފުމާއި މަނީލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއް ޔާމީނަށް އައިސްފައިވާތީ، ޖަލުތަކާއި ޕެރޯލްގެ ގާނޫނު ބުނާ ގޮތުން ޔާމީނަށް ޕާޓީގެ ލީޑަޝިޕްގެ އެއްވެސް މަގާމެއް ނުފުރުއްވޭނެ އެވެ. އެހެންވެ، އެ މަނިކުފާނަކީ މި ވަގުތު ޕީޕީއެމްގެ އާންމު މެމްބަރެކެވެ. އެހެންވެ، ޔާމީން އަންގަވައިގެން ޕީޕީއެމްގެ ސެކްރެޓަރީ ޖެނެރަލްކަމުން ތޮލާލް ވަކި ކުރެވިދާނެ ކަމާ މެދު ވެސް ބައެއް ފަރާތްތަކުން ސުވާލު އުފައްދަ އެވެ.
މި ކަމާ ގުޅޭ ގޮތުން ތޮލާލްގެ ބަހެއް ނުލިބުނެވެ.
ތޮލާލަކީ ޔާމީނާ އެއްވަރަށް އިންތިހާބީ ރައީސް ޑރ. މުހައްމަދު މުއިއްޒާ ވެސް ވަރަށް ގާތް ބޭފުޅެކެވެ. އަދި މިދިޔަ މަހު ބޭއްވި ރިޔާސީ އިންތިހާބުގައި މުއިއްޒުގެ ތަރުޖަމާނަކީ ވެސް ތޮލާލެވެ.
ތޮލާލް މަގާމުން ވަކިކުރުމުގެ މައްސަލަ ކުރިމަތިވިއިރު، އަންނަ އަހަރު ބާއްވާ ރައްޔިތުންގެ މަޖިލިހުގެ އިންތިހާބުގެ ޕްރައިމަރީ އަށް ޕީޕީއެމް/ޕީއެންސީ ގުޅިގެން ހުޅުވައިލުމުގެ ތައްޔާރީތައް އޮތީ ކުރިއަށެވެ.
ރިޝްވަތާއި މަނީލޯންޑަރިންގެ ކުށް ސާބިތުވުމުން މިދިޔަ އަހަރުގެ ޑިސެމްބަރު 25 އިން ފެށިގެން ޖަލަށް ލާފައިވީ ނަމަވެސް ސިއްހީ ސަބަބުތަކަށްޓަކައި މި މަހުގެ 1 ގައި އެ މަނިކުފާނު ވަނީ ގޭ ބަންދަށް ބަދަލުކޮށްފަ އެވެ. އަދި މިދިޔަ އާދިއްތަ ދުވަހުން ފެށިގެން ދިން އިތުރު ލުޔާ އެކު މިހާރު ޔާމީން ހުންނެވީ މާލެ ބަންދުގަ އެވެ. އެހެންވެ، އެ މަނިކުފާނު މިހާރު ގެންދަވަނީ އަމިއްލަފުޅަށް އިންތިޒާމްކުރައްވައި ސިޔާސީ ހަރަކާތްތައް ހިންގަވަމުންނެވެ.
ޕީޕީއެމުން ރޭ ބޭއްވި ޖަގަހަ ޖަލްސާގައި ވެސް ބައިވެރިވެވަޑައިގެން ވާހަކަފުޅު ދެއްކެވި އެވެ.
ކަރެކްޝަނަލް ސާވިސް އިން ބުނެފައިވާ ގޮތުގައި، ގޭބަންދުގެ ލުއި ތެރޭގައި މީހުންނާ ބައްދަލުކުރެއްވުން ހިމެނުނަސް ސިޔާސީ އެއްވުންތަކާއި ޖަލްސާތަކާއި ހަރަކާތްތަކުގައި ބައިވެރިވުމުގެ ހުއްދައެއް އެމަނިކުފާނަށް ނުދެ އެވެ. އެކަންތައް އެގޮތަށް ކުރާ ނަމަ، މޮނިޓާކޮށް އަޅަން ޖެހޭ ފިޔަވަޅު އަޅާނެ ކަމަށް ވެސް ކަރެކްޝަނަލް ސާވިސް އިން ބުނެފައިވެ އެވެ.