29 އޮކްޓޯބަރ 2023 - 00:04
ރިޝްވަތާއި މަނީލޯންޑަރިންގެ ކުށް ސާބިތުވެގެން 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ އަބްދުﷲ ޔާމީން ގޭބަންދަށް ބަދަލުކުރުމަށް ފަހު އަނެއްކާ ވެސް ބަންދަށް އިތުރު ލުޔެއް ދީފި އެވެ.
ޖަލުގައި ހުރުމަށް ފަހު ޔާމީން ގެޔަށް ބަދަލުކުރީ ރިޔާސީ އިންތިހާބަށް ފަހު މި މަހުގެ އެއް ވަނަ ދުވަހު އެވެ. އެއީ ސިއްހީ ސަބަބުތަކަށްޓަކައި ކަމަށް ކަރެކްޝަންސް އިން ވަނީ ބުނެފަ އެވެ.
ޔާމީން މިހާރު ވަނީ ރަށު ބަންދަށް ބަދަލުކޮށްފައި ކަމަށް ބައެއް ނޫސްތަކުން ރިޕޯޓްކޮށްފައި ވިޔަސް ކަރެކްޝަންގެ މީޑިއާ އޮފިޝަލަކު "މިހާރު" އަށް ވިދާޅުވީ ބޭސްފަރުވާގެ ކަންކަމަށް، ކަރެކްޝަނަށް އެންގުމަށް ފަހު ގެއިން ބޭރަށް ވަޑައިގަތުމުގައި ޔާމީނަށް ލުއިތަކެއް ދީފައިވާ ކަމަށެވެ.
އިތުރު ތަފްސީލެއް ނުދެއްވަ އެވެ.
ޔާމީނަށް ޖަލަށް ލުމަށް ކޮށްފައިވާ ހުކުމުގެ އިސްތިއުނާފް ހައި ކޯޓުން ނިމޭނެ ދުވަހެއް އަދިވެސް ނޭނގެ އެވެ. މައްސަލަ ލަސްކުރާ ކަމަށް ބުނެ ޔާމީންގެ ވަކީލުން ކަންބޮޑުވުން ފާޅުކުރައްވައި، މިއީ ބަޔަކު ޕީޖީއާ ގުޅިގެން ގަސްތުގައި ކުރާ ކަމެއް ކަމަށް ވެސް ވަނީ ތުހުމަތުކޮށްފަ އެވެ.
އިންތިހާބީ ރައީސް މުއިއްޒު ވަނީ ގާނޫނީ ހަމަަތަކުގެ މަތިން ޔާމީން މިނިވަން ކުރައްވާނެ ކަމަށް ތަކުރާރުކޮށް ވިދާޅުވެފަ އެވެ.