22 އޮކްޓޯބަރ 2023 - 07:44
ބުދަ ދުވަހާ ގުޅޭ
އަހަންނަށް އެނގުނީ، ސަލްވާގެ ވަރަށް ނާމާން ސިއްރެކެވެ. އަހަންނަށް ކުރެވުނީ ހައިރާންކުރަނިވި ތަޖުރިބާއެކެވެ. އެ ހުވަފެން ފެށުނީ މިހެންނެވެ. އަހަންނަށް ފެނުނީ، އަތްދަނޑިމަތީގައި ކޮންމެވެސް އެއްޗެއް ބާއްވައިގެން ސަލްވާ ރޮނިކޮށެވެ. އޭނަ އިނީ އެނދުގައި އިށީނދެ، ދެފައި ދަމައިލައިގެންނެވެ. ކޮޓަރިއަކު އެހެން މީހަކު ނެތެވެ. ސަލްވާ ރުއީ، މީހަކަށް އަޑުނީއްވާ ރޯހެންނެވެ. އޭނަ އުޅުނީ ހަދާނެގޮތެއް ނޭނގިގެން އުޅޭހެންނެވެ. އަހަރެން އިނީ ފަންގިފިލާގައި އިށީނދެގެންނެވެ. މަދިރިއަކަށް ވެގެންނެވެ. އެހެން މީހެއްގެ ހުވަފެނުގެ ތެރެއަށް ވަންނަ އިރު އިންސާނެއް ސިފައިގައި ހުރުން ލާޒިމެއް ނޫނެވެ. ސިފަ އިހުތިޔާރުކުރުމަކީ އަމިއްލަ އިހުތިޔާރުގައި އޮންނަ ކަމެއްހެނެއް ހިޔެއްނުވެއެވެ.
ދުއިސައްތައެއްހައި ފޫޓު ދުރުން މަދިރިއަށް ލޭ ވަސް ދުވައެވެ. އިންސާނަކަށް މީރުވަސް ދުވާ ފަދަ އިހުސާސަކާ އެކުގައެވެ. އަހަންނަށް ދުވީ މީރުވަހެއް ނޫނެވެ. އާދަޔާހިލާފު ލޭ ވަހެކެވެ. ކޮޓަރި އަނދިރިއެވެ. އިންސާނަކަށް އެ ތަނަކުން އެޔެއްމިޔެއް ވަތްކެއް ނުވާނެއެވެ. އަހަންނަށް މެންދުރެކޭ އެއްފަދައެވެ. ސަލްވާ އަތްދަނޑިމަތީގައި އޮތީ ކޯޗެއްކަން އަހަންނަށް ނޭނގެނީ އަހަންނަށް އިނދެވުނު ދިމާއެއްގެ ސަބަބުންނެވެ. އަހަރެން އުދުހިގަތީމެވެ. ސަލްވާޔާ ކައިރިވަމުންއައި އިރު އަހަންނަށް ފެނުނު މަންޒަރު ގަބޫލުކުރަން ދަތިވިއެވެ. ސަލްވާ ހިފާއްޓައިގެން އިނީ، ދެންމެ ވިހޭ ކުއްޖެކެވެ. އެ ހިސާބުން އަހަންނަށް އަނދިރިވީއެވެ. ސަލްވާއަށް ހޭލެވިގެން އެ ހުވަފެން ނިމުނީމައި، އަހަންނަށް ވެސް ހުވަފެން ނިމުނީއެވެ. އަހަރެން ހޭލައިގެން އެތައް އިރަކު ވިސްނަން އޮތީމެވެ. ހިތަށްއެރިއެވެ. ސަލްވާއަށް އެ ފެނުނީ ކޮން ހުވަފެނެއްބާއެވެ؟ އެއީ އޭނައަށް އިބިލީސް ދެއްކި ބިރުވެރި މަންޒަރުތަކެއްހެއްޔެވެ؟ ނުވަތަ ސަލްވާގެ މާޒީގައި ހިނގާފައިވާ ބިރުވެރި ހާދިސާއެއްހެއްޔެވެ؟
އެތައް އިރަކު ވިސްނަން އޮވެފައި ނިދީމެވެ. އަނެއްކާ ވެސް ސަލްވާގެ ހުވަފެނަށް ވަނުމުގެ އުންމީދުގައެވެ. ދެން ފެނުނީ އައިސްއަލަމާރި ހުޅުވައިގެން، އެތައް އިރެއްވަންދެން އައިސްއަލަމާރި ތެރެއަށް ސަލްވާ ބަލަންހުރި ތަނެވެ. އަހަންނަށް ސަލްވާ ފެނުނީ ވަރަށް ތިރިން ބަލާ މީހަކަށް ފެންނަ ގޮތަށެވެ. އަހަންނަކީ ހިންޏެއް ނުވަތަ އެ ފަދަ ސުވިއްޕެކެވެ. އަހަންނަށް ވުރެ ބޮޑަށް އަހަންނަށް ވިސްނުނީ ސަލްވާއަށެވެ. ތުނިތުނި ނިދާހެދުމުގައި ސަލްވާ ވަރަށް ރީއްޗެވެ. އަނެއްކާ ވެސް އަހަންނަށް އަނދިރިވީއެވެ. ދެން އެ ރެޔަކު ސަލްވާއަކަށް އެހެން ހުވަފެނެއް ނުފެނެއެވެ. ނުވަތަ ސަލްވާ އިނީ ހޭލައެވެ.
އަހަރެންގެ ބޮލުގަރިހުން ދާއިމީކަމަކަށްވިއެވެ. ހެނދުނު ހޭލާ އިރު ވެސް، ރޭގަނޑު ނިދާ އިރު ވެސް ރިއްސައެވެ. ކެތްނުކުރެވޭ ވަރަކަށް ނޫނެވެ. ރިހުން ހުންނަނީ ކުޑަކޮށެވެ. މެދެއްނުކެނޑެއެވެ. ހިތަށްއެރިއެވެ. ފަރުވާކުޑަކޮށްލައިގެން ނުވާނެއެވެ. ނަފުސާނީ ބަލިގަނޑަކަށް ވެދާނެއެވެ. ސައިކިއޭޓްރިސްޓެއް ކައިރިއަށް ދާކަށް އަހަރެން ބޭނުމެއް ނޫނެވެ. އަމުދުން ހައިފާ ގޮވައިގެންނެވެ. އެހެނަސް އަހަރެން ދިޔައީމެވެ. އެންމެ ދާން ބޭނުންނުވާ މީހާޔާ އެކުގައި، ދާން އެންމެ ބޭނުންނުވާ ތަނަށެވެ. ނަސީބުހުރި ގޮތް ދެކިބަލާށެވެ.
އަހަރެން ބައްދަލުކުރި ޑަކުޓަރަށް ކިޔަނީ މީޒާއެވެ. ސުކޫލެއްގެ އިދާރީބައިގައި އަހަރެން ވަޒީފާއަދާކުރި ދުވަސްވަރު، ދެ ފަހަރެއްގެމަތިން މީޒާޔާ ދިމާވިއެވެ. އެއީ ދިގުވާހަކައެކެވެ. ކުރުކޮށް ބުނާ ނަމަ، މީޒާގެ ދަރިފުޅުގެ ކަމަކާ، ދެތިން ފަހަރަކު މީޒާ ސުކޫލްގެ އިދާރީބަޔަށް އަންނަންޖެހުނެވެ. ކޮންމެ ފަހަރަކު ވެސް، ފުރަތަމަ ދިމާވަނީ އަހަންނާއެވެ. އަހަރުމެން ދެ މީހުން ވެސް އެކަކުއަނެކަކަށް ވަރަށް އިހުތިރާމުކުރީމެވެ. އެހީތެރިވީމެވެ. ރަސްމީ ގޮތުން އޮންނަންޖެހޭ ގުޅުމަށް ވުރެ ބޮޑަށް އަހަރުމެންގެ މެދުގައި އޮތީ އެކުވެރިކަމުގެ ގުޅުމެކެވެ. އެ އެކުވެރިކަމުގެ މިންގަނޑު ހުރީ އެއްވަރެއްގައި ހިފޭއްޓިފައެވެ. ބޮޑެއް ވެސް ކުޑައެއް ވެސް ނުވެއެވެ. މިވާދެއް ހަމަޖައްސައިގެން އަހަންނާއި ހައިފާ އެ ކުލިނިކަށް ވަން އިރު، ސަލްވާ އެ ތަނުން ނުކުންނަނީއެވެ. އޭނަ އެ ތަނަށް އައީ ކީއްވެގެންހެއްޔެވެ؟ ފުރަތަމަ ސުވާލަކީ އެއީއެވެ. ވަރަށް ގާތްކޮށް ހައިފާޔާ ދިމާއަށް ސަލްވާ ހީނލީ ކީއްވެގެންހެއްޔެވެ؟ އެންމެ މުހިންމު ސުވާލަކީ އެއީއެވެ. ހައިފާ އުޅުނީ ނުފެންނަކަމަށް ހަދާށެވެ. އެ ހިސާބުން ސަލްވާގެ މޫނުމަތިން ނުތަނަވަސްކަން ފާޅުވެ، އަހަންނާ ދިމާއަށް ނުބަލަން މަސައްކަތްކޮށް، އެންމެ ފަހުން ނުބަލައެއް ވެސް ނުވިއެވެ.
"ހައިފާ އޭނަ ދަންނަންތަ؟" ސަލްވާ ދިޔުމުން އަހަރެން ހައިފާޔާ ސުވާލުކުރީމެވެ.
"ފަހުން.." އެ ވަގުތު ހައިފާ ބުނެލީ އެހެންނެވެ.
މީޒާޔާ ބައްދަލުކޮށް ދެކެވުނު ވާހަކައިގައި، ހުވަފެން ކޮންޓުރޯލުކުރުމާއި، އެހެން މީހުންގެ ހުވަފެނަށް ވަންނަން އަހަރެން ދަސްކުރި ވާހަކަ ތިލައެއް ނުކުރަމެވެ. ހައިފާ ދުރުދުރުން އަހަންނަށް ހަނދާންކޮށްދިން ވެސް މެއެވެ. އެ ވާހަކަނުދެއްކީ، އަހަރުމެން ދެމީހުންގެ މެދުގައި އޮތް އިހުތިރާމުގެ ރޮދިފަށް ކެނޑިދާނެތީއެވެ. އަހަރެން ހިތަށްއެރީ މިހެންނެވެ. އެ ވާހަކަ އަހަރެން ބުނެފިއްޔާ އަހަރެން ވާނީ މޮޔައަކަށެވެ. އެ ފަދަ ކަމެއް އަހަރެން ދަސްކުރާނީ ސަބަބެއް އޮވެގެންނެވެ. އެ ސަބަބު އަހަންނަކަށް ކިޔައެއް ނުދެވޭނެއެވެ. އަނެއްކޮޅުން، އެހެން މީހެއްގެ ހުވަފެނަށް ވަނުމުގެ ކުރިން އެ މީހާގެ ހުއްދަހޯދަން ޖެހެއެވެ. ރީތި އުސޫލަކީ އެއީއެވެ. އަހަރެން އެ ކަމެއް ނުކުރަމެވެ. ދެން ބެދޭނީ ލަދެއްގައެވެ. އަހަރެންގެ "ބައްޔަށް" މީޒާ ބޭހެއް ނުދެއެވެ. އޭނަ އެދުނީ، ދުވަސްކޮޅެއްވަންދެން އައުމަށެވެ. ސިކުނޑިއަށް ލުއިދިނުމަށެވެ. އަހަރެން އަރާމުކުރުމަށެވެ.
ސަލްވާގެ ވާހަކަ ހައިފާއެއް ނުދެއްކިއެވެ. ހަނދާންނެތުނުކަމަށްހެދިގެން ހުރީއެވެ. އަހަރެން އަނެއްކާ ވެސް ޖެހުނީ އެ ވާހަކަ އަހާށެވެ. ހައިފާ ކިޔައިދިނެވެ. ސަލްވާއަކީ ހައިފާގެ ރައްޓެއްސެކެވެ. އޭނަ ދިމާވީ އިންސްޓަގްރާމުންނެވެ. އަހަރެންގެ ހުވަފެން ސީދާވީއެވެ. އެކަމަކު އަހަރެން ބުނި ސަލްވާއާއި ހައިފާގެ އެކުވެރި ސަލްވާއަކީ އެކަކުކަން ހައިފާއަށް އެނގުނީ ފަހުންނެވެ. އެނގުނު ހިސާބުން ހައިފާ ބޭނުންވީ ސަލްވާޔާ ވީހައި ވެސް ދުރުގައި އަހަރެން ހުންނާށެވެ. އެއީ އަނެއް ވާހަކައެވެ. ކުރުކޮށް ބުނާ ނަމަ، އަހަރެންނަށް ބަދަލުވެވުނު ސިފަޔަކީ ސަލްވާ ފޫހިވެފައިވާ ސިފައެކެވެ. ސަލްވާއަށް އެންމެ ލޯބިވެވުނީ ވެސް، އެންމެ ބޮޑު ކެއްސެއްދިނީ ވެސް އެ ސިފައެވެ.
ސަލްވާގެ ފުރަތަމަ ލޯބިވެރިޔަކީ ރަޒީނެވެ. އޭނައަކީ، ސަލްވާ ބޭނުންވި ހުރިހައި ސިފަތަކެއް ހަމަ ޒުވާނެކެވެ. ރައްޓެހިވެގެން އެތައް ދުވަހެއްވަންދެން އުޅެފައި، ކައިވެންޏާ ހިސާބަށް ދިޔުމުން ރަޒީން ފިލީއެވެ. އަހަރެން ފެނުމުން ރަޒީން މަތިން ސަލްވާ ވަރަށް ހަނދާންވެއެވެ. އުނދަގޫވެއެވެ. އަހަރެން ފެނުނަސް ނުފެންނަކަމަށްހަދަނީ އެހެންވެއެވެ. ފަހުން އެ ކަން އެނގުމުން، އެ ވާހަކަ ބުނަން ހައިފާއަށް ނުކެރުނީއެވެ. އެއްވެސް މީހެއް ދެކެ ސަލްވާ ދެނެއް ލޯތްބެއް ނުވާނެއެވެ. ސަލްވާގެ ހިތް ހަލާކުވެއްޖެއެވެ. މާޔޫސްވެގެން ގޮސް ފަރުވާހޯދަންޖެހޭ ވަރުގެ ނަފުސާނީ ބައްޔަކަށް ވެއްޖެއެވެ. ސަލްވާއަކީ، ރަޒީންގެ ދެވަނަ ލޯބިވެރިޔާއެވެ. އެ ކަން އެނގި، އޭގެ ސަބަބުން ކުރިމަތިވި ކަންތައްތައް އަދިވެސް ސަލްވާއަށް ހުވަފެނުން ފެނެއެވެ.
ސިއްސައިގެންގޮސްފައި ހޭލެވެއެވެ. ނިދިމަދުވެގެން ސަލްވާ ޑަކުޓަރަށް ދައްކާތާ ވެސް އެތައް ދުވަހެއް ވެއްޖެއެވެ. ހައިފާގެ ހިތުގައި ސަލްވާއަށް ޓަކައި އޯގާތެރިކަމާއި ހަމުދަރުދީ އުތުރުއަރަނީއެވެ. އަހަރެން ހިތަށްއެރިއެވެ. ހައިފާއަށް އެނގެނީ އެއްބަޔެވެ. ސަލްވާޔާ ބެހޭ ގޮތުން އެހެން ހުރިހައި މީހުންނަށް ވެސް އެނގެނީ އެއްބަޔެވެ. އަލިގަދަ ފަރާތެވެ. އަނދިރި ފަރާތް އޮތީ ފަރުދާވެފައެވެ. ދިވެއްސަކު މީގެ ކުރިން ނުކުރާ ކަހަލަ ކަމެއް ސަލްވާ ކޮށްފިއެވެ. އަހަންނަށް ފެނުނު ހުވަފެނާއި، ހައިފާގެ ވާހަކަ އެއްކޮށްލުމުން ނުކުންނަ ޖަވާބު އަހަންނަށް ވަރަށް ބިރުވެރިއެވެ.
އެހެން ރެޔެކެވެ. އަހަރެންގެ ހުވަފެން ފެށުނު އިރު އަހަރެން އިނީ ކާރެއްގައެވެ. ދުއްވަންއިނީ އަހަންނެވެ. ކާރުގެ މީޓަރުގެ ނަންބަރުތައް އަހަންނަކަށް ސާފެއް ނުވެއެވެ. އެކަމަކު، އެ ފަހަރު އަހަންނަށް ސަލްވާގެ ގެ ފެނުނެވެ. އާންމު އިންސާނަކު ވެސް ވަންނާނެހެން އަހަރެން އެ ގެއަށް ވަނީމެވެ. އެ ގެއިން ދެމީހަކާ ދިމާވިއެވެ. އެކަކު ވެސް އަހަންނަކަށް ނުބަލައެވެ. އަހަންނަށް އެ ދެމީހުން ވެސް ފެނެއެވެ. ހިތަށްއެރިއެވެ. އެހެން މީހުންނަށް އަހަރެން ނުފެންނަނީހެއްޔެވެ؟ ސަލްވާގެ އެޕާޓުމަންޓު ދޮރުމަތީގައި، އެތެރެއަށް ވަންނާނެ ގޮތެއް ނޭނގިފައި އަހަރެން ހުއްޓައި، ސަލްވާ ނިކަން ބާރަށް އައެވެ. ދޮރުހުޅުވައިފައި އެތެރެއަށް ވަދެގެން ގޮސް އޭނަގެ ކޮޓަރިއަށް ވަނެވެ. އަހަރެން އެޕާޓުމަންޓު ތެރެއަށް ދެމިގަތީމެވެ. އެ ތާކު އެހެން މީހަކު ނޫޅެއެވެ.
ސަލްވާ ކޮޓަރިން ނުކުމެފައި، ކޮޓަރި ތަޅުލަން އުޅެފައި، ތަޅުނުލައި އެޕާޓުމަންޓުން ނުކުމެފައި އެޕާޓުމަންޓުގެ ދޮރު ތަޅުލިއެވެ. އަހަރެން އެޕާޓުމަންޓު ތެރެއަށް ނަޒަރުހިންގައިލީމެވެ. އެ ތަނުގައި ބޮޑު، ކަޅު އައިސްއަލަމާރިއެއް ހުއްޓެވެ. އެކަމަކު، ހުވަފެނުގައި އެތައް އިރެއް ވަންދެން ސަލްވާ ހުޅުވައިގެންހުރީ ކުޑަ، ހުދު އައިސްއަލަމާރިއެކެވެ. އަހަރެން ގޮސް ސަލްވާގެ ކޮޓަރި ހުޅުވައިލީމެވެ. ހުވަފެނުން އަހަންނަށް ފެނުނު ސަލްވާގެ ކޮޓަރިއާއި އެ ކޮޓަރީގެ ހަމަ އެކަނި ތަފާތަކީ އެނދު ހުރި ދިމާއެވެ. އެ ކޮޓަރީގައި ކުޑަ އައިސްއަލަމާރިއެއް ހުއްޓެވެ. އަހަރެން އެ އައިސްއަލަމާރި ހުޅުވައިލަން ދޮރުގައި ހިފި އިރު ދޮރު ހުރީ ތަޅުލައިފައެވެ. އެއީ ކީއްވެގެންހެއްޔެވެ؟ މާ އަގު ބޮޑު އައިސްކިރިމެއް ހުރީހެއްޔެވެ؟ ނޫނެކެވެ. އެ ތަނަކީ އެހެން މީހަކު އުޅޭ ތަނެއް ނޫނެވެ.
ހަދާނެ ގޮތެއް ނޭނގިގެން އެތައް އިރަކު އެ ކޮޓަރީގައި އަހަރެން އުޅުނީމެވެ. އެކި ކަހަލަ ބޭސްތަކާއި، ނަފުސާނީ ބަލިތަކާ ބެހޭ ފޮތްތައް ހުއްޓެވެ. ވިހާ އިރު ދަރިފުޅު މަރުވެފައި އޮތުމުން، ދެން ދިމާވާ ހިތްދަތިކަމާ ކުރިމަތިލާން ދަސްކޮށްދޭ ފޮތެއް ވެސް އޮތެވެ. ފޮތުގެ އެތެރެއެއް އަހަރެން ނުބަލަމެވެ. އެހެން ހުއްޓައި، ކުއްލިއަކަށް ދޮރު ހުޅުވި އަޑުއިވުނެވެ. ސިއްސައިގެން ގޮސްފައި، ފިލަން އަހަންނަށް އުޅެވުނެވެ. އެކަމަކު، ފިލަން ނުޖެހޭނެކަން ވިސްނުމުން، އެއްފަރާތަކަށް ޖެހިލައިގެން ހުރީމެވެ. ސަލްވާ ވަނެވެ. އޭނަ ހުރީ އޮފީސް ޔުނީފޯމުގައެވެ. ވަރުބަލިވެފައެވެ. ޔުނީފޯމު ބާލައި ކޮނޑުގައި އަޅުވައިފައި، ވަރުބަލިކަމާއެކު އެނދުގައި އޮށޯވެލިއެވެ. އިރުކޮޅަކު އެހެން އޮތެވެ. ކުއްލިއަކަށް ތެދުވިއެވެ. ތަޅުދަނޑިން އައިސްއަލަމާރި ހުޅުވައިލިއެވެ. އެތައް އިރަކު ބަލަން ހުއްޓެވެ. އަހަރެން މަޑުމަޑުން ކައިރިއަށް ޖެހިލީމެވެ. އައިސްއަލަމާރި ތެރެ ބަލައިލީމެވެ. ސިއްސައިގެންގޮސްފައި އަހަންނަށް ހޭލެވުނެވެ. ހޭލެވުނު އިރު ވެސް އަހަރެންގެ ހިތުވިންދު ހަމައަކަށް ނޭޅެއެވެ. ހިތަށްއެރިއެވެ. އަހަންނަށް މި ކުރެވުނީ ކީއްހެއްޔެވެ؟
ނުނިމޭ