20 އޮކްޓޯބަރ 2023 - 22:40
މިއަހަރުގެ ގައުމީ ޖޫނިއާ ސާފިން ޗެމްޕިއަންޝިޕްގައި ފުރަތަމަ ފަހަރަށް "މަރުހަބާ ކަޕް" ނަމުގައި ބޭއްވި ޓީމް އިވެންޓްގެ އެއްވަނަ ޓީމް ސައްޔިދު ހޯދައިފި އެވެ.
ޓީމް އިވެންޓުގައި ޖުމްލަ ހަތަރު ޓީމު ވާދަކުރި އެވެ. އެއީ ޓީމް ސައްޔިދުގެ އިތުރުން ޓީމް ޔަސީން އާއި ޓީމް ޝާނިފް އަދި ޓީމް ކައި އެވެ. ކޮންމެ ޓީމެއްގައި ވެސް ތިން ރާޅާއެޅުންތެރިން ވާދަކުރި އެވެ.
އެއްވަނަ ހޯދި ޓީމް ސައްޔިދު ގައި ހިމެނުނު ރާޅާއެޅުންތެރިންނަކީ ސައްޔިދު ސަލާހުއްދީނާއި ނޫހް މުހައްމަދު ދުނެއިމް އިރުޝާދު އަދި ރާއިން ހާޝިމް އެވެ.
"ޖޫނިއާ ބައިގަ ޓީމް އިވެންޓް މިފަހަރު ހިމަނާލީ ހަމަ މި ކުދިންނަށް މިކަން ތަޖުރިބާ ކޮށްލުމުގެ ފުރުސަތު ފަހިކޮށްދޭން،" މިއަހަރުގެ ޖޫނިއާ ޗެމްޕިއަންޝިޕްގައި ޓީމް އިވެންޓް ހިމެނުމުގެ މަގްސަދާ ގުޅޭގޮތުން ސާފިން އެސޯސިއޭޝަން (އެމްއެސްއޭ) ގެ ނައިބު ރައީސް ޝާހިދު އަމީން ވިދާޅުވި އެވެ.
"މިފަހަރު ވާދަވެރިކޮށް ގައުމީ ލެވެލްގަ ރޭންކް ކުރުމުގެ މަގްސަދަކު ނޫން ޓީމް އިވެންޓް ބޭއްވީ. ކުރިމަގުގައި ރާޅާއެޅުމުގައި ލީޑު ކުރަން ތިބޭނީ މިހާރު މިތިބަ ޒުވާން ކުދިން. ސީނިއާ ލެވެލް އަށް ދާއިރު، ޓީމް އިވެންޓްތައް އޮންނާނެ. އެހާހިސާބަށް ދާންވާއިރަށް ކުދިން އަހުލުވެރި ކުރުވުން އެއީ މުހިއްމު ކަމެއް ގޮތުގައި އަޅުގަނޑުމެން ދެކެނީ."
ޓީމް އިވެންޓު ހީޓުގައި އެންމެ ފަހު ވަގުތާ ޖެހެންދެން ވެސް އެންމެ ކުރީގައި އޮތީ އެންމެ ސީނިއާ އެތުލީޓުން ހިމެނުނު ޓީމް ޝާނިފް އެވެ. އެޓީމުގައި ހިމެނޭ އިސްމާއިލް މަދުހު އަހުމަދާއި ޝާނިފް ޝަފީގު އަދި މުހައްމަދު ޒަޔާން ވަނީ ޖުމްލަ 16.05 ޕޮއިންޓް އެއްކޮށްފަ އެވެ.
ހީޓު ނިމެން ކުޑަތަން ވެފައި ވަނިކޮށް ވެސް ޓީމް ޝާނިފް އާ އެންމެ ގާތުން ވާދަކުރީ ޓީމް ސައްޔިދާއި ޓީމް ޔަސީން އެވެ. ޓީމް ޝާނިފްގެ ތިިން ރާޅާއެޅުންތެރިން ވެސް ރާޅާ އަޅާ ނިންމާލިއިރު، ޓީމް ސައްޔިދުގެ ކެޕްޓަން ސައްޔިދު ސަލާހުއްދީނާއި ޓީމް ޔަސީންގައި ހިމެނޭ މުހައްމަދު އިނާން އަބްދުލް ހަންނާން އަށް ނަތީޖާ އަނބުރާލުމުގެ ފުރުސަތު އޮތީ ފަހިކޮށެވެ.
ނަތީޖާ އެނބުރުނީ އެންމެ ފަހު ވަގުތު ސައްޔިދާއި އިނާން އަޅާލި ރާޅުންނެވެ. އިނާން އެޅި ފަހު ރާޅަށް 5.50 ޕޮއިންޓް ހަމަކޮށް، ޓީމް ޔަސީން އަށް ޖުމްލަ 17.45 ޕޮއިންޓް ހަމަކޮށްދިން އިރު، ޓީމް ސައްޔިދު އެއްވަނައަށް އެރީ، ސައްޔިދު އަޅާލި ފަހު ރާޅަށް ހޯދި 6.25 ޕޮއިންޓާ އެކު ޖުމްލަ 18 ޕޮއިންޓުގެ ސްކޯއެއް ހޯދައިގެންނެވެ.
މިއާ އެކު ޓީމް ސައްޔިދު އެއްވަނައަށް ޖެހިލިއިރު، ދެވަނައިގައި ނިންމީ އިނާން އާއި ޔަސީން އަހުމަދު ނާޝިދާއި އަހުމަދު ނިހާލް ހިމެނުނު ޓީމް ޔަސީން އެވެ. ޓީމް ޝާނިފް އަށް ލިބުނީ ތިންވަނަ އެވެ.
ހަތަރުވަނައިގައި ނިންމި ޓީމް ކައި އަށް ލިބުނީ ޖުމްލަ 9.75 ޕޮއިންޓެވެ. މި ޓީމުގައި ހިމެނުނީ ޔޫސުފް ކަޔާން ހަމްދާން ޒަކީ އާއި އަހުމަދު އާލް އާދިލް އަދި މުހައްމަދު ސާއި އަހުމަދު ޝިބާއު އެވެ.
ޖޫނިއާ ޗެމްޕިއަންޝިޕް މިއަދު ނިންމާލިއިރު، ސައްޔިދު ވަނީ 18 އަހަރުން ދަށުގެ އުމުރުފުރާގެ ޗެމްޕިއަންކަން ހޯދައިފަ އެވެ. އަދި 14 އަހަރާއި 16 އަހަރުން ދަށުގެ ޗެމްޕިއަންކަން ހޯދީ ޔަސީން އެވެ.