06 ފެބުރުއަރީ 2017 - 14:56
އޭއެފްސީ ކަޕްގެ ޕްރިލިމިނަރީ ބުރުގެ ދެ ވަނަ ލެގުގައި މާދަމާ މާލޭގައި ކުޅޭ މެޗަށް ނުކުންނައިރު ދިވެހި ފުޓްބޯޅަ އަށް ފަރިތަވެއްޖެ ކަމަށާއި ވެލެންސިއާ ބަލިކުރެވޭނެ ކަމުގެ އުއްމީދު އެބައޮތް ކަމަށް ތިމްޕޫ ސިޓީގެ ކޯޗު ޕަސަން ޝެރިން ބުނެފި އެވެ.
ޕްލޭއޮފް ބުރުން ޖާގަ ހޯދަން މާދަމާ ތިމްޕޫ އާއި ވެލެންސިއާ ވާދަކުރާއިރު، މި ދެ ޓީމު ބޫޓާނުގައި ކުޅުނު މެޗު އެއްވަރުވީ ލަނޑެއް ނުޖެހި އެވެ.
މާދަމާ ހަވީރު ކުޅޭ މެޗުން މޮޅުވާ ޓީމަކަށް އަނެއް ބުރުން ފުރުސަތު ލިބޭނެ އެވެ. ލަނޑެއް ނުޖެހި އެއްވަރުވެއްޖެ ނަމަ އިތުރު ވަގުތު ކުޅެ އަދި ޕެނަލްޓީ ޖަހާނެ އެވެ. ސްކޯ ޑްރޯއެއްވެއްޖެ ނަމަ ފުރުސަތު ލިބޭނީ ތިމްޕޫ އަށެވެ.
މެޗުގެ ކުރިން މިއަދު މެންދުރު ގަލޮޅު ދަނޑުގައި އޮތް ނޫސްވެރިންގެ ބައްދަލުވުމުގައި ތިމްޕޫގެ ކޯޗު ޕަސަން ބުނީ ބޫޓާނާއި ރާއްޖެ ކްލަބް ލެވެލްގައި މާގިނައިން ކުޅެފައިނުވީ ނަމަވެސް ގައުމީ ޓީމު ގިނަ މެޗުތަކެއް ކުޅެފައިވާތީ ރާއްޖޭގެ ކުޅުންތެރިންގެ ފެންވަރު އެނގޭ ކަމަށެވެ. ތިމްޕޫ ޓީމުގައި ބޫޓާން ގައުމީ ޓީމަށް ކުޅޭ ދިހަ ވަރަކަށް ކުޅުންތެރިޔަކު ހިމެނެ އެވެ.
"ބޫޓާނާއި ރާއްޖެ ވަނީ ގިނަ މެޗުތަކެއް ކުޅެފައި. ކްލަބް ލެވެލްގައި ކުޅެފައިނުވި ނަމަވެސް ގައުމީ ޓީމު ގިނަ މެޗުތަކެއް ކުޅެފި. އަހަރެމެންނަށް އެނގޭ ދިވެހި ފުޓްބޯޅަ. ފުރަތަމަ ލެގުގައި ވެލެންސިއާއާ ކުޅެގެން އަހަރެމެންނަށް އިތުރަށް ދަސްވެއްޖެ،" ޕަސަން ބުންޏެވެ. "ފުރަތަމަ ލެގުގައި ކުރި މަސައްކަތުގެ ދެ ގުނަ ނެރެގެން ވެލެންސިއާ ބަލިކުރެވޭނެ."
މާދަމާގެ މެޗަށް ނުކުންނައިރު ވަކި ޓީމަކަށް ބޮޑު އެޑްވާންޓޭޖެއް ނެތް ކަމަށް ޕަސަން ވަނީ ބުނެފަ އެވެ.
"ފުރަތަމަ މެޗު ކުޅުނީ ވަރަށް އުހުގައި. މައިނަސް ވަން ޑިގްރީ ވަރަކަށް ހުރީ. އެއީ އަހަރެމެންނަށް ވެސް އެންމެ ރަނގަޅު ވަރެއް ނޫން. އެކަމު އޭގެ ޑިސެޑްވާންޓޭޖް ބޮޑުވީ ވެލެންސިއާ އަށް. މާދަމާ 32 ޑިގްރީ ސެލްސިއަސްގައި ކުޅޭއިރު ވެލެންސިއާ މި މާހައުލަށް ރަނގަޅުވާނެ. އެކަމަކު އެއީ މާބޮޑު އެޑްވާންޓޭޖަކަށް އަހަރެމެން ނުދެކެން،" ޕަސަން ބުންޏެވެ.
އޭނާ ބުނީ ރާއްޖޭގެ މެޗު ކުޅޭއިރު ހޫނުވުމުގެ އަސަރު ކުޅުންތެރިންނަށް ކޮންމެވެސް ވަރަކަށް ކުރާނެ ކަމަށާއި އެހެން ނަމަވެސް ޕްރެކްޓިސްތަކުގައި އެއަށް ހޭނިގެން މަސައްކަތް ކުރަން ކުޅުންތެރިންނަށް ބުނެދޭނެ ކަމަށެވެ.
މިއީ ބޫޓާނުގެ ޓީމަކަށް އޭއެފްސީ ކަޕްގައި ވާދަކުރަން ފުރުސަތު ލިބުނު ފުރަތަމަ ފަހަރެވެ. ޕަސަން ބުނީ މިއީ ބޫޓާންގެ ކްލަބް ފުޓްބޯޅަ ކުރިއަރުވަން ލިބިގެންދިޔަ ފުރުސަތެއްގެ ގޮތުގައި ދެކޭ ކަމަށެވެ.
"ކުރިން މި މުބާރާތަކުން ބައިވެރިވުމުގެ ފުރުސަތު އަހަރެމެންނަށް ނުލިބޭ. މިފަދަ ފުރުސަތުތަކަކީ ފުޓްބޯޅައިން ކުރިއަށްދާން ބަލާއިރު ވަރަށް މުހިއްމު ކަމެއް. މި ފަދަ ފުރުސަތެއް އަތުން ދޫވިޔަ ނުދެން އަހަރެމެން މަސައްކަތް ކުރާނަން،" ޕަސަން ބުންޏެވެ.
އޭއެފްސީ ކަޕުގެ ފޯމެޓަށް މި ފަހަރު ގެނެވުނު ބަދަލާ އެކު މުބާރާތް ވަނީ ދެ ފަޅިއަށް ބަހައިފަ އެވެ. އެއާ އެކު ފައިނަލުގައި ކުޅޭނީ އީސްޓް ޒޯން އެއް ޓީމާއި ވެސްޓް ޒޯން އެއް ޓީމެވެ. ރާއްޖޭގެ ޓީމުތައް ވާދަކުރާނީ އީސްޓް ޒޯންގެ ސައުތު އޭޝިއާ ޒޯނުގަ އެވެ.
ޕްލިމިނަރީ ބުރުގެ ދެ ވަނަ ލެގުން ވެލެންސިއާ އާއި ތިމްޕޫގެ ތެރެއިން މާދަމާގެ މެޗުން ކުރިހޯދާ ޓީމެއް ޕްލޭއޮފް ބުރުގައި ކުޅެން ޖެހޭނީ ސްރީލަންކާގެ ކޮލަމްބޯ އެފްސީ އާއި އިންޑިއާގެ މޯހަން ބާގަން ކުޅެގެން މޮޅުވާ ޓީމަކާ ދެކޮޅަށެވެ. މޯހަން ބާގަން ވަނީ ކުޅުނު ފުރަތަމަ ލެގުން ރަށުން ބޭރުގައި 2-1 އިން ކޮލަމްބޯ އެފްސީ ބަލިކޮށްފަ އެވެ.
މިތަނުން ގްރޫޕް ސްޓޭޖަށް ހޮވޭ ޓީމެއް ލައްވާލާނީ ރާއްޖޭގެ މާޒިޔާ އާއި އިންޑިއާގެ ބެންގަލޫރު އެފްސީ އަދި ބަންގްލަދޭޝްގެ ޑާކާ އަމްބާނީއާ އެއް ގްރޫޕެއްގަ އެވެ.
ވެލެންސިއާ އާއި ތިމްޕޫ ކުޅޭ މެޗު ފަށާނީ މާދަމާ ހަވީރު 4 ޖަހާއިރު އެވެ.