04 އޮކްޓޯބަރ 2023 - 12:49
ފެނަކަ ކޯޕަރޭޝަންގެ ޗީފް ފައިނޭންޝަލް އޮފިސަރު (ސީއެފްއޯ) އަބްދުﷲ ވަހީދު ޒިންމާތަކުން އެކަހެރި ކޮށްފައި ގިނަ ދުވަސްތަކެއް ވަންދެން ބެހެއްޓުމަށް ފަހު މިދިޔަ މަހުގެ ފަހުކޮޅު މަގާމުން ވަކިކޮށްފި އެވެ.
ހއ. ހޯރަފުއްޓަށް އުފަން އަބްދުﷲ ވަހީދަށް އެ ވަޒީފާ ދީފައި ވަނީ ސެޕްޓެމްބަރު 11، 2014 ގަ އެވެ. ވަޒީފާ އިން ވަކިކުރީ މިދިޔަ މަހުގެ 26 ގަ އެވެ. ވަޒީފާއިން ވަކިކުރުމުގެ ކުރިން، މިދިޔަ އަހަރުގެ އޮކްޓޫބަރު މަހުގެ 19 އިން ފެށިގެން އޭނާ ހުރީ މަގާމުތަކުގެ މަސްއޫލިޔަތުތަކުން އެކަހެރި ކޮށްފަ އެވެ.
ވަހީދު "މިހާރު" އަށް ވިދާޅުވީ އޭނާ މަގާމުގެ ޒިންމާތަކުން އެެކަހެރި ކުރި ސީދާ ސަބަބު މިހާތަނަށް އަންގާފައި ނުވިޔަސް ބޮޑަށް ލަފާ ކުރެއްވެނީ މައްސަލައަކީ ކުންފުނީގެ ދަރަންޏާ ބެހޭ ކަންބޮޑުވުންތައް ފާޅުކުރެއްވުން ކަމަށެވެ. އެ މައްސަލަތައް ފެނަކައިގެ ބޯޑަށް ގެންދިޔައީ އެއީ ކުރަން ޖެހޭ މަސައްކަތަކަށް ވުމުން ކަމަށް އޭނާ ވިދާޅުވި އެވެ.
ވަހީދު ވިދާޅުވީ ވަޒީފާ އިން ވަކިކުރުމާ ހަމައަށް، މަގާމުގެ މަސްއޫލިޔަތުތަކުން އެކަހެރި ކޮށްފައި ހުރި ސަބަބު ހޯއްދަވަން މަސައްކަތް ކުރެއްވި ކަމަށެވެ. އެކަމަކު ކުރިއެރުމެއް ލިބިވަޑައިނުގެންނެވި ކަމަށް ވިދާޅުވި އެވެ.
"އެމްޑީ އަހުމަދު ސައީދު، އެކަމާ ހިތްހަމަ ނުޖެހިގެން އަޅުގަނޑަށް އަނގަ ބަހުން އޭގެ ހިތްހަމަ ނުޖެހުންތަކެއް އައި. ދެ ފަހަރަކަށް ތިން ފަހަރަކަށް އައި. ރަސްމީކޮށް އެއްވެސް ވާހަކައެއް ބުނެފައެއް ނެތް،" ވަހީދު ވިދާޅުވި އެވެ.
"އެ ދިޔަ އެއް އަހަރު އެއްވެސް މައުލޫމާތެއް ނުދޭ. އެންމެ ކުޑަމިނުން ވަކިކުރި ސަބަބު ބުނެ ނުދޭ. މެނޭޖިން ޑިރެކްޓަރަށް 213 ފަހަރު ގުޅައިގެން ފޯނެއް ނުނެގި. ސަތޭކަ ސާޅީސް ހަތް މެސެޖު ކޮށްގެން ރިޕްލައިއެއް ނުކުރޭ. ސާޅީސް ހަތް މެއިލް ކޮށްގެން އެންމެ މެއިލަކަށް ވެސް ރިޕްލައިއެއް ނުކުރޭ،" ފެނަކައިގެ މެނޭޖިން ޑިރެކްޓަރާ ގުޅުއްވަން ކުރެއްވި މަސައްކަތްތައް މީޑިއާ އަށް ދެއްވަމުން ވަހީދު ވިދާޅުވި އެވެ.
"ހަ ފަހަރަށް ސިޓީ ފޮނުވިން. އެންމެ ސިޓީއަކަށް ވެސް ޖަވާބެއް ނުދޭ. އެއްވެސް މައުލޫމާތެއް ނުދޭ ކަނޑާލިއިރު."
މިދިޔަ މަހުގެ 9 ގައި ބޭއްވި ރިޔާސީ އިންތިހާބުގެ ފުރަތަމަ ބުރުގެ ކުރިން، އެ މަހުގެ 26 ގައި ޑިސިޕްލިނަރީ ކޮމިޓީ އަށް ހާޒިރުކުރި ކަމަށް ވަހީދު ވިދާޅުވި އެވެ.
"އެ ކޮމެޓީގައި ވެސް އަޅުގަނޑާ ސުވާލުކުރީ، މަގާމުގައި ހުރެގެން އެބަ ހުއްޓެއޭ ސަރުކާރާ ދެކޮޅަށް ވަރަށް ބައިވަރު އެއްޗެހި ސޯޝަލް މީޑިއާގައި ލިޔެފައި. އަޅުގަނޑު ފޭސްބުކްގައި ހުރި ހުރިހާ ޕޯސްޓުތަކެއް ކުލަކޮށް ޕްރިންޓް ކޮށްފައި ކޮމެޓީ އަށް ގެންގޮސްފައި ހުރި. އަޅުގަނޑަށް ބޮޑަށް ހީވަނީ އެއީ ހެން މައިގަނޑު ސަބަބަކީ. އެ ދުވަހު ސެޕްޓެމްބަރު 26 ގައި] ވަކިކުރަން ޖެހޭ،"
ވަހީދު ވިދާޅުވި ގޮތުގައި، ކޮމިޓީ އަށް ހާޒިރުކޮށް، އޭނާއާ ދޭތެރޭގައި ބޯޑުގެ ހިތްހަމަ ނުޖެހުންތަކެއް ހުރި ކަން ފާހަގަ ކުރެއްވުނެވެ. އެކަމަކު، އޭނާއާ ގުޅޭ އެއްވެސް މައްސަލައެއް ނޫޅޭ ކަމުގެ ޔަގީންކަން ބޯޑުގެ ޗެއާމަން މުހައްމަދު ރަޝީދު ދެއްވާފައިވާ ކަމަށް ވަހީދު ވިދާޅުވި އެވެ.
އެހެންވެ، އޭނާ ގަބޫލު ކުރައްވަނީ ވަޒީފާ އިން ވަކިކުރީ ސަރުކާރާ ދެކޮޅަށް ބަސް ބުނެގެން ކަމަށެވެ.
ފެނަކައިގެ ޗީފް ހިއުމަން ރިސޯސް އޮފިސަރު އުސައިދު ހުސައިން ސޮއިކުރައްވައި ފޮނުވި ލިޔުމުގައި ވަނީ، ވަހީދު މަގާމުން ވަކިކުރީ، އެ ކުންފުނީގެ ގަވާއިދުގެ 34.8 ވަނަ މާއްދާގެ (ހ) ގެ 1 ގައި ވާ ގޮތުގެ މަތިން، ވަޒީފާގައި އިތުރަށް ބަހައްޓައިފި ނަމަ އެ ކުންފުންޏަށް ގެއްލުންތަކެއް ލިބިދާނެ ކަމަށް ފެންނާތީ ކަމަށެވެ.
ވަހީދު މަގާމުން ވަކިކުރި ސަބަބާ ގުޅޭގޮތުން ފެނަކައިގެ ބަހެއް ނުލިބުނެވެ.
ފެނަކައިގެ ކޮރަޕްޝަން މައްސަލަތަކެއް މީގެ ކުރިން އެންޓި ކޮރަޕްޝަން ކޮމިޝަނަށް ހުށަހަޅާފައި ވެ އެވެ. އެކަމަކު، އެ ކޮމިޝަނުން އެ މައްސަލަތައް ބަލައި އެއްވެސް ފިޔަވަޅެއް އެޅިކަން މިހާތަނަށް އަންގާފައެއް ނުވެ އެވެ.