29 ސެޕްޓެމްބަރ 2023 - 09:49
މާލޭގެ ތޮއްޖެހުން ހައްލުކުރަން ޑިމޮކްރެޓްސް އިން ރިޔާސީ އިންތިހާބުގައި ހުށަހެޅި ސިޔާސަތަށް އެމްޑީޕީއަށް ތާއީދުކުރެވޭ ކަމަށާއި އެކުގައި މަސައްކަތްކޮށް ހައްލުތައް ހޯދިދާނެ ކަމަށް ހުޅުމާލެ ދާއިރާގެ މެމްބަރު އަލީ ނިޔާޒް (ނިޔާ) ވިދާޅުވެއްޖެ އެވެ.
ހުޅުމާލޭގައި އިއްޔެ ބޭއްވި އެމްޑީޕީގެ ކެމްޕޭން އެއްވުމުގައި ނިޔާ ވަނީ މާލޭގެ ތޮއްޖެހުން ކުޑަކޮށް ފަސޭހައިން ދިރިއުޅެވޭނެ ތަނަކަށް ހަދަން އިތުރަށް ގެންނަން ހުރި ބަދަލުތަކަށް ވާހަކަ ދައްކަވައިފަ އެވެ.
ނިޔާ ވިދާޅުވީ ޑިމޮކްރެޓްސް އިން ހުށަހެޅި ތޮއްޖެހުން ކުޑަކުރުމުގެ ސިޔާސަތުގައި ހުރީ ތަންފީޒުކުރެވޭނެ ރަނގަޅު ހުށަހެޅުންތަކެކެވެ.
"މާލޭގެ ތޮއްޖެހުމަށާއި ދެން ހުރި ކަންކަމަށް އެމްޑީޕީގެ ދެ ސަރުކާރަށް ރަނގަޅު ހައްލުތަކެއް ގެނެސްދެވިފައި އޮތީ. ވެށިފަހި ޕްރޮގްރާމާއި ގޯތި ދިނުމުގެ ޕްރޮގްރާމަކީ ރަނގަޅަށް ހިންގުނު ކަންކަން," ނިޔާ ވިދާޅުވި އެވެ.
"މިފަހަރު ޑިމޮކްރެޓުން ހުށަހަޅާފައި އޮތީ މާލެ ތޮއްޖެހުން ހައްލުކުރުމުގެ ސިޔާސަތަށް ވެސް ތާއީދުކޮށް އެކުގައި މަސައްކަތް ކުރެވޭނެ ސިޔާސަތެއް,"
އެމްޑީޕީގެ ފުރަތަމަ ވެރިކަން 2008 ގައި އުފެދި މާލެއަށް ހާއްސަކޮށްގެން ވެށި ފަހި މާލެ ޕްރޮގްރާމެއް ހިންގައި ގިނަ ބަޔަކަށް ގޯތި ދޫކުރި އެވެ. އެމްޑީޕީން ވަކިވެ ޕާޓީގެ މެމްބަރުންތަކެއް އުފެއްދި ޑިމޮކްރެޓްސް އިން އިންތިހާބުގައި ވާދަކުރިއިރު މާލެއަށް މިފަހަރު ހުށަހެޅީ ވަށައި ޖެހޭނެ ހައްލެކެވެ.
ޑިމޮކްރެޓްސްގެ ކެންޑިޑޭޓް އިލްޔާސް ލަބީބް ހުށަހެޅުއްވި "ގްރޭޓާ މާލެ އޭރިއާގެ ތަސައްވުރު - ވެށިފަހި މާލެ" ގެ އެންމެ މުހިންމު ބޭނުމެއް ކަމަށް ބުނެފައިވަނީ މާލޭގެ ތޮއްޖެހުން ކުޑަކޮށް، މާލޭގައި ދިރިއުޅޭ ކޮންމެ މީހަކަށް "ހިތްފަހި ހާސްކަމެއް ނެތް ރައްކާތެރި ދިރިއުޅުމެއް" ހޯދައިދިނުމެވެ.
މިހާރު ފަށާފައިވާ ބޯހިޔާވަހިކަމުގެ މަޝްރޫއުތަކަކީ މާލެ އަށް ކުރިމަތިވެފައިވާ މި މައްސަލަތަކަށް އަވަސް ހަލެއް ގެނެވޭނެ ސިޔާސަތެއް ނޫން ކަމަށާއި ބޭނުންވަނީ އަވަސް ހައްލެއް ކަމަށް އިލްޔާސްގެ މެނިފެސްޓޯގައި ބުނެފައި ވެ އެވެ.
އެމްޑީޕީގެ މި ދައުރުގެ ތެރޭގައި ވަނީ އެތައް އަހަރަކަށް ފަހު މާލޭގެ ރައްޔިތުންނަށް ގޯތި ދޫކޮށްފަ އެވެ. އަދި މިހާރު ވެސް އޮތީ މާލޭގެ ރައްޔިތުންނާއި މާލޭގައި ދިރިއުޅޭތާ 20 އަހަރުވީ މީހުންނަށް ކުރިމަތިލެވޭ ގޮތަށް ގޯއްޗަށް ހުޅުވާލައިފަ އެވެ. އޭގެ އިތުރުން ގެދޮރުވެރިޔާގެ ދެވަނަ ސްކީމުން ފްލެޓަށް ވެސް އޮތީ ހުޅުވާލައިފަ އެވެ.
މާލޭގެ ރައްޔިތުންނަށް މި ސަރުކާރުން ފަށައިގެން ކުރިއަށް ގެންދާ ގެދޮރުވެރިޔާގެ ގޯއްޗާއި ފްލެޓުގެ މަޝްރޫއު، މި ވެރިކަން ބަދަލުވެއްޖެ ނަމަ ހުއްޓިދާނެ ކަމުގެ ކަންބޮޑުވުން އެމްޑީޕީން ރޭ ބޭއްވި ކެމްޕޭން ޖަލްސާގައި ވާހަކަ ދެއްކެވި އެ ޕާޓީގެ އިސް ބޭފުޅުން ވަނީ ފާޅުކުރައްވައިފަ އެވެ.