27 ސެޕްޓެމްބަރ 2023 - 12:31
ފްލޮރިޑާ (ސެޕްޓެމްބަރު 27) - މާދަމާ ކުޅުމަށް ހަމަޖެހިފައިވާ ޔޫއެސް އޯޕަން ކަޕް ފައިނަލް މެޗަށް އިންޓަ މަޔާމީގެ ލިއޮނެލް މެސީ ފިޓް ވާނެ ކަމުގެ އުންމީދު ކުޑަ ކަމަށް އެޓީމުގެ ކޯޗު ޖެރާޑޯ މާޓީނޯ ބުނެފި އެވެ.
މިދިޔަ ހަފްތާ އިންޓަ މަޔާމީން ޓޮރޮންޓޯއާ ދެކޮޅަށް ކުޅުނު ލީގު މެޗުގައި މެސީ އަށް އަނިޔާ ވެގެން ވަނީ ބަދަލު ކޮށްފަ އެވެ. އޭގެ ސަބަބުން މި ހަފްތާގައި އޯލެންޑޯ ސިޓީއާ ދެކޮޅަށް އޮތް ލީގު މެޗު މެސީއަށް ގެއްލުނެވެ.
މީގެ 10 ދުވަސް ކުރިން ލީގުގައި އެޓަލާންޓާ ޔުނައިޓެޑް އަތުން ބަލިވި މެޗުގައި ވެސް މެސީއަށް ނުކުޅެވެ އެވެ. ކޯޗު މާޓީނޯ ބުނި ގޮތުގައި މެސީއަށް ދިމާވެފައި ވަނީ ކުރީގެ އަނިޔާއެއްގެ މައްސަލަ އެވެ.
"އަހަރެމެން އެންމެ ފަހު ވަގުތާ ޖެހެންދެން ލިއޯ [މެސީ] އަށް އިންތިޒާރު ކުރާނަން. އޭނާއާ ވާހަކަ ދައްކައިގެން ހާލަތު ދެނެގަންނަން ޖެހޭ، މާދަމާ ގޮތެއް ނިންމޭނެކަމަށް އުންމީދު ކުރަނީ،" ޖޯޑީ އަލްބާ ވެސް ފައިނަލަށް ފިޓްވާނެ ކަމުގެ އުންމީދު ކުޑަކަން ހާމަކޮށް، ރޭ އޮތް ޕްރެސް ކޮންފަރެންސްގައި މާޓީނޯ ބުންޏެވެ.
"ކުޅުންތެރިޔާ އާ ފައިނަލް އަދި އެއަށް ފަހު ވާނެ ގޮތަކަށް ވެސް ވިސްނަން އެބަ ޖެހޭ. ރިސްކު އެބަ އޮތް، އެ ރިސްކު ކުޑަވާނެ ގޮތަކަށް މަސައްކަތް ކުރަން ޖެހޭނީ. ނުކުންނަނީ ފައިނަލަކަށް ނޫން ވެއްޖެއްޔާ އަހަރެމެން ރިސްކެއް ނުނަގާނަން، އެކަމަކު ފައިނަލްގައި ރިސްކު ނަގަން ޖެހިދާނެ."
ހަތް ފަހަރު ބެލަންޑޯ ހޯދާފައިވާ މެސީ ވަނީ ޖުލައި މަހު އިންޓަ މަޔާމީއަށް ބަދަލުވި ފަހުން މިހާތަނަށް ކުޅެދިން 12 މެޗުން 11 ގޯލު ޖަހައި ފަސް އެސިސްޓް ކޮށްފަ އެވެ. އަދި މެސީގެ މޮޅު ކުޅުމާ އެކު އެ ޓީމަށް ވަނީ ލީގްސް ކަޕް ކާމިޔާބު ކޮށްދީފަ އެވެ. ލީގްސް ކަޕް އެއީ ކްލަބްގެ ތާރީހުގައި ވެސް ކާމިޔާބު ކުރި ފުރަތަމަ ތައްޓެވެ.
ރާއްޖެ ގަޑިން މާދަމާ ފަތިހު 5:30 ގައި ފަށާ ޔޫއެސް އޯޕަން ކަޕް ފައިނަލްގައި އިންޓަ މަޔާމީ ބައްދަލުކުރާނީ ހިއުސްޓަން ޑައިނަމޯއާ ދެކޮޅަށެވެ.