19 ސެޕްޓެމްބަރ 2023 - 15:42
މި މަހުގެ 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރާ ދިމާކޮށް އެކި ކަންކަމަށް ސަރުކާރުގެ ނުފޫޒު ފޯރުވުން އިންތިހާ އަށް މަތިކޮށްފައިވާ ކަމުގެ ކަންބޮޑުވުން އިިދިކޮޅު ކެންޑިޑޭޓް ޑރ. މުހައްމަދު މުއިއްޒު މިއަދު ފާޅުކުރައްވައިފި އެވެ.
ޕީޕީއެމް/ޕީއެންސީގެ ރިޔާސީ ކެންޑިޑޭޓް އެ ކަންބޮޑުވުން ފާޅުކުރެއްވީ ގަރާޖު ސިޓީ ދޫކުރާތީ އެތައް ބަޔަކު ޝަކުވާ ކުރަމުން ދިޔަ ނަމަވެސް އެކަމަށް އަޅާނުލައި ތިބުމަށް ފަހު، ގަރާޖު ސިޓީ އުވާލަން ސަރުކާރުން މިއަދު ކުއްލި ގޮތަކަށް ނިންމުމާއި ކައުންސިލްތަކުގެ އިދާރީ މުވައްޒަފުންގެ މުސާރަ އަންނަ މަހުން ފެށިގެން ބޮޑުކުރަން ސަރުކާރުން މިއަދު ނިންމުމުންނެވެ.
އެ ދެ ނިންމުމާ ގުޅިގެން މުއިއްޒު ވިދާޅުވީ، މި ފަސް އަހަރުގެ ތެރޭގައި މާ ކުރިން ވެސް ކުރެވެން އޮތް ކަންތައްތައް ކަމަށެވެ. މި މަހުގެ 9 ގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި ވެސް އެ ދެ ނިންމުން ނިންމެން އޮއްވައި ސަރުކާރުން މިހާރު އެ ކަން ކުރީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް މަދުން ވޯޓު ލިބުމުން ކަމަށް މުއިއްޒު ވިދާޅުވި އެވެ.
މުއިއްޒު ވިދާޅުވީ، ގަރާޖު ސިޓީ ދޫނުކުރަން ކުއްލި ގޮތަކަށް ނިންމުމަށް ވުރެ ބޮޑަށް އެ ކަން ކުރަން ޖެހޭނީ މާލޭގައި އެކަށީގެންވާ ޕާކިން ޖާގަ އިތުރު ކޮށްގެން ކަމަށެވެ. ނަތީޖާއަކަށް ވާނީ އެކި ދިމަދިމާލުގައި ޕާކް ކުރުން އިތުރުވެ، މަގުމަތި ތޮއްޖެހުން ކަމަށް ވިދާޅުވި އެވެ.
"ކައުންސިލުން އޮންނާނެ މާލޭގައި ޕާކިން ބިލްޑިންގްތައް އަޅަން ހުރިހާ އިޖުރާއަތުތަކެއް ނިންމާފައި. އެކަން [ސަރުކާރުން] ނުހިފަހައްޓައި ފުރުސަތު ދިން ނަމަ މިހާ ދުވަސް ވީއިރު ޕާކިންގެ މައްސަލަ ވެސް އޮންނާނީ މިހާރަށް ހައްލު ވެފައި. މީގެ ދޮޅު އަހަރު ކުރިއްސުރެ އެކަމާ މާލެ ސިޓީ ކައުންސިލުން މި އުޅެނީ،" މާލޭގެ މޭޔަރުކަން ވެސް ކުރައްވާ މުއިއްޒު ވިދާޅުވި އެވެ.
"އެ ޕާކިން ބިލްޑިންގްތައް ހެދުނު ނަމަ ވެހިކަލްތައް އެ ތަންތަނަށް ރަޖިސްޓަރީ ކުރެވުނީސް. އޭރަށް މަގުމަތީގައި ޕާކެއް ނުކުރާނެ. ޕާކިން އިމާރާތްތައް ހުރި ނަމަ އެ އިމާރާތްތަކުގައި ޕާކް ކުރާ ގޮތަށް ގަވާއިދު ވެސް ހެދޭނެ."
ލޯކަލް ކައުންސިލްތަކުގެ އިދާރީ މުވައްޒަފުންގެ މުސާރަ ބޮޑުކުރަން ނިންމި ނިންމުމާ ގުޅޭ ގޮތުން މުއިއްޒު ވިދާޅުވީ، އެއީ ރިޔާސީ އިންތިހާބުގެ ފުރަތަމަ ބުރުގައި ވެސް އެތައް މުވައްޒަފުންތަކެއްގެ ޝަކުވާއެއް ކަމަށެވެ.
"އެކަމަކު، ފުރަތަމަ ބުރުގެ ބައްޔާ އެކު އެ މީހުންގެ މުސާރަ ބޮޑުކުރަން ކުއްލި ގޮތަކަށް އެ ނިންމީ [ރައީސް އިބްރާހިމް މުހައްމަދު ސޯލިހު] ބަލިވީމާ. ދެ ވަނަ ބުރަށް ސީދާ ނުފޫޒު ފޯރުވަން ކުރާ ކަމެއް އެއީ،" އޭނާ ވިދާޅުވި އެވެ.
މުއިއްޒު ވިދާޅުވި ގޮތުގައި ކައުންސިލްތަކުގެ އިދާރީ މުވައްޒަފުންގެ މުސާރަ ބޮޑުކުރަން މި ސަރުކާރަށް އެލްޖީއޭ އިން ވަރަށް ކުރިން އޮތީ ހުށަހަޅައިފަ އެވެ. އަދި ޕޭ ސްޓްރަކްޗާގެ އެންމެ ދަށްފަންތީގައި ލޯކަލް ކައުންސިލްތައް ހިމެނީ ވެސް މި ސަރުކާރުގެ ސުޕަމެޖޯރިޓީ އޮންނަ ރައްޔިތުންގެ މަޖިލިހުން ކަމަށް އޭނާ ވިދާޅުވި އެވެ.
"އޭރު ވެސް އެތައް މުވަައްޒަފުންނެއް އެ ވާހަކަ ދެއްކި. އެކަމަކު މި ސަރުކާރުން މިހާތަނަށް އަޅައެއް ނުލައި ދިނީ ބީރު ކަންފަތެއް. ދެވަނަ ބުރުގެ އިންތިހާބުގެ ނަތީޖާ އަށް ވިސްނައިގެން މި ކަމެއް މި ސަރުކާރުން މި ކުރީ،" މުއިއްޒު ވިދާޅުވި އެވެ.
ނަމަވެސް، އެއީ ސަރުކާރުގެ މުވައްޒަފުންތަކެއް ކަމަށް ވާއިރު، އެ މީހުންނަށް އެ ލިބުނު ކުރިއެރުމަށް މަރުހަބާ ދަންނަވާ ކަމަށް މުއިއްޒު ވިދާޅުވި އެވެ.