04 ސެޕްޓެމްބަރ 2023 - 06:54
ހދ. މަކުނުދޫގައި މިހާރު ހަދަމުން އަންނަ އެއާޕޯޓާ އެކު، މި ސަރަހައްދުގެ ޓޫރިޒަމް ފުޅާކުރުމަށް މި ރަށު ފަޅު ތެރޭގައި އިތުރު ރިސޯޓުތައް ހަދަން ހުޅުވާލާނެ ކަމަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު ރޭ ވިދާޅުވެއްޖެ އެވެ.
ހޮނިހިރު ދުވަހު ބާއްވާ ރިޔާސީ އިންތިހާބުގެ ކެމްޕެއިނަށް މަކުނުދޫގައި ބޭއްވި ޖަލްސާގައި ރައީސް ވިދާޅުވީ މަކުނުދު އަކީ އެހެން ރަށްތަކާ މާ ދުރުގައި، ގުދުރަތީ ގޮތުން މާ ރީތި ސިފަތަކެއް ލިބިފައިވާ ފަޅެއްގެ ތެރޭގައި އޮންނަ ރަށެއް ކަމަށެވެ.
މަކުނޫދު އަކީ ޓޫރިޒަމްގެ ތަފާތު މަންޒިލަކަށް ހެދިދާނެ ކަމުގެ ޔަގީން ކަން، ރާއްޖޭގައި ރިސޯޓްތައް ހިންގާވާ ވިޔަފާރިވެރިޔާ އަދި އެމްޑީޕީގެ ކޯލިޝަން ޕާޓުނަރު އެމްޑީއޭގެ ރައީސް އަހްމަދު ސިޔާމް ވެސް ދެއްވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވި އެވެ.
"މުޅި ރާއްޖެއާ ވަކިން އޮތް ނަމަވެސް، ރީތި ފަޅަކާއި ފަރަކާ، އެހެން ގޮސް ޓޫރިޒަމަށް އެންމެ ފައްކާ އެއް ތަން،" ރައީސް ވިދާޅުވި އެވެ.
މި ރަށު ފަޅުގައި މިހާރު ވެސް އަންނަނީ ރިސޯޓެއް ހަދަމުންނެވެ. ރައީސް ރޭ އިއުލާންކުރެއްވީ، މި ފަޅުގެ ތެރޭގައި އަދި އިތުރު ރިސޯޓުތައް ހަދަން އިންވެސްޓަރުން ހޯދާނެ ކަމަށެވެ.
ރައީސް ވިދާޅުވި ގޮތުގައި، މަކުނުދޫ އެއާޕޯޓަށް ބިން ހިއްކާއިރު، އިތުރު ދެ ރަށް ނުވަތަ ތިން ރަށް ހިއްކާނެ ކަމަށާއި އެއީ ވެސް ޓޫރިޒަމަށް އަމާޒުކޮށްގެން ހިއްކާ ރަށްތަކެއް ކަމަށެވެ.
މަކުނުދޫ އެއާޕޯޓު ހެދުމަށް 43 ހެކްޓަރުގެ ބިން ހިއްކުމާއި ގޮނޑުދޮށް ހިމާޔަތްކުރަން 16 މިލިއަން ޑޮލަރަށް ބިގް ފިޝް މޯލްޑިވްސް ޕްރައިވެޓް ލިމިޑެޓާ ވަނީ ހަވާލުކޮށްފަ އެވެ. ބިން ހިއްކުމުގެ އަމަލީ މަސައްކަތް އެ ކުންފުނިން މިއަދު ވަނީ ފަށައިފަ އެވެ.
• މެރިކަލްޗާ އަށް ހާއްސަ ސަރަހައްދެއް ކަނޑައެޅުން.
• ބިން ހިއްކައި ފްލެޓް އެޅުން.
• މަގުތަކުގައި ތާރު އެޅުން.
• ފުޓްބޯޅަ ދަނޑެއް ހެދުން.
• ބަނދަރު ފުންކުރުން.
• އައިސްޕްލާންޓެއް ހެދުން.