29 އޯގަސްޓް 2023 - 22:49
ސައްހަ ނޫން ޓެލެގްރަފިކް ޓްރާންސްފާ (ޓީޓީ) ފޮނުވައިގެން ބޭރުގެ ކުންފުނިތަކުން ވިޔަފާރިކުރަމުން ދިޔަ ހުސެއިން ޝިފާއު ހޯދުމަށް އިންޓަޕޮލް އިން މިރޭ ނޯޓިސް ނެރެފި އެވެ.
"ކިންގްޑަމް އޮފް ފުރުޓްސް" ނަމަކަށް ކިޔާ، އަމިއްލަ ފަރުދެއްގެ ވިޔަފާރިއެއް މެދުވެރިކޮށް، ރާއްޖެއިން ބޭރުގެ ކުންފުނިތަކާ އެކު ހިންގި މުއާމަލާތްތަކުގައި މަކަރާއި ހީލަތް ހަދާފައިވާ ކަމަށް ބުނެ އޭނާ ހައްޔަރުކުރީ މި އަހަރުގެ އޭޕްރީލް 28 ގަ އެވެ.
އެކަމަކު، ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން، މުޖުތަމައަށް ނުރައްކަލެއް ނެތް ކަމަށް ބުނެ ޖެހިގެން އައި މޭ މަހުގެ 27 ގައި އޭނާ ދޫކޮށްލީ އެވެ.
އެކަމަކު، އެ މައްސަލަ އިސްތިއުނާފުކުރިއިރު އޭނާ ރާއްޖެ އިން ބޭރަށް ދިޔަ ގޮތަށް އަނބުރާ އައިސްފައެއް ނުވެ އެވެ.
އޭރު، އެ މައްސަލާގައި މއ. ހަނީސަކްލް-1 ޝިފާއުގެ މައްޗަށް 23 ދައުވާއެއް ކޮށްފައި ވެ އެވެ.
އެނގި ހުރެ ސައްހަ ނޫން ލިޔުމެއް ދިނުމުގެ ކުށުގެ ނުވަ ދައުވާއަކާއި މަކަރާއި ހީލަތް ހެދުމުގެ ކުށުގެ ހަތް ދައުވާއަކާއި މަނީ ލޯންޑަރިންގެ ކުށުގެ ހަތް ދައުވާއެއް އޭނާގެ މައްޗަށް ކުރުމަށް ޕީޖީން ވަނީ ކްރިމިނަލް ކޯޓަށް ފޮނުވައިފަ އެވެ.
އެ ދައުވާތައް ސާބިތުވެއްޖެ ނަމަ އުމުރު ދުވަހުގެ ހުކުމެއް އަންނާނެ އެވެ.