22 އޯގަސްޓް 2023 - 22:24
ސިޔާސީ ގޮތުން ވަރުގަދަ ރަށެކެވެ. އިންތިހާބުތަކުގައި އެމްޑީޕީއަށް އަބަދު ވެސް މެޖޯރިޓީ ލިބެ އެވެ. އެކަމަކު، މި ރަށަށް ވަޑައިގަންނަވާ ސިޔާސީ ބޭފުޅުންނަށް މަރުހަބާ ކިޔުމަށް ރަށުގެ ގިނަ ބަޔަކު ނުކުތުމަކީ އާއްމު ކަމެއް ނޫނެވެ.
ބ. ކެންދޫ ކައުންސިލްގެ ރައީސް އިބްރާހިމް އަބްދުއްރަހްމާން ވިދާޅުވީ ރައީސް އިބްރާހިމް މުހައްމަދު ސޯލިހު މި ރަށަށް ކޮށްދެއްވާފައިވާ ކަންތައްތައް ރައްޔިތުންނަށް ބަލައިގަންނަ ކަމަށެވެ. އެކަމަކު، އަންނަ މަހުގެ 9 ވަނަ ދުވަހު ބާއްވާ ރިޔާސީ އިންތިހާބުގެ ކެމްޕެއިނަށް މި ރަށަށް ވަޑައިގަތުމުން އެ މަނިކުފާނަށް މަރުހަބާ ކިޔުމަށް އެހާ ގިނަ ބަޔަކު ނުކުމެދާނެ ކަމަށް ގަބޫލުނުކުރެވުނު ކަމަށް އޭނާ ވިދާޅުވި އެވެ.
"މިއީ ފަހުގެ ތާރީހެއްގައި ކެންދޫގައި މިހާ ގިނަ ބަޔަކު ނުކުތް ފުރަތަމަ ފަހަރު. އަޅުގަނޑުމެން އުއްމީދެއް ވެސް ނުކުރަން މިހާ ގިނަ ބަޔަކު ނުކުންނާނެ ކަމަކަށް." ރަހްމާން ވިދާޅުވި އެވެ.
މި ސަރުކާރުން، މި ރަށަށް އެކަނި ވެސް މިދިޔަ މަހުގެ 16 އާ ހަމައަށް 92،649،855 މިލިއަން ރުފިޔާ ހަރަދުކޮށްފި އެވެ.
އާބާދީގައ 1،393 މީހުން ހިމެނޭ ރަށު ކައުންސިލްގެ ރައީސް ވެސް ވިދާޅުވީ ކެންދޫގެ ރައްޔިތުންނަށް ތަރައްގީގެ ވާހަކަ އިތުރަށް ދައްކަން ނުޖެހޭ ވަރަށް މި ރަށް ތަރައްގީ ކޮށްދީފައިވާ ކަމަށެވެ.
"ހުރިހާ ރައްޔިތުން ގަބޫލުކޮށްފި ސަރުކާރުން ގިނަ ކަންތައްތަކެއް ކޮށްދީފިކަން. ރައްޔިތުން އެދެމުން ދިޔަ ކަންތައްތައް ހަގީގަތަކަށް ހަދައިދިނީ މި ސަރުކާރުން." ރަހުމާން ވިދާޅުވި އެވެ.
އޭނާ ވިދާޅުވި ގޮތުގައި ގޮނޑުދޮށް ހިމާޔަތްކުރުމުގެ މަޝްރޫއު ނިންމީ ރަށުގެ ބޮޑު ބައެއްގައި ހިލަ ޖަހައިގެން ކަމަށެވެ. މަލްޓިޕާޕަސް ހޯލު ނިމުމަކާ ގާތްވެފައިވާއިރު، ޒުވާނުން ކުޅުމަށް ފުޓްބޯޅަ ދަނޑެއް އަދި ވޮލީ ކޯޓެއް ހަދާފައިވެ އެވެ.
ފެނާއި ނަރުދަމާ ނިޒާމް ގާއިމްކުރުމުގެ 95 ޕަސެންޓް ނިންމާފައިވާއިރު، ކުރިއަށް އޮތް ދޮޅު މަހެއްހާ ދުވަހުގެ ތެރޭގައި އެ ހިދުމަތް ރައްޔިތުންނަށް ލިބޭނެ ކަމަށް ކައުންސިލުން ބުންޏެވެ.
މި ރަށުގެ އިންޖީނުގެ މީގެ ކުރިން ހިންގަމުން ދިޔައީ މީހުން ދިރިއުޅޭ ސަރަހައްދުގަ އެވެ. އެކަމަކު، އިތުރު ޖަނަރޭޓަރާއެކު އިންޖީނުގެ ވެސް މީހުން ދިރިނޫޅޭ ހިސާބަށް ބަދަލުކޮށްފި އެވެ. އޭޓީއެމް މެޝިން ބެހެއްޓުމުގެ މަސައްކަތް ވެސް މިހާރު ކުރަމުން އަންނަ ކަމަށް ރަހުމާން ވިދާޅުވި އެވެ.
އެކަންކަމުގެ އިތުރުން، އާ މިސްކިތެއް ހަދަން ބަޔަކާ ހަވާލުކޮށްފައިވާކަން ރަހުމާން ފާހަގަކުރެއްވި އެވެ.
"މި ކަންތައްތައް ރައްޔިތުން ބަލައިގަނޭ. ވަރަށް ޕޮޒިޓިވްކޮށް އެންމެން ވެސް ތިބީ. ރަށުގެ ކޮންމެ ގެއަކުން ވެސް އެބަތިބި މީހުން ނުކުމެފައި ރައީސަށް މަރުހަބާ ކިޔުމަށް، ކުޑަކުދިން ނުހިމަނާ ވެސް." އޭނާ ވިދާޅުވި އެވެ.
މި ރަށަށް މިހާރު ކޮށްދެމުން އަންނަ ކަންތައްތަކުގެ އިތުރުން، ރަށުގެ ބޮޑެތި މަގުތައް ޒަމާނީ ފެންވަރަށް ހަދައިދިނުމަށް ރައީސް ވަނީ ވައުދުވެވަޑައިގެންފަ އެވެ.