21 އޯގަސްޓް 2023 - 20:56
ރަށްރަށަށް ކުރައްވާ ދަތުރުތަކުން ސަރުކާރުން ވެފައިވާ ވައުދުތައް ފުއްދާ މަންޒަރު ފެނިވަޑައިގަންނަވާ ކަމަށް، އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
އަންނަ މަހު ބާއްވާ އިންތިހާބުގެ ކެމްޕެއިނަށް، ބ. އަތޮޅަށް ފައްޓަވާފައިވާ ދަތުރުގައި، މި އަތޮޅު ހިތާދުއަށް ވަޑައިގެން ބޭއްވި ބަނދަރު ބައްދަލުވުމުގައި ރައީސް ވިދާޅުވީ އެމްޑީޕީން އިންތިހާބުތަކަށް އަބަދުވެސް ނުކުންނަނީ ސިޔާސަތުތަކާއެކު ކަމަށެވެ. ބޭނުންވަނީ ރައްޔިތުން ބޭނުންވާ ކަންކަން އޮޅުން ފިލުވައި އެ ކަންތައް ހާސިލްކޮށްދިނުމަށް ކަމަށް ވެސް ވިދާޅުވި އެވެ.
ޖަޒީރާ ރާއްޖޭގެ ނަމުގައި އޭރު ފެށި ސިޔާސަތަކީ ވެސް، އެމްޑީޕީގެ ރިޔާސީ ކެންޑިޑޭޓް ވިދާޅުވި ގޮތުގައި އެ ރައްޔިތުންނަށް ރަށުގައި ހަމަޖެހިލައިގެން ދިރިއުޅެވޭނެ މާހައުލެއް ގާއިމްކޮށްދިނުމެވެ. އޭގެ ދަށުން، ވައުދުތައް ފުއްދަމުންދާ ތަން، ރަށްރަށަށް މިހާރު ކުރައްވަމުންދާ ކެމްޕެއިން ދަތުރުތަކުން ފެނިވަޑައިގަންނަވާކަން ރައީސް ފާހަގަކުރެއްވި އެވެ.
"ހަމައެގޮތަށް ހިތާދޫއަށް އަޅުގަނޑުމެން ވީ ވައުދުތަކުގެ ބައެއް މަސައްކަތް ނިމި، އަނެއް ބައި މަސައްކަތް ނިމުމަކާ ހިސާބަށް މި ދަނީ. އަޅުގަނޑު ހިތުން، އަޅުގަނޑުމެންނަށް އަދިކިރިޔާ މި އާދެވުނީ ހަމަޖެހިލައިގެން ޖަޒީރާ ދިރިއުޅުމެއް އުޅެވޭނެ ގޮތެއް އިންތިޒާމުވެގެން ބިންގާ. އަދި ކުރިއަށް މަސައްކަތް އެބަހުރި،" ރައީސް ވިދާޅުވި އެވެ.
ކޮވިޑުގެ ދަތިކަމާއެކު ވެސް، އެ ދަތިކަމުގެ އަލީގައި ވެސް، އެއްވެސް މީހަކު ތަފާތު ކުރުމެއް ނެތި އަސާސީ ހިދުމަތްތައް ފޯރުކޮށްދެމުން އަންނަ ކަމަށް ރައީސް ވިދާޅުވި އެވެ. ކުރިއަށް އޮތީ އުފާވެރި އަމާން ރާއްޖެއެއް ކަމަށާއި ދެ ވަނަ ދައުރުގެ ޕްލޭންތަކާއެކު ދިވެހިންގެ ދިރިއުޅުމަށް ހެޔޮ ބަދަލުތަކެއް އަންނާނެ ކަމަށް އެ މަނިކުފާނު ވިދާޅުވި އެވެ.
އަސާސީ ހިދުމަތްތަކާއެކު ކޮންމެ ރަށެއް ފައްކާ ވެގެން ދަނީ ރައީސް ވިދާޅުވި ގޮތުގައި ރަށުގައި ޓޫރިޒަމަށް އަދި އާމްދަނީ ހޯދާނެ އެހެން ގޮތްތައް ރަނގަޅު ރަށަކަށެވެ. ދެން އޮތީ އެކަމަށް އިންވެސްޓްކުރާނެ ގޮތްތައް ހޯދުން ކަމަށާއި އެކަމަށް ހާއްސަކޮށްގެން ލުއި ލޯނުތައް ދޫކުރާނެ ކަމަށް ރައީސް ވިދާޅުވި އެވެ.
އެ މަނިކުފާނު ވަނީ ދެ ވަނަ ދައުރަކަށް އިންތިހާބުވެވަޑައިގެންފިނަމަ، 1،425 މީހުން ރަޖިސްޓްރީވެފައިވާ ހިތާދޫގެ ބިން ހިއްކުމަށް ވައުދުވެވަޑައިގެންފަ އެވެ. އެއާއެކު، ޕިކްނިކް ދާނެ ތަނެއް ވެސް ފަޅުތެރެއިން ތަރައްގީކޮށްދޭނެ ކަމަށް ވިދާޅުވި އެވެ.
ބިން ހިއްކުމަށް ފަހު ހައުސިން ޔުނިޓު އަޅައި، ޒުވާނުން ބޭނުންވާ ގޮތަށް ކޮމިއުނިޓީ ސެންޓަރެއް އަޅައިދޭނެ ކަމަށް ރައީސް ވިދާޅުވި އެވެ.
މި ރަށުން ބޭނުންވާ ކަންތައްތައް ރައީސަށް ހުށަހެޅިއިރު ވަނީ، 50 އަހަރު ވުމުން ވަޒީފާ ނުލިބޭ މައްސަލައަށް ހައްލެއް ހޯދައިދީ، އޮންލައިންކޮށް ވީހާ ވެސް ގިނަ ކޯސްތައް ހިންގުމަށް އެދިފަ އެވެ. ރައީސް ވިދާޅުވި ގޮތުގައި، އެ ޕާޓީން ތައްޔާރުކުރި މެނިފެސްޓޯގައި އެ ކަންކަމަށް އަލިއަޅުވާލާފައިވާނެ އެވެ.
- ރަށުގައި ބޯޓުޔާޑެއް ހެދުން
- ފުޓްސަލް ދަނޑާއި ފުޓްބޯޅަ ދަނޑެއް ހެދުން
- ބިން ހިއްކައި ހައުސިން ޔުނިޓު އެޅުން އަދި ޕިކްނިކް ދާނެ ތަނެއް ތަރައްގީކުރުން