20 އޯގަސްޓް 2023 - 10:24
ނަޝްވިލް، އެމެރިކާ (އޮގަސްޓް 20) - އެމެރިކާގެ އިންޓަ މަޔާމީ އަށް ކުޅެމުން އަންނަ އާޖެންޓީނާގެ ލެޖެންޑް ލިއޮނެލް މެސީ، އެމެރިކާ އާއި މެކްސިކޯގެ ޓީމުތައް ކުޅޭ ލީގްސް ކަޕްގެ ފައިނަލްގައި ވެސް ލަނޑު ޖަހައި، އެޓީމާއެކު މުބާރާތުގެ ތަށި އުފުލާލައިފި އެވެ.
ރާއްޖެ ގަޑިން މިއަދު ހެނދުނު ނަޝްވިލް އާ ދެކޮޅަށް ކުޅުނު މެޗުގެ ފުރިހަމަ ވަގުތު ހަމަވިއިރު 1-1 އިން ނަތީޖާ އެއްވަރު ވުމުން، ޕެނަލްޓީ ޝޫޓައުޓްގައި އިންޓަ މަޔާމީ ކުރި ހޯދީ 10-9 އިންނެވެ.
މެޗުގެ 23 ވަނަ މިނިޓުގައި މެސީ އޭރިއާ ބޭރުން ފޮނުވާލި ބޯޅަ ގޯލުގެ މަތީ ކަނަށް ފޮނުވާލައިގެން އެޓީމަށް ލީޑު ނަގައިދީފައި ވަނިކޮށް ނަޝްވިލް އިން އެއްވަރުކުރީ ދެވަނަ ހާފުގަ އެވެ. ޕެނަލްޓީ ޝޫޓައުޓްގައި ފުރަތަމަ ޕެނަލްޓީ ފޮނުވާލީ މެސީ އެވެ. މެސީ އާއި ސާޖިއޯ ބުސްކެޓްސް އަދި ޖޯޑީ އަލްބާ ވެސް ވަނީ ޕެނަލްޓީ ކާމިޔާބު ކޮށްފަ އެވެ.
މިއީ މެސީ އާއި ބުސްކެޓްސް އަދި އަލްބާ އެޓީމަށް ބަދަލުވެ ހޯދި ފުރަތަމަ ތަށީގެ އިތުރުން، 2020 ވަނަ އަހަރު އިންޓަ މަޔާމީގެ ގޮތުގައި ކުޅެން ފެށި ޓީމުން ހޯދި ވާދަވެރި ފުރަތަމަ ތައްޓެވެ.
އިންޓަ މަޔާމީގެ އަލަތު ތަށި ކާމިޔާބު ކުރުމަށް ފަހު، ކުޅުންތެރިން ވަނީ ހަތް ފަހަރު ބެލޮންޑިއޯ އެވޯޑް ހޯދި މެސީ އުފުލާލައިގެން ވަރަށް ބޮޑަށް އުފާފާޅު ކޮށްފަ އެވެ.
މުބާރާތުގައި ކުޅުނު ހަތް މެޗެއްގައި ގޯލު ޖެހި މެސީ ވަނީ ފައިނަލްގައި ކާމިޔާބުކުރި ގޯލާ އެކު ޖުމްލަ 10 ގޯލު ހަމަކޮށް މުބާރާތުގެ ރަން ބޫޓު ހާސިލް ކޮށްފަ އެވެ. އަދި މުބާރާތުގެ އެންމެ މޮޅު ކުޅުންތެރިޔަކީ ވެސް އޭނާ އެވެ.
މި ކާމިޔާބީއާ އެކު އިންޓަ މަޔާމީ ވަނީ އަންނަ އަހަރުގެ އުތުރު އެމެރިކާ ސަރަކައްދުގެ ޗެމްޕިއަންސް ލީގު ކަމަށްވާ ކޮންކާކަފް ޗެމްޕިއަންސް ކަޕްގެ ގަދަ 16 އިން ސީދާ ޖާގައެއް ޔަގީން ކޮށްފަ އެވެ.
އިންޓަ މަޔާމީ އަށް މި ސީޒަންގައި ބާކީ ދެ މުބާރާތް އެބަ އޮތެވެ. މެސީގެ ސޮއި ހޯދައި ލީގްސް ކަޕް ކުޅުމުގެ ކުރިން މޭޖާ ލީގް ސޮކާ (އެމްއެލްއެސް) ގައި އެޓީމު އެންމެ ފަހުން ކުޅުނު 11 މެޗުން ވެސް މޮޅެއް ނުހޯދި އޮތީ ލީގުގެ ފުލުގަ އެވެ. ނަމަވެސް ލީގު ނިމުމުގެ ކުރިން ރަނގަޅު ހިސާބަކަށް ޖެހިލަން އެޓީމަށް ލީގުގައި ބާކީ 12 މެޗު އެބަ އޮތެވެ.
ލީގުގެ ފުލުގައި އޮތް ނަމަވެސް އެމެރިކާގެ އެފްއޭ ކަޕް ކަމަށްވާ ޔޫއެސް އޯޕަން ކަޕްގެ ސެމީ ފައިނަލުން އިންޓަ މަޔާމީ ވަނީ ޖާގަ ހޯދައިފަ އެވެ. އެޓީމަށް ދެން އެންމެ އަވަހަށް ވެސް އޮތީ ޔޫއެސް އޯޕަންގެ ސެމީ ފައިނަލްގައި ސިންސިނާޓީއާ ދެކޮޅަށް ކުޅެ މެޗެވެ. އެ މެޗު އޮންނާނީ އަންނަ ބުރާސްފަތި ދުވަހު ރާއްޖެ ގަޑިން ފަތިހު 4 ޖަހާއިރެވެ.