15 އޯގަސްޓް 2023 - 09:25
ސަރުކާރުން މާލެ ސަރަހައްދުން ދޫކުރާ ގޯތި ލިބޭ ފަރާތްތަކުން ގުރު ނަގަން ދާން ޖެހޭނީ ފޯމް ހުށަހަޅާފައިވާ އެކަކު ކަމަށާއި ދާންޖެހޭ މީހާގެ ނަން ޕޯޓަލް އިން ފެންނާނެ ކަމަށް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗާ މިނިސްޓްރީ އިން ބުނެފި އެވެ.
ގޯތި ލިބޭ ތަންތަން ކަނޑައެޅުމަށްޓަކައި ގުރުއަތު ނެގުން ފަށަނީ މިއަދު މެންދުރު 11:00 ގައި ގަލޮޅު ދަނޑުގަ އެވެ.
ހައުސިން މިނިސްޓްރީ އިން ކުރި އިއުލާނެއްގައި ބުނީ ގުރުއަތު ނެގުމަށް ހާޒިރުވާން ޖެހޭ ތަނާއި ވަގުތު ގޯތި ލިބޭ ފަރާތްތަކުން "ގެދޮރުވެރިން ޕޯޓަލް" އަށް ވަނުމުން ފެންނާނެ ކަމަށާއި ގުރުއަތު ލުމަށް ހާޒިރު ވާނީ ގޯތި ލިބޭ ފޯމުގެ އެއް ބައިވެރިއެއް ކަމަށެވެ.
"ގޯތި ލިބޭ ފޯމުގެ އެއްވެސް ބައިވެރިއަކަށް ގުރުއަތުލުމަށް ހާޒިރުވެވެން ނެތްނަމަ ގުރުއަތު ނެގުމަށް ހާޒިރުވާނެ ފަރާތެއްގެ މައުލޫމާތު ޕޯޓަލް މެދުވެރިކޮށް ހުށަހަޅުއްވަންވާނެ" ކަމަށް އެ އިއުލާނުގައި ބުނެފައިވެ އެވެ.
ހައުސިން މިނިސްޓްރީން ކަނޑައަޅާފައިވާ ވަގުތުގެ ތެރޭގައި ގުރުއަތުލުމަށް ހާޒިރު ނުވެއްޖެ ނަމަ އެ މީހެއްގެ ގުރުއަތު ނެގުމަށް ހަމަޖެހިފައިވަނީ މިނިސްޓްރީގެ ފަރާތުން އެކަމަށް ކަނޑައަޅާފައިވާ އޮފިޝަލެއް ކަމަށް ވެސް އެ އިއުލާނުގައި ބުނެފައިވެ އެވެ.
މިއަދާއި މާދަމާ ގުރުއަތު ނެގުން އޮންނާނީ ގަލޮޅު ދަނޑުގަ އެވެ. އަދި އަންނަ ބުރާސްފަތި ދުވަހުން ފެށިގެން ގުރުއަތު ނެގުމުގެ މަސައްކަތް ކުރިޔަށް ދާނީ ހެންވޭރު ދަނޑުގަ އެވެ.
މިއަދު ގުރުއަތު ނަގަން ފަށާއިރު ހުޅުމާލޭގައި މިހާރު ހުރި ގޯތިތައް ލިބޭ ފަރާތްތަކަށް ގޯތި ކަނޑައި ދިނުމުގެ މަސައްކަތް ވެސް މިއަދު ފަށަން ވަނީ ހަމަޖެހިފަ އެވެ.
ސަރުކާރުގެ "ބިންވެރިޔާ" ސްކީމްގެ ދަށުން 18،955 ފަރާތެއް ގޯއްޗަށް ޝަރުތު ހަމަވެ އެވެ.
ހައުސިން މިނިސްޓްރީ އިން ބުނެފައިވާ ގޮތުގައި މި އަހަރު ނޮވެމްބަރު 11 ގެ ކުރިން އެ ހުރިހާ ފަރާތްތަކަށް ގޯތި ކަނޑައި ރަޖިސްޓްރީ ހަވާލު ކުރާނެ އެވެ.