14 އޯގަސްޓް 2023 - 06:53
ބޮލީވުޑްގެ ސުޕަސްޓާރު، ޝާހްރުކް ހާންގެ އާ ފިލްމުގެ މަންޒަރުތަކެއް ލީކުވި މައްސަލައެއް ބޮންބޭގެ ފުލުހުން ތަހުގީގުކުރަން ފަށައިފި އެވެ.
ރިޕޯޓްތައް ބުނި ގޮތުގައި، އެ ފިލްމުގެ މަންޒަރުތަކެއް ސޯޝަލް މީޑިއާގައި ލީކުކޮށްލި މައްސަލަ ރިޕޯޓްކުރީ ޝާހުގެ ޕްރޮޑަކްޝަން ހައުސް ރެޑް ޗިލީ އެންޓަޓެއިންމަންޓްގެ ފަރާތުން، އޭނާގެ އަންހެނުން ގޯރީ ހާން އެވެ. އެ މައްސަލަ ރިޕޯޓްކުރީ މިދިޔަ ބުރާސްފަތި ދުވަހު އެވެ.
އެ ވީޑިއޯތައް ލީކުކޮށްލި ކަމަށް ތުހުމަތުވާ ފަސް ޓުވިޓާ އެކައުންޓެއް ފުލުހުން އައިޑެންޓިފައިކޮށް، އެ މީހުން ތަހުގީގަށް ހާޒިރުކުރުމުގެ ކަންކަން ކުރަމުން އަންނަ ކަމަށް ވެސް ރިޕޯޓްތައް ބުންޏެވެ.
އެ ވީޑިއޯތައް ޓުވިޓާއިން ނަގަން އެ މައްސަލަ ވަނީ ދިއްލީގެ ހައި ކޯޓަށް ވެސް ހުށަހަޅައިފަ އެވެ.
ދެކުނު އިންޑިއާގެ ފިލްމު އިންޑަސްޓްރީގައި މަޝްހޫރު ޑައިރެކްޓަރު އަޓްލީ ކުމާރު ޑައިރެކްޓުކުރާ މި ފިލްމުގައި ޝާހުއާ އެކު ލީޑު ރޯލުތަކުން ފެންނާނީ، ދެކުނުގައި މަޝްހޫރު ތަރިން ކަމަށްވާ ނަޔަންތާރާ، ވިޖޭ ސެތޫޕަތީ އަދި ސަންޔާ މަލްހޯތުރާ އެވެ. އަދި ހާއްސަ ފެނިލުމަކުން ދީޕިކާ ޕަދުކޯން ވެސް ފެންނާނެ އެވެ.
މި ފިލްމު ސިނަމާތަކުގައި އަޅުވަނީ އަންނަ މަހު ހަތަކުން ފެށިގެންނެވެ.