13 އޯގަސްޓް 2023 - 11:42
މުޅި ރާއްޖެ ގުޅުވައިދޭނެ އާރުޓީއެލް ފެރީން ބޮޑު ތިލަދުންމައްޗާއި ހުވަދު އަތޮޅަށް ބޮޑު ބަދަލެއް ގެނެސްދެވިއްޖެ ކަމަށާއި އެ ފެރީގެ މިސްރާބު މިހާރު ހުރީ ނ. އަތޮޅު ބަދަލުކޮށްލުމާ ދިމާލަށް ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.
ކެމްޕޭނަށް ނ. އަތޮޅަށް ވަޑައިގެން ޅޮހީގައި ރައީސް އިއުލާންކުރެއްވި ގޮތުގައި މި އަހަރު ނިމުމުގެ ކުރިން ނ. އަތޮޅުގައި އާރުޓީއެލްގެ ދަތުރުތައް ފަށާނެ އެވެ. މި އަތޮޅަށް ބޭނުންވާ އާރްޓީއެލް ފެރީތައް ބަނުމަށް މިހާރު ވަނީ ހަވާލުކޮށްފަ އެވެ.
ރައީސް ވިދާޅުވި ގޮތުގައި ދަތުރުފަތުރުގެ ނިޒާމަކުން ރާއްޖެ ގުޅާލުމަކީ މި ސަރުކާރުން ވަރަށް ބޮޑަށް އިސްކަމެއްދޭ ކަމެކެވެ. އެގޮތުން، ކުރިއަށް ގެންދާ އާރްޓީއެލް ފެރީގެ ނިޒާމްގެ ސަބަބުން މިހާރު ވެސް ބޮޑުތިލަދުއްމައްޗާއި ހުވަދު އަތޮޅަށް ފަސޭހަކަން ލިބިފައިވާ ކަމަށް ވިދާޅުވި އެވެ.
"އާރްޓީއެލް ފެރީގެ ނިޒާމާ އެކު ހީނުކުރާވަރުގެ ބޮޑު ކުރިއެރުމެއް މި ރަށްތަކަށް ލިބިގެންދާނެ. ހިތްހަމަޖެހިގެން ދަތުރު ކުރެވޭ ވަރުގެ ލޯންޗުތަކެއް މި ހޯދައިދެނީ. ނ. އަތޮޅަށް ބޮޑު ބަދަލެއް އަންނަ ތަން ފެނިގެންދާނެ،" ރައީސް ވިދާޅުވި އެވެ.
- ގިރާސަރަަހައްދު ހިމާޔަތްކުރުން،
- ޓޫރިސްޓުންނަށް ވަކި ބީޗެއް.
- 24 ގަޑިއިރަށް ހެލްތު ސެންޓަރު ބަދަލުކޮށް ލެބޯޓަރީއެއް ގާއިމްކުރުން.
- މަލްޓިޕާޕަސް ހޯލާއި ރިސޯސް ރޫމްތައް ގާއިމްކުރުން.
- ޔޫތު ސެންޓަރެއް.
- ފެނުގެ ނިޒާމްގެ މަސައްކަތް ސަރުކާރު ކުންފުންޏަކަށް ދީގެން ނިންމުން
ރައީސް ވިދާޅުވީ މި ސަރުކާރު އައިއިރު ޅޮހީގެ އަސާސީ ހިދުމަތްތައް ވެސް އޮތީ ވަރަށް ދަތި ހާލެއްގައި ކަމަށެވެ. އެކަން ހައްލުކުރުމަށް ވަރަށް ބޮޑު އިސްކަމެއް މި ސަރުކާރުން ދެމުން އަންނަ ކަމަށް ވިދާޅުވި އެވެ.
އެމަނިކުފާނު ވިދާޅުވި ގޮތުގައި މި ސަރުކާރުން ރަށެއްގެ އާބާދީ ކުޑަވުމަކުން އެ ރަށެއް އެކަހެރިނުކުރާނެ އެވެ. ނަމަވެސް އެމަނިކުފާނާ ވާދަވެރި ކެންޑިޑޭޓުންގެ ސިޔާސަތަކީ މިފަދަ ރަށްތައް ބާކީކުރުން ކަމަށާއި އެކަން އެގޮތަށް ކުރާނެކަން ފާޅުގައި ބުނަމުންދާ ކަމަށެވެ.
އެހެންކަމުން، ދެން ވެސް ތަރައްގީގެ މަޝްރޫއުތައް ކުރިއަށް ގެންދަން ބޭނުންވާ ނަމަ، މި ސަރުކާރަށް ވޯޓު ދެއްވައި އެމަނިކުފާނު ދެވަނަ ދައުރަކަށް އިންތިހާބުކޮށްދެއްވުމަށް އެދިވަޑައިގަތެވެ.
"މި ޅޮއްސަށް ބޮޑު ބަދަލެއް އަންނާނެ، އަޅުގަނޑުމެންނަށް ބޮޑު ތާއިދެއް ލިބޭނެ ކަމާ މެދު ޝައްކެއް ނުކުރަން،" ރައީސް ވިދާޅުވި އެވެ.