05 ޖުލައި 2023 - 21:00
މާލެއިން ފުރައިގެން އދ. މަހިބަދޫއަށް ދަތުރުކުރި ދޯންޏެއް އަޑިއަށް ގޮސްފި އެވެ.
ފުލުހުންގެ މީޑިއާ އޮފިޝަލް މައުލޫމާތު ދެއްވި ގޮތުގައި އަޑިއަށް ގޮސްފައޮވަނީ 'ރިކާޑޯ' ނަމަކަށް ކިޔާ މުދާ އުފުލާ ދޯންޏެކެވެ. އެ ދޯނި އަޑިއަށް ގޮސްފައިވަނީ އަލިހުރަސް ކަނޑަށެވެ.
ދޯނި އަޑިއަށްދާ ކަމުގެ މައުލޫމާތު ލިބުމުން އދ. ޕޮލިސް ލޯންޗު އެ ސަރަހައްދަށް ގޮސް ދޯނީގައި ތިބި އަށް މީހުން ސަލާމަތްކޮށްފައިވާ ކަމަށް އޮފިޝަލް ވިދާޅުވި އެވެ. އެ އެންމެންގެ ހާލު ވެސް ރަނގަޅެވެ.
ރާއްޖެއަށް މި ދެތިން ދުވަހު މޫސުން ވަނީ ވަރަށް ބޮޑަށް ގޯސްވެފަ އެވެ. ހާއްސަކޮށް މެދުރާއްޖެތެރެ އާއި އުތުރުގެ އަތޮޅުތަކަށް ވައި އަދި ކަނޑު ވަނީ ގަދަވެފަ އެވެ. އެހެންވެ، ކަނޑު ދަތުރުފަތުރު ކުރުމުގައި ރައްކާތެރިވުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފަ އެވެ.
މޫސުމާ ބެހޭ ގައުމީ އިދާރާއިން ވަނީ ހއ. އާއި އދ. އަތޮޅާ ދެމެދަށް ހުދު އެލާޓް ނެރެފަ އެވެ. އަދި ރ. އަތޮޅުން ފެށިގެން ފ. އަތޮޅާ ހަމައަށް ރީނދޫ އެލާޓް ނެރެފަ އެވެ.