18 ޖޫން 2023 - 11:27
އިއްޔެ ނިމުނު ދިވެހި ސާފް ލީގުގެ ތިންވަނަ މުބާރާތް ކަމަށްވާ ކ. ހިންމަފުށީގެ ގާމާދޫކޮޅު މުބާރާތުގެ ޖޫނިއާ ޗެމްޕިއަންކަން ކަޔާން އަބްދުﷲ އަރީފް (ކައިޕުޓީ) ހޯދައިފި އެވެ.
މިއީ ކަޔާން އަރީފް އެމްއެސްއޭ މުބާރާތަކުން ޗެމްޕިއަންކަން ހޯދި ފުރަތަމަ ފަހަރެވެ. އޭނާ ޗެމްޕިއަންކަން ހޯދީ ފައިނަލް ހީޓުގައި ޔަސީން އަހުމަދު ނާޝިދު ބަލިކޮށްފަ އެވެ.
އިއްޔެ ކުރިއަށް ދިޔަ ފައިނަލް ހީޓުގައި ކަޔާން ވަނީ ޖުމްލަ 12.77 ޕޮއިންޓް ހޯދައިފަ އެވެ. އޭނާގެ އެންމެ ފަހު ރާޅަށް 7.117 ޕޮއިންޓް ހޯދިއިރު އޭގެ ކުރީ ރާޅަށް 5.60 ޕޮއިންޓް ހޯދި އެވެ. ޔަސީން އަށް ލުބުނީ ޖުމްލަ 7.50 ޕޮއިންޓެވެ. ޔަސީންގެ ފުރަތަމަ ރާޅަށް 4.50 ޕޮއިންޓް ހޯދިއިރު ދެވަނަ ރާޅަށް ވަނީ ތިން ޕޮއިންޓް ހޯދައިފަ އެވެ.
އޭނާ ވަނީ ސެމީ ފައިނަލްގައި، މިދިޔަ އަހަރުގެ ރަނަރަޕް މުހައްމަދު އިނާން އަބްދުލް ހަންނާން އާ ވާދަކޮށް 11.83 ޕޮއިންޓް ހޯދައިފަ އެވެ. އިނާން އަށް ހޯދުނީ ޖުމްލަ 10.06 ޕޮއިންޓެވެ.
ޔަސީން ފައިނަލަށް ދިޔައީ، މިދިޔަ އަހަރު ވެސް ސެމީ ފައިނަލްގައި ވާދަކުރި ޝާނިފް ޝަފީގު ބަލިކޮށްފަ އެވެ. ޔަސީން ވަނީ މި ހީޓުގައި 11.84 ޕޮއިންޓް ހޯދައިފަ އެވެ. ޝާނިފް އަށް ލިބުނީ 8.53 ޕޮއިންޓެވެ. މިދިޔަ އަހަރުގެ ސެމީ ގައި ޝާނިފް ބަލިވީ އިނާން އާ ވާދަ ކޮށްގެންނެވެ.
މި މުބާރާތުގެ ކުރިން މިއަހަރުގެ ސާފް ލީގުގެ ޖޫނިއާ ރޭންކިންގެ އެއްވަނައިގައި އޮތީ ޔަސީން އެވެ. ކައިޕުޓީ އޮތީ ދެވަނައިގަ އެވެ. ޔަސީން ވަނީ މ. މުލީގައި އޮތް ލީގުގެ ދެވަނަ މުބާރާތުގައި ފައިނަލްގައި ވާދަ ކޮށްފަ އެވެ. އޭގެ ކުރިން ގދ. ގައްދޫ މުބާރާތުގެ ސެމީ ފައިނަލްގައި ވާދަ ކުރި އެވެ. ކައިޕުޓީ ވަނީ މުލީގަ އާއި ގައްދޫގައި ވެސް ސެމީ ފައިނަލްގައި ވާދަ ކޮށްފަ އެވެ.
ޗެމްޕިއަން ހޯދުމާ އެކު ކަޔާން ވަނީ ޖުމްލަ 10 ޕޮއިންޓްގެ ތަފާތުން މިވަގުތަށް ލީގު ރޭންކިންގެ އެއްވަނައަށް ޖެހިލައިފަ އެވެ. ކައިޕުޓީ އަށް މިވަގުތު ލީގުގައި ޖުމްލަ 2460 ޕޮއިންޓް ލިބިފައި ވާއިރު، ޔަސީން އަށް ލިބިފައި ވަނީ 2450 ޕޮއިންޓެވެ.