17 ޖޫން 2023 - 08:28
ސައުންޑްކަލައުޑްގެ ތާރީހުގައި ވެސް އެންމެ ގިނަ މީހުން އަޑުއެހި ޓްރެކްގެ ރެކޯޑު ބީޓީއެސްގެ ޖިމިންގެ ސޯލޯ ލަވަ "ޕްރޮމިސް" އަށް ލިބިއްޖެ އެވެ.
ޖުމްލަ 327 މިލިއަން ސްޓްރީމް ލިބިފައިވާ އެ ލަވަ އަށް ވަނީ 8.5 މިލިއަން ޕްލޭއާ އެކު 24 ގަޑިއިރު ތެރޭ އެންމެ ގިނަ މީހުން އަޑުއެހި ރެކޯޑު ވެސް ލިބިފަ އެވެ.
މިހާތަނަށް އެންމެ ގިނަ ޓްރެކް ހިމެނޭ މިއުޒިކް ސްޓްރީމިން ޕްލެޓްފޯމުގެ ގިނީސް ވޯލްޑް ރެކޯޑު ސައުންޑްކްލައުޑަށް ލިބުމާ އެކު، އެ ޕްލެޓްފޯމުގެ އެންމެ ގިނަ މީހުން ބެލި ލަވަ، 'ޕްރޮމިސް' ވެސް ވަނީ އެ ވޯލްޑް ރެކޯޑުގައި ހިމެނިފަ އެވެ.
މި އަހަރުގެ ޖެނުއަރީ މަހުގެ ނިޔަލަށް 300 މިލިއަނަށްވުރެ ގިނަ ޓްރެކް އަޕްލޯޑުކޮށްފައިވާ ސައުންޑްކްލައުޑަކީ މަޝްހޫރު އާޓިސްޓުންތަކެއް ގުޅިގެން އުފެއްދި ޕްލެޓްފޯމެކެވެ. ޗާންސް ދަ ރެޕާ އާއި ޖޫސް ވޯލްޑް އަދި ޕޯސްޓް މަލޯން ފަަދަ އާޓިސްޓުންގެ ކެރިއާ ފެށުނީ ސައުންޑްކްލައުޑުންނެވެ.
އެ ޕްލެޓްފޯމް އެންމެ ފުރަތަމަ ލޯންޗުކުރީ 2008 ވަނަ އަހަރު އެވެ. އެންމެ ފަހުގެ ތަފާސް ހިސާބުތަކަށް ބަލާއިރު، ސައުންޑް ކްލައުޑް ކޮންމެ މަހަކު ބޭނުންކުރާ އެކްޓިވް ޔޫސާއިންގެ އަދަދު 76 މިލިއަނަށް އަރަ އެވެ. އެއިން 190 ގައުމަކުން އަޑުއެހުމުގެ ފުރުސަތު ލިބޭއިރު 30 މިލިއަން ކްރިއޭޓަރުން ތިބެ އެވެ.
ޖިމިން މީގެ ދުވަސްކޮޅެއް ކުރިން ވެސް ވަނީ ގިނީސް ރެކޯޑު ފޮތުގައި ހިމެނިފަ އެވެ. އެއީ ސައުންޑްކްލައުޑް ސޯލޯ އެކައުންޓެއް ހުޅުވުމާއެކު އެންމެ އަވަހަށް ޖުމްލަ ސްޓްރީމް އެއް ބިލިއަނަށް އަރާ މީހާއަށްދޭ ރެކޯޑެވެ. މީގެ ކުރިން 409 ދުވަހުން ބީޓީއެސްގެ ޖަންގް ކުކް ހޯދާފައިވާ އެ ރެކޯޑު، ދެ ހަފްތާ ފަހުން ޖިމިން މުގުރާލީ ސޯލޯ ޑެބިއުގެ 393 ދުވަހުންނެވެ.