16 ޖޫން 2023 - 13:37
ކ. ހިންމަފުށީގައި މިހާރު ކުރިއަށްދާ ދިވެހި ސާފް ލީގުގެ ތިންވަނަ މުބާރާތް ކަމަށްވާ ގާމާދޫކޮޅު މުބާރާތުގެ ޖޫނިއާ ބައިގެ ސެމީ ފައިނަލަށް ޝާނިފް ޝަފީގާއި ޔަސީން އަހުމަދު ނާޝިދު އަދި މުހައްމަދު އިނާން އަބްދުލް ހަންނާނާއި ކަޔާން އަބްދުﷲ އަރީފް (ކައިޕުޓީ) ހޮވިއްޖެ އެވެ.
ޝާނިފް ސެމީ އަށް ހޮވުނީ މިއަދު ކުރިއަށް ދިޔަ ކުއާޓާގެ ހީޓުގައި 9.50 ޕޮއިންޓް ހޯދައިގެން އިސްމާއިލް މަދުހު އަހުމަދު ފަހަތަށް ޖައްސާލައިފަ އެވެ. ސެމީގައި ޝާނިފް ވާދަ ކުރަން ޖެހޭނީ ޔަސީން އަހުމަދު ނާޝިދާ އެވެ.
ޔަސީން ވަނީ 14 ޕޮއިންޓް ހޯދައިގެން ކުއާޓާގައި މުހައްމަދު ސުމަންގެ މައްޗަށް ކުރި ހޯދައިފަ އެވެ. ޔަސީން ވަނީ ފުރަތަމަ ރާޅަށް 5.83 ޕޮއިންޓް ހޯދައި، ދެވަނަ ރާޅަށް 8.17 ޕޮއިންޓް ހޯދައިފަ އެވެ.
ދެވަނަ ސެމީ ފައިނަލް ހީޓުގައި އޮތީ އިނާން އާއި ކައިޕުޓީގެ ކުރިމަތިލުމެކެވެ. އިނާން ވަނީ ކުއާޓާގައި 10 ޕޮއިންޓް ހޯދައިގެން ނޫހު މުހައްމަދު ދުނައިމް އިރުޝާދު ފަހަތަށް ޖައްސާލައިފަ އެވެ.
ކައިޕުޓީ ސެމީ އަށް ދަތުރު ކުރީ ކުއާޓާގައި 16.33 ޕޮއިންޓް ހޯދައިގެން ވާދަވެރި ހީޓެއްގައި 12 ޕޮއިންޓް ހޯދި ސައްޔިދު ސަލާހުއްދީން ބަލިކޮށްފަ އެވެ. ސައްޔިދުގެ ފުރަތަމަ ރާޅަށް 7.17 ޕޮއިންޓް ހޯދި އިރު ދެވަނައަށް އެންމެ ރަނގަޅު ރާޅަށް ހޯދީ 4.83 ޕޮއިންޓެވެ. ކައިޕުޓީ މި ހީޓުން މޮޅުވީ ފަހު ދެ ރާޅުގައި 7.33 ޕޮއިންޓަކާއި ނުވަ ޕޮއިންޓް ހޯދައިގެންނެވެ.
ޖޫނިއާ ބައިގެ ތިންވަނަ ބުރުގައި މަދުހު ވަނީ ވާދަކުރި ހީޓުގައި 9.33 ޕޮއިންޓް ހޯދައިގެން އެއްވަނަ ހޯދައިފަ އެވެ. ދެވަނައަށް ދިޔައީ 5.77 ޕޮއިންޓް ހޯދި މުހައްމަދު ސުމަން އެވެ.
ރީ ކޮލިފައިން ބުރުގައި ވާދަކޮށް ތިންވަނަ ބުރުން ޖާގަ ހޯދި ޔަސީން ވަނީ ތިންވަނަ ބުރުގެ ދެވަނަ ހީޓުގައި ވާދަކޮށް އެއްވަނަ ހޯދައިފަ އެވެ. ޔަސީން އަކީ މިވަގުތު ޖޫނިއާ ލީގު ރޭންކިންގެ އެއްވަނައިގައި އޮތް އެތުލީޓެވެ. ޔަސީން ވަނީ ތިންވަނަ ބުރުގެ ދެވަނަ ހީޓުގައި 10.67 ޕޮއިންޓް ހޯދައިފަ އެވެ. ދެވަނައަށް ދިޔައީ 8.03 ޕޮއިންޓް ހޯދި ޝާނިފް އެވެ.
އިނާން ވަނީ ތިންވަނަ ބުރުގައި ވާދަކުރި ހީޓުގައި 13.67 ޕޮއިންޓް ހޯދައިގެން އެއްވަނަ ހޯދައިފަ އެވެ. ދެވަނައަށް ދިޔައީ 10.10 ޕޮއިންޓް ހޯދި ސައްޔިދެވެ. ތިންވަނަ ބުރުގެ ފަހު ހީޓުގައި ކައިޕުޓީ ވަނީ 8.84 ޕޮއިންޓް ހޯދައިގެން ހީޓްގެ އެއްވަނަ ހޯދައިފަ އެވެ. އެ ހީޓުގެ ދެވަނަ ހޯދީ 5.33 ޕޮއިންޓް ހޯދި ނޫހް އެވެ.