15 ޖޫން 2023 - 19:42
ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ ހިއްސާ އޮންނަ ޓޫޖީ ޕްރައިވެޓް ލިމިޓެޑަށް ވ. އާރަށް ހޯދައިދިނުމުގައި އޭރުގެ ރައީސް އަބްދުﷲ ޔާމީން ރަސްމީ ހައިސިއްޔަތު ބޭނުންކުރެއްވިކަން ސާފުކޮށް އެނގޭ ކަމަށް ބުނެ ދައުލަތުން މިއަދު ހައި ކޯޓުގައި ރައްދު ދީފި އެވެ.
އިސްތިއުނާފުގެ ޝަރީއަތުގައި ދައުލަތުގެ ވަކީލް، ޕަބްލިކް ޕްރޮސެކިއުޓާ އަހުމަދު ޝަފީއު ވިދާޅުވީ އާރަށް ހޯދުމަށް ރިޝްވަތު ދިންކަން ޔޫސުފް ނައީމްގެ މައްޗަށް ސާބިތުވާ ކަމަށް ކްރިމިނަލް ކޯޓުން ހުކުމް ކުރީ ދައުވާ ބިނާކުރި ކުށުގެ މައިގަނޑު ރުކުނެއް ސާބިތުވާން ނެތް ހާލަތެެއްގައި ކަމަށް ދިފާއުން ބުނާ ވާހަކައަކީ ވިޔާނުދާ ގޮތަކަށް ކުރާ މާނައެއް ކަމަށެވެ.
ވ. އާރަށް ކުއްޔަށް ދިނުމުގެ މުއާމަލާތުގައި ރިޝްވަތު ދިނުމާއި އެ ފައިސާ ގަބޫލުކުރުމާއި ފައިސާ ލޯންޑާކުރި ކަމުގެ ކުށުގައި ކުރީގެ ރައީސް ޔާމީން 11 އަހަރަށް ޖަލަށް ލުމަށާއި ޔޫސުފް ނައީމް ތިން އަހަރާއި ދެ މަހަށް ޖަލަށް ލުމަށް ކުރި ހުކުމުގެ އިސްތިއުނާފްގައި ޝަފީއު ވިދާޅުވީ ދައުލަތުން ރައްދުގައި ހުށަހެޅި ވާހަކަތަށް، އިސްތިއުނާފުކުރާ ފަރާތުން ވިޔާނުދާ މާނައެއް ނަގައި ސީދާ އިދިކީއްޔަށް ވާހަކަ ދައްކާފައިވާ ކަމަށެވެ.
އޭނާ ވިދާޅުވީ ދިފާއުގެ ވާހަކަތައް ހުރީ ދައުވާ ބިނާކޮށްފައިވާ އޮތް އަސާސްތަކާ ވެސް ހިލާފަށް ކަމަށެވެ.
ދައުލަތުން ބުނީ ދައުވާ ބިނާކޮށްފައިވާނީ އެމްއެމްޕީއާރްސީ މެދުވެރިކޮށް ޓޫރިޒަމް މިނިސްޓްރީން ޓޫރިސްޓު ރިސޯޓެއް ތަރައްގީކުރުމަށްޓަކައި ޔޫސުފް ނައީމްގެ ހިއްސާ އޮންނަ ޓޫޖީ ޕްރައިވެޓް ލިމިޓެޑަށް އާރަށް ކުއްޔަށް ލިބޭނެ އިންތިޒާމް ހަމަޖައްސައިދިނުމުގެ މުގާބިލުގައި ޔާމީން ރިޝްވަތު ދީފައި ވާތީ ކަމަށެވެ.
"އެހެންވީމާ ޓޫޖީ ޕްރައިވެޓް ލިމިޓެޑަށް އާރަށް ކުއްޔަށް ލިބޭނެ އިންތިޒާމް ހަމަޖެއްސުމަށް ކުރި ކޮންމެ އަމަލެއް މި ދައުވާގެ ތެރެއަށް ވަދޭ،" ޝަފީއު ވިދާޅުވި އެވެ.
އޭނާ ވިދާޅުވީ ޔާމީން މިކަމުގައި ކުރެއްވި އަމަލުތައް އިސްތިއުނާފް ފޯމުގައި ވެސް ބަޔާންކޮށްފައި އޮންނާނެ ކަމަށާއި ފުރަތަމަ އަމަލަކީ ފިޝަރީޒް މިނިސްޓްރީގެ ބެލުމުގެ ދަށުގައި އާރަށް އޮއްވައި ޓޫރިޒަމް މިނިސްޓްރީގެ ދަށަށް އެ ރަށް ބަދަލުކުރުން ކަމަށެވެ. އެއީ ގާނޫނުން ހަމައެކަނި ރައީސުލްޖުމްހޫރިއްޔާއަށް ލިބިދޭ ބާރެއްކަން އޭނާ ފާހަގަކުރެއްވި އެވެ. ޝަފީއު ވިދާޅުވި ގޮތުން ޔާމީން ކުރެއްވި ދެ ވަނަ އަމަލަކީ އޭރު ޓޫރިޒަމް މިނިސްޓްރީ ހިންގުން ހަވާލުކޮށްފައިވާ ނައިބު ރައީސް އަހްމަދު އަދީބަށް އަންގައިގެން އެ ރަށް ލިބޭނެ އިންތިޒާމް ހަމަޖެއްސުން ކަމަށެވެ.
"ދައުލަތުން އެއްވެސް މަރުހަލާއެއްގައި، އެއްވެސް މަހައްލެއްގައި ނުދަންނަވަން ރައީސް ޔާމީން ސީދާ ވަޑައިގެން ޓޫޖީ ޕްރައިވެޓް ލިމިޓެޑަށް އެރަށް ބަދަލުކުރުމާ ގުޅޭ މުއާމަލާތެއްގައި، އެއްބަސްވުމެއްގައި ސޮއިކޮށް ބައިވެރިވި ކަމަކަށް. ދައުލަތުން ދަންނަވާފައި ވާނީ ރައީސް ޔާމީން އެގޮތަށް އެންގެވި ކަމަށް."
ރައީސުލްޖުމްހޫރިއްޔާގެ ރަސްމީ ހައިސިއްޔަތުގެ ތެރޭގައި ޓޫރިޒަމް މިނިސްޓްރީގެ މަސައްކަތެއް ނެތް ކަމަށް ދިފާއުން ބުނާތީ ޝަފީއު ވިދާޅުވީ އެއީ ހަގީގަތެއް ކަމަށާއި އެކަމަކު ވަޒީރުން ކަންކަން ކުރުމަށް އިރުޝާދު ދިނުމާއި ކަންކަން ކުރުމަށް އެންގުން ރައީސްގެ ބާރުތަކުގެ ތެރޭގައި ގާނޫނުއަސާސީގައި ކަނޑައަޅާފައިވާ ކަމަށެވެ. އެހެންވެ މިއީ ރައީސްގެ ރަސްމީ ހައިސިއްޔަތުގެ ތެރޭގައި ހިމެނޭ ކަންތައް ކަމަށާއި އެ ކަންކަމަށް އެޔަށް ދިފާއުން ޖަވާބެއް ދީފައި ނެތް ކަމަށް ދައުލަތުން ބުންޏެވެ.
ޓޫރިޒަމް މިނިސްޓްރީން ކުރާ ކަމަކީ ރައީސް ޒިންމާވާން ނުޖެހޭނެ ކަމަށް ބުނާ ވާހަކަ އަކީ ދައުވާ ބިނާކުރި ކަންކަމާ ނުގުޅޭ ވާހަކަތަކެއް ކަމަށާއި ޔޫސުފް ނައީމަށް އެނގެންޖެހޭނެ ކަންކަމަކީ ރައީސަކީ ޔާމީންކަމާއި ވަޒީރުން ވަކި ކަމެއް ކުރުމަށް އެންގުމުގެ ބާރު ރައީސަށް އޮތުން ކަމަށް ވެސް ދައުލަތުން ބުންޏެވެ.
"ދައުލަތަކުން ނުދަންނަވަން ރައީސުލްޖުމްހޫރިއްޔާ ޓޫރިޒަމް މިނިސްޓްރީ ތެރެއަށް ވަޑައިގެން، އެގްރީމެއްޓެއްގައި ސޮއިކޮށް، ޓޫޖީ ޕްރައިވެޓް ލިމިޓެޑާ ރަށެއް ހަވާލުކުރި ކަމަކަށް،" ވަކީލް ޝަފީއު ވިދާޅުވި އެވެ.
ދައުލަތުން މިހެން ބުނުމުން، ފަނޑިޔާރުންގެ ބެންޗުގެ ރިޔާސަތުން ހަސަން ޝަފީއު ވަނީ ރައީސް އެގޮތަށް އެންގެވިއްޔާ އެކަމެއް ނުކުރުމުގެ އިހްތިޔާރު މިނިސްޓަރަށް އޮންނާނެތޯ ސުވާލުކުރައްވައިފަ އެވެ. ދައުލަތުގެ ވަކީލް ޝަފީއު ވިދާޅުވީ ފަރުދަކަށްވީތީ އެ އޮންނަ އިހްތިޔާރު އޮންނާނެ ކަމަށާއި އެކަމަކު ވަޒީރުންގެ މަޖިލީހަކީ ރައީސްގެ ސިޔާސަތު ތަންފީޒުކުރަން އޮންނަ ތަނަކަށް ވާތީ އާއި ވަޒީރުންނަކީ ރައީސަށް ކޮންމެ އިރަކު ވެސް ވަކިކުރެވޭ ގޮތަށް ތިބޭ ބަޔަކަށް ވާތީ ރައީސްގެ ބާރު ވަޒީރުންގެ މައްޗަށް އޮންނާނެކަން ސާފުކޮށް އެނގޭ ކަމަށެވެ.
ޔޫސުފް ނައީމްގެ ފަރާތުން ބުނާ ގޮތުގައި، ޔާމީނަށް ފައިސާ ދިނީ ނައީމްގެ ހިއްސާ އޮތް ކުންފުންޏަކަށް ވ. އާރަށް ލިބޭނެ އިންތިޒާމް ހަމަޖައްސައިދިނުމުގެ މުގާބިލްގައި ކަމަށް ދައުވާގައި ބުނާއިރު އެއީ ރިޝްވަތު ދިނުމުގެ ކުށް ބަޔާންކުރާ ގާނޫނުލްއުގޫބާތުގެ 510 ވަނަ މާއްދާގެ ށ. ގައި ބަޔާންކޮށްފައިވާ ގޮތް ނޫން ކަމަށެވެ. އެއީ ރައީސްގެ ރަސްމީ ހައިސިއްޔަތު ނުވަތަ ވާޖިބުގެ ތެރޭގައި ހިމެނޭ ކަމެއްކަން ޔޫސުފް ނައީމަށް ގަބޫލުކުރެވެންޖެހޭ ސަބަބެއް ގާނޫނުލްއުގޫބާތުގެ 15 ވަނަ މާއްދާ އާއި ގާނޫނުއަސާސީގައި ބުނާ ގޮތަށް ދައުލަތަށް ސާބިތުކޮށްނުދެވޭ ހާލަތެއް ކަމަށް ދިފާއުން ބުނެ އެވެ.
ޔޫސުފް ނައީމްގެ ވަކީލް ހަމްޒާ ލަތީފް ވިދާޅުވީ ދައުލަތުގެ މުވައްޒަފަކު އެ މީހެއްގެ ރަސްމީ ހައިސިއްޔަތުގެ ބޭރުން އޭނާގެ މަގާމުގެ ނުފޫޒު ބޭނުންކޮށްގެން ނުވަތަ އެ ނޫން ގޮތަކަށް ވެސް ގާނޫނާ ހިލާފަށް ކަމަކަށް ނުފޫޒެއް ފޯރުވައިފި ނަމަ އެކަމާ ގުޅިގެން ދައުވާކުރަންޖެހޭ މާއްދާ އަކީ 512 ވަނަ މާއްދާ ކަމަށެވެ. އެހެންވެ ޔޫސުފް ނައީމަށް ކުރީ ނުބައި ދައުވާއެއް ކަމަށް އިސްތިއުނާފުގެ މައިގަނޑު އެއް ނުކުތާގެ ގޮތުގައި ވަނީ ފާހަގަކޮށްފަ އެވެ.
ޔޫސުފް ނައީމްގެ ފަރާތުން ފާހަގަކުރި އެހެން ކަންކަމުގެ ތެރޭގައި ޝަރީއަތް ފެށުމަށް ފަހު ދައުލަތުން ހުށަހެޅި ހެކިތައް ބަލައިގަނެ އެއަށް ރިއާޔަތްކޮށްފައިވަނީ ޖިނާއީ އިޖުރާއަތުގެ ގާނޫނާ ހިލާފަށް ކަމަށް ބުންޏެވެ. އަދި ކުށް ސާބިތުވާ ކަމަށް ކަނޑައެޅުމަށް ފަހު އަދަބާ ބެހޭ ގޮތުން ވާހަކަ ދެއްކުމަށް ހަމައެކަނި ދޮޅު ގަޑިއިރު ކަނޑައަޅާފައިވަނީ ދިފާއަށް އެކަށީގެންވާ ވަގުތާއި ވަސީލަތް ނުލިބޭ ގޮތަށް ކަމަށް ވެސް ހުށަހަޅާފައިވެ އެވެ. އެހެންވެ ޔޫސުފް ނައީމްގެ މައްޗަށް ޖަލު އަދަބު ފިޔަވައި އެހެން އަދަބެއް ކަނޑައަޅާފައި ނުވަނީ ގާނޫނުލްއުގޫބާތުގައި ކަނޑައަޅާފައިވާ ގޮތާ ހިލާފަށް ކަމަށް ބުންޏެވެ. އިސްތިއުނާފް ފެށި ދުވަހު އާއި މިއަދު ވެސް މި ނުކުތާތަކަށް ދައުލަތުން ވަނީ ރައްދު ދީފަ އެވެ.
މިއަދު މެންދުރު ފަހު 2:00 އަށް ތާވަލްކުރި ޝަރީއަތް 5:00 ގެ ފަހުން ހުއްޓާލި އިރު ވެސް ޔާމީންގެ އިސްތިއުނާފީ ނުކުތާތައް ހުށަހެޅުމަށް ފުރުސަތެއް ނުލިބުނެވެ. އެހެންވެ މިއަދު ވެސް ޔާމީންގެ ބައި ކުރިއަކަށް ނުގެންދެވުނެވެ. އިސްތިއުނާފުގެ އިތުރު އަޑުއެހުމެއް އަންނަ ހަފްތާއަށް ތާވަލްކުރަން މަސައްކަތްކުރާނެ ކަމަށް ފަނޑިޔާރުންގެ ބެންޗުން އެންގެވި އެވެ.