28 ޖެނުއަރީ 2017 - 17:47
މާލެ އާއި ހުޅުލެއާ ދެމެދު އަޅާ ބްރިޖްގެ މަސައްކަތް ކުރިއަށް ދާ މަންޒަރު ބަލަން ލޮނުޒިޔާރަތްކޮޅުގައި އަޅާ ޕްލެޓްފޯމް އަންނަ މަހު އާންމުންނަށް ހުޅުވާލާނެ ކަމަށް ސްޓްރާޑާ ޕްރައިވެޓް ލިމިޓެޑުން ބުނެފި އެވެ.
ގާތްގަނޑަކަށް 10،000 އަކަފޫޓުގެ ބިމެއްގައި ރެސްޓޯރަންޓެއް ވެސް ހިމެނޭ ގޮތަށް ޕްލެޓްފޯމް އަޅަނީ ކުރިން ރާޅާ އަޅަން ބޭނުން ކުރި ސަރަހައްދުގެ ކުރިމަތީގައި އޮންނަ އަޑި ޕާކުގަ އެވެ.
ސްޓްރާޑާގެ މެނޭޖިން ޑިރެކްޓަރު ޒާހިދު ރަމީޒު މިއަދު ވިދާޅުވި ގޮތުގައި ލޮނުޒިޔާރަތްކޮޅުގައި އަޅާ ޕްލެޓްފޯމް ރާއްޖޭން ބޭރުން ގެނެސް، ރާވައި ގާތްގަނޑަކަށް ނިންމާފައިވާ ކަމަށެވެ. ޕްލެޓްފޯމާއެކު ކުޑަކުދިން ކުޅޭނެ ސަރަހައްދު އަންނަ މަހުގެ މެދުތެރޭގައި އާންމުންނަށް ހުޅުވާލާނެ ކަމަށް ޒާހިދު ވިދާޅުވި އެވެ.
ނަމަވެސް، އެ ސަރަހައްދުގައި ހެދުމަށް ނިންމި ރެސްޓޯރަންޓާއި ޕާކިން ޒޯން މާޗު މަހުގެ ކުރީކޮޅު ހުޅުވަން މަސައްކަތް ކުރަމުން އަންނަ ކަމަށް ވެސް އޭނާ ވިދާޅުވި އެވެ.
"ރެސްޓޯރަންޓަށް ބޭނުންވާ ބައެއް ސާމާނު ލިބުން ލަސްވެގެން ރެސްޓޯރަންޓު ހުޅުވުން ލަސްވަނީ، ޕްލެޓްފޯމް ހުޅުވާތާ ގާތްގަނޑަކަށް 20 ދުވަސް ފަހުން އެ ތަން ވެސް ހުޅުވާނަން،" ޒާހިދު ވިދާޅުވި އެވެ.
"އެއްބަސްވި މުއްދަތަށްވުރެ މާ ކުރިން ޕްލެޓްފޯމްގެ މަސައްކަތް ނިމުމަކަށް މިއައީ،" އޭނާ ވިދާޅުވި އެވެ.
ޒާހިދު ވިދާޅުވި ގޮތުގައި އެ ކުންފުނިން ތައްޔާރު ކުރި ޕްރޮޕޯސަލް އަށް ވުރެ އެ ސަރަހައްދު މާ ފުރިހަމަ ވާނެ އެވެ. މިއީ އާންމުން ހިތްހަމަޖެހޭ ފަދަ ތަނަކަށް ވާނެ ކަމުގެ އުންމީދު ބޮޑު ކަމަށް ވެސް އޭނާ ވިދާޅުވި އެވެ.
"ކުދިކުދި ބަދަލުތަކެއް ގެނެސްފައި ހުންނާނީ، އިންޑޯ ޕާކެއް ގާއިމުކޮށް އެ ތަނުގައި ކުޑަކުދިން ކުޅޭ ސާމާނު ހުންނާނީ. ކުރިން ނިންމާފައި އޮތީ އައުޓްޑޯ ޕާކެއް ހަދަން،" ޒާހިދު ވިދާޅުވި އެވެ.
ޕްލެޓްފޯމް ހިމެނޭ މަޝްރޫއު އަށް، އަށް މިލިއަނަށްވުރެ ގިނަ ރުފިޔާ ހޭދަވާނެ ކަމަށް މީގެ ކުރިން ސްޓްރާޑާއިން ވަނީ ބުނެފަ އެވެ. އެކަމަކު ބައެއް ބަދަލުތަކެއް ގެނައުމާ ގުޅިގެން މަޝްރޫއުއަށް 13 މިލިއަނަށްވުރެ ގިނަ ރުފިޔާ ހަރަދުވާނެ ކަމަށް ޒާހިދު ވިދާޅުވި އެވެ. އެ މަޝްރޫއަށް ހުރިހާ ހަރަދެއް ކުރަނީ، ހައުސިން މިނިސްޓްރީން މަޝްރޫއު ހަވާލުކުރި، ނިއުޕޯޓް ރެސްޓޯރަންޓް ހިންގާ ކުންފުނި، ސްޓްރާޑާއިންނެވެ.
ޕްލެޓް ފޯމް ހަދަނީ ހަ މީޓަރު އުސްމިނުގަ އެވެ. އެތަނާއި ރެސްޓޯރެންޓް ހިންގަން ސްޓްރާޑާއާ ހަވާލުކުރީ ތިން އަހަރުގެ މުއްދަތަކަށެވެ.
- ޕްލެޓްފޯމްގައި އެއް ފަހަރާ 350 މީހުންނަށް ތިބެވޭނެ
- 250 އަށްވުރެ ގިނަ އުޅަނދު ޕާކް ކުރެވޭނެ
- ބްރިޖު މަސައްކަތް ގާތުން ބެލުމަށް ދެ ދުރުމީ ހުންނާނެ
- ކުޑަކުދިން ކުޅެން ހާއްސަ ސަރަހައްދެއް ހުންނާނެ
- އިންޑޯ އަދި އައުޓްޑޯ ރެސްޓޯރަންޓެއް ހުންނާނެ
- ސިޑިއެއް ގޮތަށް މައްޗަށް އެރޭ ޕްލެޓްފޯމްގެ އުސްމިނުގައި 6 މީޓަރު
"ބައެއް ބަދަލުތައް ގެނެސްފައި ހުންނާނީ، އިންޑޯ ޕާކް އޭސީ ކުރުމާއި ގްރެނައިޓް ފްލޯރިންއެއް ހަދައި ތޮށިގަނޑު ވަރަށް ބޮޑަށް ރީތިކޮށް، ލައިޓާއި ގަސް ފަދަ ތަކެތި ޖެހުމުން،" ޒާހިދު ވިދާޅުވި އެވެ.
ސްޓްރާޑާއިން ކުރިން ބުނި ގޮތުގައި ޕްލެޓްފޯމް ހިމެނޭ ސަރަހައްދު ތަރައްގީ ކުރާނީ ކުލީގެ ގޮތުގަ އާއި އިވެންޓްތައް ބާއްވައިގެން އާމްދަނީ ހޯދަން އެ ކުންފުނިން ވަނީ ވިސްނައިފަ އެވެ.