12 ޖޫން 2023 - 15:32
މި އަހަރު ރާއްޖެ އިން ހައްޖަށް ދާ މީހުންގެ ފުރަތަމަ ގްރޫޕް މިއަދު ފުރައިފި އެވެ.
މި އަހަރު ރާއްޖެއިން 1،000 މީހުން ހައްޖަށް ދާއިރު، ސައުދީ އެއާލައިންސް އިން މިއަދު ފުރީ ހައްޖު ކޯޕަރޭޝަންގެ ހަވާލުގައި ހައްޖަށް ދާ 294 މީހުންނެވެ.
ހައްޖަށް ދާ މީހުންނަށް އަލްވަދާއު ކިޔުމަށް އެ މީހުންގެ އާއިލާތަކާއި ރައްޓެހިންގެ ގިނަ ބަޔަކު މިއަދު ވެލާނާ އިންޓަނޭޝަނަލް އެއާޕޯޓަށް ދިޔަ އެވެ. އަދި ނައިބު ރައީސް ފައިސަލް ނަސީމް ވެސް ވެލާނާ އިންޓަނޭޝަނަލް އެއާޕޯޓަށް ވަޑައިގެން މިއަދު ފުރާ މީހުންނާ ސަލާމް ކުރައްވައި ހާލު ބެއްލެވި އެވެ.
އިސްލާމިކް މިނިސްޓްރީން ބުނީ މި ފަހަރު ހައްޖަށް ދާ މީހުން ފުރަން ހަމަޖެހިފައި ވަނީ ހަ ފްލައިޓަކުން ކަމަށެވެ. އެ ފްލައިޓްތައް އޮންނާނީ މި މަހުގެ 12، 13، 15، 16 އަދި 19 ވަނަ ދުވަހު އެވެ.
މާދަމާ ފުރާނީ ސިސިލްފަރު ހައްޖު އެންޑް އުމްރާ ގްރޫޕްގެ ހަވާލުގައި ދާ 90 މީހުންނެވެ.
ސައުދި އަރަބިއްޔާ އިން މި އަހަރު ރާއްޖެއަށް ދިނީ 1،000 ކޯޓާ އެވެ. އޭގެ ތެރެއިން ހައްޖަށް މީހުން ގެންދިޔުމުގެ ހުއްދަ ދީފައިވާ ތިން ކުންފުނިން ކޮންމެ ކުންފުންޏަކަށް 90 ކޯޓާ ދީފައިވެ އެވެ. ދެން ހުރި ކޯޓާތައް ދިނީ ހައްޖު ކޯޕަރޭޝަނަށެވެ.
ހައްޖަށް ދާ މީހުން ފުރުމުގެ ކަންކަން ފަސޭހަ ކޮށްދިނުމުގެ ގޮތުން ސަރުކާރުން ވަނީ އެކި އިންތިޒާމުތައް ހަމަޖައްސައި ދީފަ އެވެ.