27 ޖެނުއަރީ 2017 - 18:43
ނިއު ޔޯކް (ޖެނުއަރީ 27) - ނިއު ޔޯކުގެ ޖޭއެފްކޭ އެއާޕޯޓުގައި މަސައްކަތް ކުރާ މުސްލިމް އަންހެނަކަށް ރައީސް ޑޮނަލްޑް ޓްރަމްޕަށް ތާއީދު ކުރާ މީހަކު ހަމަލާދީފި އެވެ.
ޑެލްޓާ އެއާލައިންސްގައި މަސައްކަތް ކުރާ ބުރުގާ އެޅި މުސްލިމު އަންހެން މީހާއާ ދިމާކޮށްލުމަށް ފަހު ހަމަލާދީފައި ވަނީ މެސެޗޫސެޓްސްގެ ރައްޔިތެއް ކަމަށްވާ 57 އަހަރުގެ ރޮބިން ރޯޑްސް އެވެ. އޭނާ ވަނީ މުސްލިމުން އަންހެން މީހާ އޮފީހުން ނުކުތުމަށް ހުރަސް އަޅާ އެންމެ ފަހުން އޭނާގެ ފައިގައި ވެސް ޖަހައިފަ އެވެ. މި މައްސަލާގައި ރޯޑްސްގެ މައްޗަށް މިހާރު ވަނީ ދައުވާ އުފުލައިފަ އެވެ. އޭނާގެ މައްޗަށް އުފުލާފައިވާ، މީހަކަށް ހަމަލާ ދިނުމާއި ގަދަކަމުން މީހަކު ބަންދުކުރުމުގެ ކުށް ސާބިތު ވެއްޖެ ނަމަ ހަތަރު އަހަރުގެ ޖަލު ހުކުމެއް އަންނާނެ އެވެ.
ބުރާގާ އެޅި އަންހެން މީހާ މިދިޔަ ބުދަ ދުވަހު އޮފީހުގައި އިންދާ ރޯޑްސް ވަނީ ދޮރުގާ ޖެހުމަށް ފަހު އަންހެން މީހާއާ ދިމާލަށް އަޑުގަދަ ކުރަން ފަށައިފަ އެވެ. އަދި އަންހެން މީހާ އޮފީހުން ނުކުތުމަށް ހުރަސް އަޅާ، އެންމެ ފަހުން ވަނީ އަންހެން މީހާގެ ފައިގައި ޖަހައިފަ އެވެ. އެހެން މީހެއްގެ އެހީގައި އޮފީހުން ނުކުތުމުން ވެސް ރޯޑްސް ވަނީ އަންހެން މީހާގެ ފަހަތުން ގޮސް އޭނާ އަށް މަލާމާތް ރައްދުވާ ގޮތަށް ކަންތައް ކޮށްފަ އެވެ. އަދި ޓްރަމްޕް އެބަހުރި ކަމަށާއި ކަލޭމެން އެންމެންގެ ކިބައިން ސަލާމަތްވާނެ ކަމަށް މުސްލިމް އަންހެނާއާ މުޚާތަބްކޮށް ރޯޑްސް ގޮވަމުން ދިޔަ އެވެ.