27 ޖެނުއަރީ 2017 - 14:03
ގައުމީ އަންހެން ފުޓްބޯޅަ ޓީމުގެ ވައިސް ކެޕްޓަން މަރިޔަމް މިރުފަތު 10 އަހަރަށް ފަހު ގައުމީ ޓީމުން ރިޓަޔާކޮށްފި އެވެ.
މިރުފަތު ގައުމީ ޓީމަށް ކުޅުން ހުއްޓާލީ ދާދި ފަހުން ބަހްރޭނާ ދެކޮޅަށް ކުޅުނު ދެ މެޗަށް ފަހު އެވެ. އޭނާ އަކީ ގައުމީ އަންހެން ޓީމު މިހާތަނަށް ހޯދާފައިވާ ގިނަ ކުރިއެރުންތަކުގައި ހިއްސާ ބޮޑު ކުޅުންތެރިޔެކެވެ.
ޓީމަށް ކުޅުން ހުއްޓާލިކަން އިއުލާނުކުރުމަށް ފަހު މިރުފަތު ބުނީ މިއީ އޭނާގެ ހަޔާތުގައި ނިންމި ވަރަށް އުނދަގޫ ނިންމުމެއް ކަމަށެވެ.
"މިއީ އަހަރެންނަށް ވަރަށް އުނދަގޫ ނިންމުމެއް. ފާއިތުވި 10 އަހަރަށް ވުރެ ގިނަ ދުވަސް ވަންދެން އަހަންނަށް އެހީތެރިވި އެންމެނަށް ވަރަށް ހާއްސަ ޝުކުރެއް އަދާކުރަން. ހާއްސަކޮށް އާއިލާ އިންނާއި ރައްޓެހިން އަދި ޓީމުގެ ކުޅުންތެރިން ދިން އެހީތެރިކަން ފާހަގަކުރަން،" މިރުފަތު އޭނާގެ ފޭސްބުކްގައި ލިޔެފައިވެ އެވެ.
އޭނާ ބުނީ އެންމެ ހަނދާންވާ މެޗަކީ ޓީމު އެކުލަވާލި ފުރަތަމަ ދުވަސްވަރު 2004 ވަަނަ އަހަރު މިޔަންމާ އަތުން 17-0 އިން ބަލިވި މެޗު މަތިން ކަމަށެވެ.
"އެންމެ ހަނދާންވާ އެއް މެޗަކީ 17-0 އިން ބަލިވި މެޗު. އެ ދުވަހަށް ފަހު މިއަދާ ހަމައަށް އަހަރެމެންނަށް ހޯދުނު ކުރިއެރުންތަކާ މެދު ވަރަށް ހިތްހަމަ ޖެހޭ. ގައުމީ ޓީމުގެ ކުޅުންތެރިޔަކަށް ވެވުނީތީ ފަހުރުވެރިވަން،" ނިއު ރޭޑިއަންޓް ސްޕޯޓްސް ކްލަބުގެ އަންހެން ޓީމުގެ ކެޕްޓަންކަން ވެސް ކޮށްފައިވާ މިރުފަތު ބުންޏެވެ.
އޭނާ ބުނީ އަބަދުވެސް ގައުމީ ޓީމަށް ކާމިޔާބަށް އެދޭނެ ކަމަށާއި މުސްތަގުބަލުގައި ޓީމަށް ކުޅޭ ކުޅުންތެރިންގެ ފަރާތުން ވެސް އެެދެނީ ހިތްވަރާ އެކު ކުރިއެރުން ހޯދުމަށް މަސައްކަތް ކުރުން ކަމަށެވެ.
އުނދަގޫ ފެށުމަކަށް ފަހު ފާއިތުވި ތިން އަހަރުގެ ތެރޭ އަންހެން ފުޓްބޯޅަ ޓީމު ވަނީ ސަރަހައްދީ ފެންވަރުގައި ރަނގަޅު ކުރިއެރުމެއް ހޯދައިފަ އެވެ. އެގޮތުން މިދިޔަ އަހަރު އޮތް ސައުތު އޭޝިއަން ގޭމްސް އާއި ސާފް ވިމެންސް ޗެމްޕިއަންޝިޕްގައި ދެއްކި ކުޅުމަށް ގިނަ ބަޔަކު ތައުރީފް ކުރި އެވެ. މި ދެ މުބާރާތުގައި ވެސް މިރުފަތު ވަނީ މޮޅު ކުޅުމެއް ދައްކައިފަ އެވެ.