24 މެއި 2023 - 12:01
ރިޔާދު (މެއި 24) - ސައުދީ ޕްރޯ ލީގުގައި ފަހަތުން އަރައި 3-2 އިން އަލް ޝަބާބް ބަލިކުރި މެޗުގައި އައް ނަސްރު މޮޅުކޮށްދިން ގޯލު ޖެހުމަށް ފަހު ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އުފާފާޅުކުރުމުގެ ތެރޭގައި ޝުކުރުގެ ސަޖިދައެއް ޖެހުމުން އެކަން ހާއްސަވެއްޖެ އެވެ.
ގޯލު ޖެހުމަށް ފަހު އުފާފާޅުކުރި ވަގުތު ދަނޑުމަތީގައި ތިބި ކުޅުންތެރިންގެ އިތުރުން ބެންޗުގައި ތިބި ކުޅުންތެރިންނާއި ޓެކްނިކަލް ސްޓާފުން ވެސް ވަނީ ރޮނާލްޑޯއާ އެކު އުފާ ފާޅުކޮށްފަ އެވެ. އަދި އެންމެ ބޮޑު ސަމާލުކަމެއް ލިބުނީ އުފާފާޅުކޮށް ނިމުނު ވަގުތު، މުސްލިމް ކުޅުންތެރިން އާއްމުކޮށް ގޯލު ޖެހުމަށް ފަހު ޝުކުރުގެ ސަޖިދަ ޖަހާ ގޮތަށް ރޮނާލްޑޯ ވެސް ޝުކުރުގެ ސަޖިދައެއް ޖެހުމުންނެވެ.
ނަސްރުގެ އަމިއްލަ ދަނޑުގައި ރޭ ކުޅުނު މެޗުގައި ފުރަތަމަ ދެ ގޯލު ޖަހައި ލީޑު ނެގީ އަލް ޝަބާބުންނެވެ. އެޓީމަށް ކުޅޭ އާޖެންޓީނާގެ ފޯވާޑް ކްރިސްޓިއަން ގުއަންކާ 25 ވަނަ މިނިޓުގައި ޕެނަލްޓީއަކުން ލީޑު ނަގައިދިން އިރު ލީޑު ފުޅާކުރި ގޯލު ޖެހީ 40 ވަނަ މިނިޓުގަ އެވެ.
ޝަބާބުން ލީޑު ފުޅާކުރުމުގެ ކުރިން ރޮނާލްޑޯ ބޮލުން ފޮނުވާލި ހަމަލާއެއް ވަނީ ގޯލު ހުރަސް ދަނޑީގައި ވެސް ޖެހިފަ އެވެ. ނަމަވެސް ޓަލިސްކާ ވަނީ ފުރަތަމަ ހާފު ނިމުމުގެ ކުރިން ނަސްރަށް ގޯލެއް ކާމިޔާބުކޮށްދީ ފަރަގު ކުޑަކޮށްދީފަ އެވެ.
ދެވަނަ ހާފު ފެށިގެން ހަވަނަ މިނިޓުގައި ނަސްރަށް ނަތީޖާ އެއްވަރު ކޮށްދިނީ އަބްދުއްރަހްމާން ގަރީބެވެ. އޭގެ އަށް މިނިޓު ފަހުން އެޓީމު ބޮޅުކޮށްދިން ގޯލު ރޮނާލްޑޯ ޖެހީ އިދިކޮޅު ދެ ކުޅުންތެރިން ކައިރިން ނައްޓާލާފައި ޕެނަލްޓީ އޭރިއާގެ ބޭރުގައި ހުރެ ގޯލުގެ މަތީ ކަނަށް ބޯޅަަ ފޮނުވާލައިގެންނެވެ.
މިދިޔަ ހަފްތާ ރަށުން ބޭރުގައި 2-0 އިން އަލް ތާއީ ބަލިކުރި މެޗުގައި ވެސް ރޮނާލްޑޯ ވަނީ ގޯލެއް ޖަހައިފަ އެވެ. އެއީ ޕެނަލްޓީއަކުން ޖެހި ގޯލެކެވެ. ރޭގެ ގޯލާ އެކު، ޖެނުއަރީ މަހު ނަސްރަށް ކުޅެން ފެށި ރޮނާލްޑޯ ވަނީ ލީގުގައި މިހާތަނަށް ކުޅުނު 15 މެޗުން 14 ގޯލު ކާމިޔާބުކޮށްފަ އެވެ. އޭގެ ތެރޭގައި ދެ ހެޓްރިކް ވެސް ހިމެނެ އެވެ. މި ސީޒަނުގައި ލީގުގައި މިހާތަނަށް އެންމެ ގިނަ ހެޓްރިކް ހަދާފައި ވަނީ ވެސް ރޮނާލްޑޯ އެވެ.
ނަސްރުގެ މި މޮޅާ އެކު އެޓީމު ލީގު ދެވަނައިގައި އޮތީ 63 ޕޮއިންޓާ އެކު އެވެ. އެއްވަނައިގައި އޮތީ ރޭ އަލް ބަތީން 1-0 އިން ބަލިކުރި އަލް އިއްތިހާދެވެ. އިއްތިހާދަށް ވަނީ 66 ޕޮއިންޓް ލިބިފަ އެވެ. ތިންވަނައިގައި އޮތް ޝަބާބް އާއި ހަތަރުވަނައިގައި އޮތް އަލް ހިލާލް އޮތީ ނަސްރަށް ވުރެ 10 ޕޮއިންޓް ފަހަތުގަ އެވެ.
ސައުދީ ލީގުގައި ކޮންމެ ޓީމަކަށް ވެސް މި ސީޒަނުގައި ބާކީ އޮތީ ދެ މެޗެވެ. ރަށުން ބޭރުގައި އަލް އިއްތިފާގާ ދެކޮޅަށް ކުޅުމަށް ފަހު، ފަހު މެޗު ނަސްރު ނުކުންނާނީ އަމިއްލަ ދަނޑުގައި އަލް ފާތިހް އާ ދެކޮޅަށެވެ. އިއްތިހާދަށް އޮޓީ އަލް ފައިހާ އާއި އަލް ތާއީ އާ ދެކޮޅަށް ކުޅޭ މެޗެވެ.