17 މެއި 2023 - 14:32
އެމްޑީޕީގެ ރައީސް މުހައްމަދު ނަޝީދު ފިޔަވައި "ފިކުރެއްގެ ދިރުމުގައި" އިސްކޮށް އުޅުއްވާ ރައްޔިތުންގެ މަޖިލީހުގެ ގިނަ މެމްބަރުން އެމްޑީޕީން ވަކިވެވަޑައިގަތުމަށް ނިންމަވައިފި އެވެ.
ރައްޔިތުންގެ މަޖިލީހުގެ އެމްޑީޕީގެ ގިނަ މެމްބަރުންތަކަކާއި އެމްޑީޕީގެ ނައިބު ރައީސް މުހައްމަދު ޝިފާޒް އާއި އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިން އަމްރު ޕާޓީން އިސްތިއުފާ ދެއްވަން ސިޓީ ފޮނުއްވާފައިވާ ކަން "މިހާރު"އަށް ވަނީ ކަށަވަރުވެފަ އެވެ.
މިހާތަނަށް ކަށަވަރުވެފައިވާ ގޮތުގައި ރައްޔިތުންގެ މަޖިލީހުގެ ރައީސް، ނަޝީދާ އެކު މަސައްކަތް ކުރައްވާ އެމަނިކުފާނު ފެކްޝަނުގެ 12 މެމްބަރަކު މި އިސްތިއުފާގެ ތެރޭގައި ހިމެނިވަޑައިގަންނަވަ އެވެ. މި ނިންމުން ނިންމީ، ފިކުރެއްގެ ދިރުމުގައި ހިމެނިވަޑައިގަންނަވާ މެދު ހެންވޭރު ދާއިރާގެ މެމްބަރު އަލީ އާޒިމް އެމްޑީޕީން ވަކިކުރުމުންނެވެ.
ނަޝީދާ އަރިސް ގިނަ މެމްބަރުންތަކެއް ވަކިވެވަޑައިގަތުމާ އެކު "ފިކުރެއްގެ ދިރުމުގައި" ތިބި ޕާޓީގެ އާއްމު މެމްބަރުންތަކެއް ވެސް އެމްޑީޕީން ވަކިވާން އަންނަނީ ފޯމު ފުރަމުންނެވެ. އެ ހަރަކާތް ހިނގާއިރު، ނަޝީދުގެ ވިސްނެވުން އިއުލާންކުރައްވަން، މިއަދު ހަވީރު 5 ޖަހާއިރު އެ ފެކްޝަނުގެ ޕްރެސް ކޮންފަރެންސެއް ބާއްވަން ވަނީ ނިންމައިފަ އެވެ.
އެމްޑީޕީގެ ފިޔަވަޅު އަޅާ ކޮމިޓީން އާޒިމް ވަކިކުރީ، ޗާގޮސް މައްސަލާގައި އިދިކޮޅު ޕާޓީތަކާ ގުޅިވަޑައިގެން އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމުގެ މައްސަލާގައި ސޮއިކުރެއްވުމާއި ސަރުކާރާ ދެކޮޅު މުޒާހަރާއަށް ނުކުތުމުގެ ޕްރެސް ކޮންފަރެންސްގައި ބައިވެރިވެވަޑައިގަތުމުންނެވެ.
އީސީން ވެސް ވަނީ އާޒިމް، އެމްޑީޕީގެ ދަފްތަރުން އުނިކޮށްފަ އެވެ.
ނަޝީދު ވިދާޅުވި ގޮތުގައި އާޒިމް ޕާޓީން ވަކިކުރަން ފިޔަވަޅު އަޅާ ކޮމިޓީ ބޭއްވީ އެމްޑީޕީގެ އަސާސީ ގަވައިދާ ޚިލާފަށެވެ.
އާޒިމްގެ އިތުރުން ހަތަރު މެމްބަރަކު ވިޕްލައިނާ ތަކުރާރުކޮށް ޚިލާފުވި މައްސަލާގައި ފިޔަވަޅު އަޅަން ވެސް ޕާލަމަންޓްރީ ގްރޫޕުން ފޮނުވި އެވެ. އެއީ ހެންވޭރު ހުޅަނގު ދާއިރާގެ މެމްބަރު ހަސަން ލަތީފާއި ހުޅުދޫ ދާއިރާގެ މެމްބަރު އިލްޔާސް ލަބީބާއި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީގެ އިތުރުން ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފެވެ.
މި މެމްބަރުން ޕާޓީން ވަކިކުރުމުގެ ފަހު އިންޒާރު އޮތީ ދީފަ އެވެ.
މުހައްމަދު ޝިފާޒް (އެމްޑީޕީގެ ނައިބު ރައީސް)
ހަސަން ލަތީފް (ހެންވޭރު ހުޅަނގު)
އީވާ އަބްދުﷲ (ގަލޮޅު އުތުރު)
އިލްޔާސް ލަބީބް (ހުޅުދޫ ދާއިރާ)
އިމްތިޔާޒް ފަހުމީ (މާފަންނު އުތުރު)
މުހައްމަދު ވަހީދު (އުނގޫފާރު ދާއިރާ)
ޔާސިރު އަބްދުއްލަތީފް (ކުޅުދުއްފުށީ އުތުރު)
އިބްރާހިމް ރަޝީދު (ބޮންޑޭ)
ހަސަން އަފީފް (ވިލުފުށި)
ހުސެއިން ފިރުޝާން (މަޑަވެލި ދާއިރާ)
މުހައްމަދު ރަޝީދު (ބޯދިގު، މައްޗަންގޮޅި އުތުރު)
ހަސަން ޝިޔާން (ތޮއްޑޫ ދާއިރާ)
އަހްމަދު ޒާހިރު (ގައްދޫ)
ހުސެއިން އަމްރު (އެސްޓީއޯގެ ކުރީގެ މެނޭޖިން ޑިރެކްޓަރު)
އެމްޑީޕީގެ އިސް ލީޑަރު، ރައީސް އިބްރާހިމް މުހައްމަދު ސޯލިހާއި ޕާޓީގެ ރައީސް މުހައްމަދު ނަޝީދާ ދެމެދު އޮތް ހިޔާލުތަފާތުވުންތަކަށް ފަހު، ކޯޅުން ބޮޑުވީ ޕްރައިމަރީން ނަޝީދު ނާކާމިޔާބުވެވަޑައިގަތުމުންނެވެ. ޕާޓީ ތެރެއިން "ފިކުރެއްގެ ދިރުން" އުފައްދަވައި ރައީސް އިބްރާހިމް މުހައްމަދު ސޯލިހަށް ތާއީދު ނުކުރައްވައި ވަކި ކެންޑިޑޭޓަކު އިންތިހާބަށް ނެރޭނެ ކަން ނަޝީދު އޮތީ އިއުލާންކުރައްވައިފަ އެވެ.
އެކަމަކު އޭގެ ފަހުން ދެން ފެނުނީ، ޖުމްހޫރީ ޕާޓީގެ ލީޑަރު ގާސިމް އިބްރާހިމް ރިޔާސީ އިންތިހާބަށް ނެރެން ބާރުއަޅުއްވައި ކޯލިޝަން ހެދުމުގެ މަޝްވަރާތައް ބޭއްވި ތަނެވެ. މި ގުޅުން އަދި ހަސިއްޔަތަކާ ހަމައަަށް ނުވަތަ ކޯލިޝަން ހަދަން ނިންމުމާ ހިސާބަށް އާދެވިއްޖެ ކަން މިހާތަނަށް އިއުލާނެއް ނުކުރެ އެވެ.
އެންމެ ފަހުން، މީޑިއާތަކަށް ބުނީ، ބަރުލަމާނީ ނިޒާމަކަށް ވެރިކަން ފުރޮޅާލަން ނަޝީދުގެ ފަރާތްޕުޅުން ޖުމްހޫރީ ޕާޓީއަށް ހުށަހެޅުންތަކެއް ލިބިފައިވާ ކަމަށެވެ. އެކަމުގައި މަޝްވަރާކޮށް ނިމޭ ގޮތެއް އިއުލާންކުރާނެ ކަަމަށް ޖުމްހޫރީ ޕާޓީން ބުނެފައި ވިޔަސް އެ މަޝްވަރާ އެހާ ފުޅާކޮށް ޖުމްހޫރީ ޕާޓީ ތެރޭގައި ނުހިނގާކަން އެ ޕާޓީގެ މެމްބަރުން ކަށަވަރު ކޮށްދެއްވަ އެވެ.
އެމްޑީޕީގެ ގިނަ މެމްބަރުންތަކެއް ޕާޓީ މި ދޫކޮށްލެއްވީ، ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހާ އެކު ނުތިއްބަވާނެ ކަަމަށް ވިދާޅުވެ މަޖިލީހާއި ސިޔާސީ މަސައްކަތުގައި ވެސް އިދިކޮޅު ފަރާތްތަކަށް ތާއީދުކުރައްވައި މަސައްކަތް ކުރައްވާތާ ދުވަސްތަކެއް ފަހުންނެވެ.
ނަޝީދު ވިދާޅުވެފައިވާ ގޮތުގައި އާޒިމާއި ދެން ތިއްބެވި މެމްބަރުންނަށް ފިޔަވަޅު ނިންމީ ގޯސްކޮށެވެ.
އެމަނިކުފާނު "މިހާރު"އަށް ވިދާޅުވީ އެމްޑީޕީގެ ފިޔަވަޅު އަޅާ ކޮމިޓީ ބޭއްވޭނީ އެ ކޮމިޓީގެ މުގައްރިރު, ޕާޓީގެ ނައިބު ރައީސް މުހައްމަދު ޝިފާޒަށް އެނގިވަޑައިގެން ކަމަށެވެ. އެކަމަކު އެއާޚިލާފަށް ސިއްރުން ކޮމިޓީ ބާއްވައި ޕާޓީން އަމަލުކޮށްފައި ވަނީ އަސާސީ ގަވައިދާ ޚިލާފަށް ކަމަށް އެމަނިކުފާނު ވިދާޅުވި އެވެ.
"ކޮމިޓީ ބައްދަލުވާން ވެސް އޮންނަނީ، ބައްދަލުވެވެން ވެސް އޮންނަނީ އެ ކޮމިޓީގެ މުގައްރިރު، އެމްޑީޕީގެ ނައިބު ރައީސް [މުހައްމަދު ޝިފާޒް] އެ ކޮމިޓީގެ ބައްދަލުވުން ބާއްވަން އެދިވަޑައިގަތީމަ. އެހެން މީހުންނަކަށް އޮންނަ އިހްތިޔާރެއް ނޫން އެއީ." ނަޝީދު ވިދާޅުވި އެވެ.
އޭގެ ފަހުން އެމްޑީޕީގެ ގްރޫޕްތަކަށް މިއަދު ހެނދުނު ފޮނުއްވި މެސެޖެއްގައި ވިދާޅުވީ ރައީސުލްޖުމްހޫރިއްޔާ އަންގަވައިގެން ދާއިރާ ރައީސުން ނުކުމެވަޑައިގެން އެމްޑީޕީގެ ކެންޑިޑޭޓުން ކަޓުވާލި ކަމަށެވެ. އެހެން މީހުން އެ ގޮނޑިތަކަށް ހޮވި މައްސަލަ ނުބަލައި ފިޔަވަޅު އަޅާ ކޮމިޓީން މިހާރު ބަލާ މައްސަލަތައް ބެލުމަކީ އިންސާފެއް ނޫން ކަމަށެވެ.
"ޕާޓީން ވަކިކުރަން ޖެހޭނީ ރައީސުލްޖުމްހޫރިއްޔާ،" ނަޝީދު ވިދާޅުވި އެވެ.